Den un Sala Ariba

AWOR ta diahuebs anochi, dos dia despues. Hesus y su 12 apostelnan a reuni den un sala grandi ariba pa come e cena di Pasco Hudiu. E homber cu bo ta mira sali ta Judas Iscariot. E ta bai pa bisa e sacerdotenan con nan por haya Hesus.

Net e dia prome, Judas a bai cerca nan y a puntra nan: ‘Cuanto boso ta paga mi pa yuda boso cohe Hesus?’ Nan a bis’e: ‘Trinta moneda di plata.’ P’esei Judas ta sali pa contra cu nan pa e hiba nan caminda Hesus ta. Esei no ta teribel?

E cena di Pasco Hudiu a caba. Pero awor Hesus ta cuminsa un otro cena special. E ta pasa pan pa su apostelnan y ta bisa: ‘Come, pasobra esaki ta nifica mi curpa cu mi ta duna pa boso.’ Despues e ta pasa un copa di biña y ta bisa: ‘Bebe, pasobra esaki ta nifica mi sanger cu lo ser drama pa boso.’ Bijbel ta yama esei e ‘Cena di Señor’; e ta e asina yama ‘ultimo cena.’

E Israelitanan tabata come e Pasco Hudiu pa nan recorda e dia cu e angel di Dios a pasa nan cas voorbij na Egipto, pero a mata e yiu mayo den tur cas di e Egipcionan. Pero awor Hesus kier pa su siguidonan recorda e y con el a duna su bida pa nan. P’esei el a manda nan pa celebra e cena special aki tur aña.

Despues di a come e Cena di Señor, Hesus a bisa su apostelnan tene hopi curashi y sea firme den fe. Finalmente nan a canta cantica pa Dios y a sali bai. Awor ta hopi lat, probablemente despues di meianochi. Laga nos mira unda nan ta bai.