Nan Ta Mata Hesus

MIRA e cos teribel cu ta sosode! Nan ta mata Hesus. Nan a pon’e riba un staca. Nan a claba su man- y su pianan. Pakico nan lo haci un cos asina cu Hesus?

Pasobra algun hende ta odia Hesus. Bo sa ken nan ta? Uno di nan ta e angel malbado Satanas e Diabel. El a logra pone Adam cu Eva desobedece Jehova. Y Satanas a pone e enemigonan di Hesus comete e crimen teribel aki.

Asta prome cu nan a claba Hesus na e staca, su enemigonan a trat’e malo. Bo ta corda con nan a bini na e hofi di Getsemane y a cohe Hesus bai cu ne? Ken e enemigonan aki tabata? Si, nan tabata e lidernan religioso. Wel, laga nos mira kico a sosode despues.

Ora e lidernan religioso a bai cu Hesus, su apostelnan a core bai. Nan a bandona Hesus den man di su enemigonan pasobra nan tabatin miedo. Pero apostel Pedro y Juan no a bai mucho leu. Nan a sigui nan tras pa mira kico ta sosode cu Hesus.

E sacerdotenan a hiba Hesus cerca e anciano yama Anas, kende antes tabata sumo sacerdote. E multitud no a keda ei hopi tempo. Despues nan a hiba Hesus na cas di Caifas, kende ta e sumo sacerdote awor. Hopi lider religioso a reuni den su cas.

Nan a tene un huicio den cas di Caifas. Nan a trece hende pa gaña riba Hesus. Tur e lidernan religioso a bisa: ‘Hesus tin cu muri.’ Anto nan a scupi den su cara y a dal e cu mokete.

Mientrastanto, Pedro a keda den e cura. Tabata haci friu y e hendenan a sende un candela. Mientras nan tabata keinta nan curpa rond di e candela, un sirbiente a mira Pedro y a bisa: ‘E homber ei tambe tabata hunto cu Hesus.’

Pedro a contesta: ‘No, mi no tabata hunto cu ne.’

Tres bes hende a bisa Pedro cu e tabata hunto cu Hesus. Pero cada bes Pedro a nenga. Ora Pedro a bisa esei pa e di tres bes, Hesus a drei wak e. A duel Pedro cu el a gaña asina, y el a bai y a yora.

Tempran su manece diabierna, ora solo a cuminsa sali, e sacerdotenan a hiba Hesus na nan luga grandi di reuni, e sala di Sanedrin. Nan a papia ei tocante kico nan lo haci cu ne. Nan a hib’e cerca Poncio Pilato, e gobernante di e districto di Judea.

E sacerdotenan a bisa Pilato: ‘E homber aki ta un mal hende. E tin cu muri.’ Despues cu Pilato a haci Hesus algun pregunta, el a bisa: ‘Mi no ta haya cu el a haci nada malo.’ Anto Pilato a manda Hesus cerca Herodes Antipas. E tabata gobernante di Galilea, pero e tabata kedando na Jerusalem. E tampoco no a haya nada malo den Hesus y a mand’e bek pa Pilato.

Pilato kier a laga Hesus bai. Pero e enemigonan di Hesus tabata kier pa e laga un otro prizonero bai, esta, e ladron Barabas. Tabata rond di merdia ora Pilato a trece Hesus pafo. El a bisa e pueblo: ‘Mira! Boso rei!’ Pero e sacerdotenan principal a grita: ‘Caba cu ne! Mat’e! Mat’e!’ P’esei Pilato a laga Barabas sali liber y nan a bai cu Hesus pa mat’e.

Diabierna traimerdia nan a claba Hesus na e staca. Bo no por mira nan riba e plachi, pero na cada banda di Hesus tabatin un criminal cu a ser colga na staca pa muri. Un poco prome cu Hesus a muri, un di e criminalnan a pidie: ‘Corda mi ora bo ta den bo reino.’ Y Hesus a contesta: ‘Mi ta priminti bo cu lo bo ta cu mi den Paradijs.’

Bo no ta haya esei un promesa maraviyoso? Bo sa ta cua paradijs Hesus tabata kiermen? Unda e paradijs cu Dios a traha na principio tabata? Si, riba Tera. Y ora Hesus ta reina como rei den shelo, lo e resusita e homber aki na bida pa e gosa di e Paradijs nobo riba Tera. Esei no ta haci nos felis?