E Moda di Siña di Hesus

UN DIA Hesus a bisa un homber cu e tin cu stima su prohimo. E homber a puntra Hesus: ‘Ken ta mi prohimo?’ Wel, Hesus tabata sa kico e homber tabata pensa. E homber tabata pensa cu ta hende di su mes rasa y religion so ta su prohimo. Laga nos mira loke Hesus a bis’e.

Tin bes Hesus tabata siña hende dor di conta un relato. El a haci esei na e ocasion aki tambe. El a conta un relato di un Hudiu y un Samaritano. Nos a siña caba cu mayoria Hudiu no tabata gusta Samaritano. Wel, esaki ta e relato di Hesus:

Un dia un Hudiu tabata baha sero riba caminda pa Jerico. Pero bandido a atac’e. Nan a horta su placa y a golpi’e te cu nan a casi mat’e.

Despues un sacerdote Hudiu a pasa riba e caminda. El a mira e homber golpia. Kico bo ta kere cu el a haci? Wel, el a crusa bai na otro banda di e caminda y a sigui bai. Anto un otro hende masha religioso a pasa. E tabata un Levita. El a para? No, e tampoco no a para pa yuda e homber golpia. Bo por mira e sacerdote y e Levita leu riba caminda.

Pero mira ken ta einan cerca e homber golpia. Esei ta un Samaritano. Y el a yuda e Hudiu. El a pone remedi riba su heridanan. Despues, el a hiba e Hudiu un luga caminda e por a sosega y bira bon.

Despues di a conta e relato, Hesus a puntra e homber cu a hacie e pregunta: ‘Cua di e tresnan a trata e homber golpia como su prohimo? E sacerdote, e Levita of e Samaritano?’

E homber a contesta: ‘E Samaritano. El a trata e homber golpia cu bondad.’

Hesus a bisa: ‘Bo tin rason. P’esei, bai y trata otro hende mescos cu el a haci.’

Bo no ta gusta e moda di siña di Hesus? Nos por siña masha hopi cos importante si nos presta atencion na loke Hesus a bisa den Bijbel, no ta berdad?