Saul—E Prome Rei di Israel

MIRA Samuel basha azeta riba cabes di e homber. Esei ta loke nan tabata haci cu hende pa mustra cu el a wordo scohi como rei. Jehova a bisa Samuel basha azeta riba cabes di Saul. Esei ta un azeta special di holo dushi.

Saul a pensa cu e no tabata suficientemente bon pa ser rei. El a bisa Samuel: ‘Mi ta di e tribu di Benjamin, esun di mas chikito di Israel. Pakico bo ta bisa cu ami lo bira rei?’ Jehova a gusta Saul pasobra e no a pretende di ser grandi y importante. P’esei Dios a scoh’e pa ser rei.

Pero Saul no tabata un homber pober ni chikito. El a bini di un famia rico, y tabata un homber masha nechi y halto. E tabata rond di trinta centimeter mas halto cu cualkier otro hende den Israel! Saul por a core masha lihe tambe, y e tabata un homber masha fuerte. E pueblo a keda contento cu Jehova a scohe Saul pa ser rei. Nan tur a cuminsa grita: ‘Biba nos rei!’

E enemigonan di Israel a sigui mes fuerte. Ainda nan tabata causa hopi dificultad pa e Israelitanan. Pronto despues cu Saul a bira Rei, e Amonitanan a bini pa bringa contra nan. Pero Saul a reuni un ehersito grandi, y a logra un victoria riba e Amonitanan. Esei a haci e pueblo contento di tin Saul como Rei.

Segun cu añanan a pasa, Saul a hiba e Israelitanan na hopi victoria riba nan enemigonan. Saul tabatin un yiu cu curashi tambe, cu yama Jonatan. Anto Jonatan a yuda Israel gana hopi bataya. Ainda e Filisteonan tabata e enemigo di mas grandi di e Israelitanan. Un dia miles y miles di Filisteo a bini pa bringa contra e Israelitanan.

Samuel a bisa Saul pa warda te ora e yega pa ofrece un sacrificio, of ofrenda, na Jehova. Pero Samuel a tarda pa bini. Saul tabatin miedo cu e Filisteonan lo cuminsa e bataya, y p’esei e mes a ofrece e sacrificio. Ora cu Samuel finalmente a yega, el a bisa Saul cu e tabata desobediente. Samuel a bisa: ‘Jehova lo scohe un otro homber pa ser rei riba Israel.’

Despues, Saul a desobedece atrobe. P’esei Samuel a bis’e: ‘Ta mihor pa obedece Jehova cu ofrece e mihor carnenan na dje. Dor cu bo no a obedece Jehova, Jehova lo no laga bo keda como Rei di Israel.’

Nos por siña un bon les for di esei. E ta mustra nos con importante ta pa obedece Jehova semper. Tambe e ta mustra cu un bon hende, manera Saul tabata prome, por cambia y bira mal hende. Nos no kier bira mal hende nunca, no ta berdad?