Hende Cu Ta Haci Cos Malo Por Cambia?

BO NO ta kere cu lo ta hopi dushi si tur hende haci cos bon?— Pero no tin ningun hende cu ta haci cos bon so. Bo sa dicon nos tur ta haci cos malo de bes en cuando, maske ta cos bon nos kier haci?— Door cu nos tur a nace cu pica. Pero tin hende cu ta haci yen di cos hopi malo. Nan tin rabia riba otro hende, y nan ta haci nan daño pa malo. Bo ta kere cu nan por cambia y siña bira bon hende?—

Wak e yoncuman cu ta para cuida paña di e hendenan cu ta bati Esteban cu piedra. Su nomber Hebreo ta Saulo, pero su nomber Romano ta Pablo. E ta contento cu nan ta mata Esteban, un disipel di e Gran Maestro. Laga nos wak dicon Saulo ta haci un cos asina malo.

Saulo ta parti di un grupo religioso Hudiu cu yama Farizeo. E Farizeonan tin e Palabra di Dios, pero nan ta paga mas tino na loke algun di nan mes lidernan religioso a siña. Esei ta loke a pone Saulo haci cos malo.

Ora nan a coi Esteban preso na Herusalem, Saulo tawata hunto cu nan. Nan a hiba Esteban dilanti hues, y algun di e huesnan tawata Farizeo. Maske nan a bisa cos malo tocante Esteban, e no tawatin miedo. Mesora el a papia cu curashi, y a duna e huesnan un bon testimonio tocante Yehova Dios y tocante Hesus.

Pero e huesnan no a gusta loke el a bisa nan. Nan tawata sa hopi cos tocante Hesus caba. Si, ta nan mes a laga mata Hesus net un poco tempo prome! Pero despues Yehova a hiba Hesus shelo bek. Awor, na luga di cambia, e huesnan tawata bringa contra e disipelnan di Hesus.

E huesnan a gara Esteban y hib’e pafo di e stad. Nan a dal e bent’e abou, anto tir’e cu piedra. Y manera bo por mira riba e plachi, Saulo a para mira e cos pasa. El a pensa cu ta un bon cos nan a haci di mata Esteban.

Bo sa dicon Saulo tawata pensa asina?— Wel, Saulo tawata un Farizeo henter su bida, y e tawata kere cu e cosnan cu e Farizeonan tawata siña ta bon. E tawata tuma e Farizeonan ei como su ehempel, y pesei e tawata haci mescos cu nan.—Echonan 7:54-60.

Kico Saulo a haci despues cu nan a mata Esteban?— Wel, el a purba caba cu e otro disipelnan di Hesus tambe! E tawata bai te den nan cas, lastra tanto homber como mohe saca afo, anto laga tira nan den prizon. Hopi disipel di Hesus a haya nan obliga di hui for di Herusalem. Pero nan no a stop di predica tocante Hesus si.—Echonan 8:1-4.

Esei a duna Saulo asta mas rabia riba e disipelnan di Hesus. Pesei, el a bai serca Sumo Sacerdote Caifas, pa e sumo sacerdote dun’e permit pa bai Damasco pa coi cristian preso den e stad ei tambe. Saulo kier a trece nan Herusalem preso pa nan haya castigo. Pero riba caminda pa Damasco un cos masha straño mes a sosode.

Un lus a bin for di shelo, anto un stem a bisa: “Saulo, Saulo, pakico bo ta persigui mi?” Ta Hesus tawata papia for di shelo! E lus tawata asina skerpi cu el a haci Saulo ciego. Pesei, ta e otro hendenan cu tawata hunto cu Saulo mester a lei e hiba Damasco.

Tres dia despues Hesus a aparece den un vision na un di su disipelnan na Damasco cu yama Ananias. Hesus a bisa Ananias pa e bai bishita Saulo, dun’e su bista bek y papia cu ne. Ora Ananias a papia cu Saulo, el a acepta e berdad tocante Hesus. El a haya su bista bek. Henter su manera di biba a cambia, y el a bira un sirbido fiel di Dios.—Echonan 9:1-22.

Bo a compronde awor dicon Saulo tawata haci cos malo?— Ta door cu nan a siñ’e cos robes. E tawata bai tras di hende cu no tawata fiel na Dios. Y e tawata parti di un grupo di hende cu tawata bai mas tras di idea di hende, cu tras di e Palabra di Dios. Pero, dicon Saulo si a cambia su bida y cuminsa haci bon, maske e otro Farizeonan a sigui bringa contra Dios?— Door cu no ta rabia Saulo tawatin riba e berdad. Pesei, ora nan a mustr’e kico ta bon, e tawata cla pa hacie.

Bo sa ken Saulo a bira despues?— Si, el a bira conoci como apostel Pablo, un apostel di Hesus. Y corda cu ta Pablo a skirbi mas hopi buki di Bijbel cu tur otro hende.

Tin hopi hende manera Saulo cu por cambia. Pero no ta facil, pasobra tin un persona cu ta traha hopi duro pa pone hende haci malo. Bo sa ta ken?— Ora Hesus a aparece na Saulo riba caminda pa Damasco, el a papia tocante e persona ei. El a papia cu Saulo for di shelo y bis’e: ‘Mi ta bai manda bo pa habri wowo di hende, pa saca nan for di scuridad y trece nan den lus, y saca nan for di dominio di Satanas y hiba nan na Dios.’—Echonan 26:17, 18.

Si, ta Satanas e Diabel ta purba pone tur hende haci malo. Abo sa sinti cu tin bes ta dificil pa haci bon?— Nos tur sa sinti asina. Ta Satanas ta hacie dificil. Pero tin un otro cos cu ta pone cu tin bes no ta facil pa nos haci bon. Bo sa kico e cos ei ta?— E pica cu nos a nace cu ne.

Ta esei ta pone cu hopi bes ta mas facil pa nos haci malo na luga di haci bon. Pesei, kico nos tin cu haci?— Si, nos tin cu lucha pa haci bon. Si nos haci asina, nos por tin sigur cu Hesus lo yuda nos, pasobra e ta stima nos.

Tempo Hesus tawata na tera, el a stima hende cu a yega di haci malo pero cu a cambia. E tawata sa con dificil ta pa nan cambia. Por ehempel, tawatin hende mohe cu ta tene relacion sexual cu hopi hende homber. Di mes, e cos ei ta malo. Bijbel ta yama e hende mohenan ei prostituta.

Un dia un di e hende mohenan ei a tende di Hesus, anto el a bai serca Hesus ora e tawata na cas di un Farizeo. El a basha azeta riba Hesus su pia y cu su cabei el a seca su lagrimanan for di Hesus su pia. E tawatin hopi duele di e picanan cu el a haci, y p’esei Hesus a pordon’e. Pero e Farizeo no a haya cu mester a pordon’e.—Lucas 7:36-50.

Bo sa kico Hesus a bisa algun Farizeo?— El a bisa nan: ‘E cobradonan di belasting y prostitutanan lo drenta e reino di Dios prome cu boso.’ (Mateo 21:31) Hesus a bisa asina pasobra e prostitutanan a kere den dje y nan a stop di haci malo. Pero e Farizeonan si a keda haci malo contra e disipelnan di Hesus.

Pesei, ora nos mira den Bijbel cu un cos cu nos ta haci ta malo, nos mester ta dispuesto pa cambia. Y ora nos siña kico Yehova kier pa nos haci, nos mester tin hopi gana di cuminsa haci loke e ta bisa. E ora ei Yehova lo keda contento cu nos, y lo e duna nos bida pa semper.