Piedramento di Esteban

E HOMBER na rudia ta Esteban. E ta un fiel discipel di Hesus. Pero mira loke ta pas’e awor! E hombernan ei ta tir’e cu piedra grandi. Pakico nan ta odia Esteban asina tanto te cu nan ta haci un cos teribel asina? Ban mira.

Dios a yuda Esteban haci milager grandi. E hombernan ei no a gusta esei y p’esei nan a cuminsa pleita cu ne dor cu e tabata siña e pueblo e berdad. Pero Dios a duna Esteban gran sabiduria, y Esteban a mustra cu e hombernan ei su siñansa ta falso. Esei a haci nan asta mas rabia. P’esei nan a coh’e y a yama otro hende pa gaña riba dje.

E sumo sacerdote a puntra Esteban: ‘E cosnan aki ta berdad?’ Esteban a contesta dunando un bon discurso biblico. Na cabamento di su discurso, el a conta con e mal hendenan a odia e profetanan di Jehova for di leu den pasado caba. Anto el a bisa: ‘Boso ta mescos cu e hendenan ei. Boso a mata Hesus, e sirbidor di Dios, y boso no a obedece e leinan di Dios.’

Esei a haci e lidernan religioso hopi rabia! Nan a morde riba djente di rabia. Pero Esteban a hisa su cara y a bisa: ‘Mira! Mi ta mira Hesus para na man drechi di Dios den shelo.’ E ora ei nan a tapa nan horea y a ataca Esteban. Nan a coh’e y lastr’e te pafo di e stad.

Ora nan yega ei, nan ta kita nan mantel y laga nan den cuido di e yoncuman cu yama Saulo. Bo ta mira Saulo? Despues algun di e hombernan ta cuminsa piedra Esteban. Esteban ta hinca rudia, manera bo ta mira, y resa na Dios: ‘Jehova, no castiga nan pa e maldad aki.’ E sa cu e lidernan religioso a gaña algun di nan. Despues di esei, Esteban ta muri.

Ora hende trata bo malo, bo ta paga malo cu malo, of bo ta pidi Dios castiga nan? Ni Esteban ni Hesus no a haci esei. Asta hende cu a trata nan malo nan a trata cu bondad. Laga nos purba sigui nan ehempel.