Hesus Ta Siña Riba Sero

MIRA Hesus sinta ei. E ta siñando tur e hendenan ei riba un sero na Galilea. Esnan sinta mas cerca di dje ta su discipelnan. El a scohe 12 di nan pa bira apostel. E apostelnan tabata discipelnan special di Hesus. Bo sa nan nomber?

Tin Simon Pedro y su ruman Andres. Anto tin Santiago y Juan, cu tambe ta ruman di otro. Tin un otro apostel mas cu yama Santiago, y un otro mas cu yama Simon. Tin dos apostel cu yama Judas. Un ta Judas Iscariot, y e otro Judas ta ser yama Tadeo tambe. Anto tin Felipe y Natanael (tambe yama Bartolomeo), y Mateo y Tomas.

Despues di a bolbe for di Samaria, Hesus a cuminsa predica pa prome bes cu ‘e reino di shelo ta cerca.’ Bo sa kico e reino ei ta? Esei ta un berdadero gobierno di Dios. Hesus ta su rei. Lo e reina for di shelo y trece pas riba Tera. Henter e Tera lo bira un paradijs bunita bou di e reino di Dios.

Aki Hesus ta siñando e hendenan tocante e reino. E ta splica nan: ‘Haci oracion asin’aki: Nos tata cu ta den shelo, santifica sea bo nomber. Laga bo reino bini. Laga bo boluntad ser cumpli riba Tera, mescos cu den shelo.’ Hopi hende ta yama esaki e ‘Oracion di Nos Tata.’ Bo por bisa henter e oracion?

Tambe Hesus a siña e hendenan con nan tin cu trata otro. El a bisa: ‘Haci cu otro mescos cu bo kier pa nan haci cu bo.’ Bo no ta gusta pa otronan trata bo cu bondad? Pues, Hesus a bisa, nos tin cu trata otro hende cu bondad. Lo no ta maraviyoso ora tur hende ta haci esei den paradijs riba Tera?