Riba Caminda pa Damasco

BO SA ta ken esun abou na suela ta? Esei ta Saulo. Corda, e ta esun cu a cuida mantel di e hombernan cu a piedra Esteban. Mira e lus briyante ei! Kico a sosode?

Despues di morto di Esteban, Saulo a hiba delantera buscando e siguidonan di Hesus pa haci nan daño. El a bai di un cas pa otro y a saca nan y encarsela nan. Hopi di e discipelnan a hui bai otro stad y a sigui declara e “bon nobo.” Pero Saulo a bai na e otro stadnan pa busca e siguidonan di Hesus. Awor e ta bai Damasco. Pero riba caminda e cos asombroso aki a sosode:

Diripiente un lus for di shelo a lusa rond di Saulo. El a cai na suela, manera nos ta mira aki. Anto un stem a yama: ‘Saulo, Saulo! Pakico bo ta haci mi daño?’ E hombernan hunto cu Saulo ta mira e lus y ta tende e zonido di e stem, pero nan no ta compronde kico e ta bisa.

Saulo ta puntra: ‘Ken bo ta Señor?’

E stem ta contesta: ‘Mi ta Hesus, esun cu bo ta haci daño.’ Hesus a bisa esei pasobra ora Saulo tabata haci daño na e siguidonan di Hesus, Hesus a sinti como si fuera ta na e mes Saulo a haci daño.

Awor Saulo ta puntra: ‘Kico mi mester haci, Señor?’

Hesus ta bisa: ‘Lanta y bai Damasco y aya nan lo bisa bo kico bo mester haci.’ Ora Saulo a lanta y a habri su wowo, e no por a mira nada. E tabata ciego! P’esei su compañeronan a ten’e na su man y a gui’e te na Damasco.

Awor Hesus a papia cu un di su discipelnan na Damasco, bisando: ‘Lanta, Ananias. Bai na e caya yama Stret. Puntra na cas di Judas pa un homber cu yama Saulo. Mi a scoh’e pa e bira un sirbidor special di mi.’

Ananias a obedece. Ora el a contra cu Saulo, el a pone man riba dje y a bisa: ‘Señor a manda mi pa bo por mira atrobe y wordo yena cu spirito santo.’ Mesora algo cu tabata parce scama a cai for di wowo di Saulo, y e por a mira atrobe.

Hesus a uza Saulo na un manera poderoso pa predica na hende di hopi nacion. El a bira conoci como apostel Pablo y nos lo siña hopi mas di dje. Pero prome, ban mira loke Dios a manda Pedro haci.