Capitulo Tres

Tene Duro na e Palabra di Dios

1. (a) Con Israel di pasado a comproba pa nan mes cu Dios su palabra ta confiabel? (b) Dicon esei ta interesa nos?

“BOSO sa di henter boso curason y di henter boso alma cu ni un palabra di tur e bon palabranan cu SEÑOR boso Dios a papia tocante di boso no a faya; tur a keda cumpli pa boso.” (Hosue 23:14-16) Esaki ta loke Hosue a bisa e ancianonan di Israel despues cu nan a establece nan mes den e Tera Priminti. Si, Yehova su promesanan a resulta di ta digno di confiansa. E relato ei di Bijbel—y tur otro—a keda conserva pa nos pa asina “nos por tin speransa.”—Romanonan 15:4.

2. (a) Den ki sentido Bijbel ta “inspira pa Dios”? (b) Sabiendo cu Bijbel ta inspira pa Dios, ki responsabilidad nos tin?

² Aunke un 40 hende a yuda skirbi Bijbel, ta Yehova mes ta su Autor. Esaki kiermen cu ta E mes a dirigi e skirbimento di tur loke tin den Bijbel? Si. El a haci esaki mediante su forsa activo, esta, su poderoso spirito santo. Cu rason apostel Pablo por a bisa: “Tur Scritura ta inspira pa Dios . . . pa e hende di Dios por ta perfecto, ekipa pa tur bon obra.” Na tur parti di mundo hende cu ta combenci cu Bijbel ta inspira pa Dios, ta presta atencion na loke E ta bisa y ta hiba nan bida segun su siñansanan.—2 Timoteo 3:16, 17; 1 Tesalonicencenan 2:13.

Yuda Otro Hende Comprende Bijbel y Respet’e

3. Cua ta e miho manera pa yuda hopi hende cu no ta combenci cu Bijbel ta e Palabra di Dios?

³ Hopi hende cu nos papia cu ne no ta mes combenci cu nos cu Bijbel ta e Palabra di Dios. Con nos por yuda nan? Hopi bes, e miho manera ta pa habri Bijbel y mustra nan kico e ta contene. “E palabra di Dios ta bibo y activo y mas skerpi cu cualkier spada di dos filo, . . . y ta capas pa husga e pensamentonan y intencionnan di curason.” (Hebreonan 4:12) “E palabra di Dios” no ta simplemente historia cu no ta importante mas pa nos tempo; e ta bibo! No tin nada cu por stroba e promesanan di Bijbel di cumpli. E influencia di Bijbel su mensahe riba e berdadero motivacion di un persona su curason ta mas poderoso cu cualkier otro cos cu nos lo por bisa pa anima e persona.

4. Splicacion di ki berdadnan biblico a cambia algun hende su actitud pa cu Bijbel, y dicon?

⁴ Djis mira e nomber di Dios den Bijbel a pone hopi hende bai analisa Bijbel mas a fondo. Otronan a dicidi di studia Bijbel ora a mustra nan loke e ta bisa tocante e proposito di bida, pakico Dios ta permiti maldad, e nificacion di sucesonan di actualidad of e speransa di bida eterno riba un tera transforma den un paradijs. Den paisnan caminda practicanan religioso a pone hopi hende sufri na man di mal spirito, Bijbel su splicacion di loke ta causa esaki y con pa haya alivio a lanta hende su interes. Dicon e puntonan aki ta impresiona hende sincero? Esei ta pasobra Bijbel ta e unico fuente cu tin informacion confiabel riba tur e asuntonan ei di vital importancia.—Salmo 119:130.

5. (a) Ora hende ta bisa cu nan no ta kere den Bijbel, kico por ta algun motibo? (b) Con nos lo por yuda e hendenan ei?

⁵ Sinembargo, kico si hende ta bisa nos cu nan no ta kere den Bijbel? Esei mester pone fin na e combersacion? No si nan tin un mente habri y ta dispuesto pa rasona riba e asunto. Podise nan ta mira Bijbel como un buki di Cristiandad. Kisas ta Cristiandad su fama di hipocresia y metemento den politica, y tambe su pidimento constant di placa, ta e motibo pakico nan no kier tende nada di Bijbel. Pakico no puntra nan si esei ta e caso? Kisas bo por lanta nan interes door di mustra nan cu Bijbel ta condena Cristiandad su practicanan mundano. Tambe bo por mustra nan algun punto di contraste cu tin entre Cristiandad y Cristianismo berdadero.—Mikeas 3:11, 12; Mateo 15:7-9; Santiago 4:4.

6. (a) Kico ta combence abo personalmente cu Bijbel ta e Palabra di Dios? (b) Ki otro echonan bo por presenta pa yuda hende comprende cu Bijbel realmente a bini di Dios?

⁶ Cerca otro hende, kisas ta util pa papia francamente riba e echonan cu ta proba cu Bijbel ta inspira pa Dios. Kico ta combence abo cu Bijbel a bini di Yehova Dios? Ta loke Bijbel mes ta bisa di su origen? Of ta e echo cu Bijbel ta contene cantidad di profecia cu ta indica conocemento detaya di futuro, profecia cu mester a bini di un fuente sobrehumano? (2 Pedro 1:20, 21) Of kisas ta e harmonia asombroso cu tin entre e pasashinan di Bijbel, apesar cu ta 40 homber a skirbie durante un periodo di mas o menos 1.600 aña? Of ta su exactitud cientifico, algo cu bo no ta haya den otro obranan skirbi di e tempo ei? Of ta e honestidad di su escritornan? Of ta e echo cu el a keda conserva apesar di intentonan malicioso pa destru’e? Bo por uza loke sea a impresiona abo personalmente, pa yuda otro hende.a

Nos Lesamento di Bijbel

7, 8. (a) Kico nos mester ta haciendo cu Bijbel? (b) Kico nos tin mester fuera di lesa Bijbel personalmente? (c) Con abo personalmente a siña comprende e propositonan di Yehova?

⁷ Fuera di yuda otro hende kere den Bijbel, nos mes tin cu tuma tempo pa les’e cu regularidad. Bo ta haciendo esei? Di tur buki hamas produci, Bijbel ta esun mas importante. Claro cu esaki no ta nifica cu si nos ta les’e riba nos mes, nos no tin mester di nada otro. E Scritura ta spierta nos pa no isola nos mes. Nos no mester pensa cu nos so por haya contesta pa tur cos door di haci investigacion independiente. Pa nos por ta Cristiannan balansa, ta necesario pa nos haci studio personal y tambe asisti regularmente na e reunionnan di e pueblo di Dios.—Proverbionan 18:1; Hebreonan 10:24, 25.

⁸ Relaciona cu esaki, Bijbel ta conta nos tocante un funcionario di Etiopia cu tawata lesa for di e profecia di Isaias. Un angel a dirigi e evangelisado Cristian Felipe pa puntra e homber: “Bo ta comprende loke bo ta lesa?” Humildemente, e Etiopio a contesta: “Con mi por comprende, si un hende no guia mi?” El a roga Felipe pa splic’e e pasashi di e Scritura. Wel, Felipe no tawata djis un lesado independiente di Bijbel cu a duna su opinion di e Scritura. E tawatin contacto estrecho cu Dios su organisacion visibel. Pesei e por a yuda e Etiopio beneficia di e instruccion cu Yehova a haci disponibel mediante e organisacion ei. (Echonan 6:5, 6; 8:5, 26-35) Awe ta mescos. Ningun hende ta yega na un comprendemento corecto di Yehova su proposito riba su mes. Nos tur tin mester di e yudansa cu Yehova ta percura amorosamente mediante su organisacion visibel.

9. Ki programa di lesamento di Bijbel por beneficia nos tur?

⁹ Pa yuda nos comprende Bijbel, Yehova su organisacion ta suministra excelente informacion biblico den varios publicacion. Ademas, nos tin un programa regular di lesamento di Bijbel en conexion cu e Scol di Ministerio Teocratico cu ta ser tene den tur congregacion di Testigonan di Yehova rond mundo. Nos por saca gran beneficio door di examina e Scritura Santo personalmente. (Salmo 1:1-3; 19:7, 8) Haci un esfuerso special pa lesa Bijbel cu regularidad. Maske bo no ta comprende tur cos bon bon, ta di gran balor pa bo haya un idea general di kico tin den e Scritura. Por ehempel, si bo lesa cuater pa cinco pagina so pa dia, bo por lesa e Bijbel completo den un aña.

10. (a) Ki ora bo ta lesa bo Bijbel? (b) Ken mas mester ta inclui den bo lesamento di Bijbel, y dicon regularidad ta importante?

¹⁰ Ki ora bo por lesa bo Bijbel? Si bo programa maske ta 10 pa 15 minuut pa dia pa haci esei, lo bo beneficia masha. Si esei no ta posibel, programa por lo menos cierto oranan fiho tur siman pa haci esei, anto tene bo na e programa ei. Si bo ta casa, abo cu bo casa por lesa Bijbel na bos halto pa otro. Boso lo disfruta di esei. Si bo tin yiu cu por lesa, nan cada un por haya un beurt pa lesa na bos halto. Lesamento di Bijbel mester ta un custumber di bida largo, mescos cu come cuminda. Manera bo sa, si un hende ta come malo, su salu ta bai atras. Asina tambe nos salu spiritual—y pues nos bida eterno—ta depende di si nos ta alimenta nos mes regularmente cu “tur palabra cu ta sali for di boca di Dios.”—Mateo 4:4.

Nos Meta

11. Kico mester ta nos meta ora di lesa Bijbel?

¹¹ Kico mester ta nos meta ora di lesa Bijbel? Nos meta no mester ta pa djis lesa un cierto cantidad di pagina. Nos motivacion mester ta pa conoce Dios miho ya asina nos por haya mas amor p’e y ador’e aceptablemente. (Huan 5:39-42) Nos actitud mester ta manera esun di e escritor biblico cu a bisa: “Haci mi conoce bo camindanan, o SEÑOR; siña mi bo bereanan.”—Salmo 25:4.

12. (a) Dicon ta necesario pa nos gana “conocemento berdadero”, y ora di lesa ki esfuerso nos tin cu haci kisas pa por haya e conocemento ei? (b) Cua ta e cuater angulonan cu nos por uza pa analisa di un forma probechoso loke nos ta lesa den Bijbel? (Wak e cuadro na pagina 30.) (c) Duna ehempel di e puntonan aki door di contesta e siguiente preguntanan cu tin den e paragraf aki. Busca e textonan menciona cu no ta cita.

¹² Segun cu nos ta ricibi siñansa for di Yehova, nos deseo mester ta pa gana “conocemento berdadero” of exacto. Sin esei, con nos por aplica e Palabra di Dios debidamente den nos bida of splic’e corectamente na otro hende? (Colosencenan 3:10; 2 Timoteo 2:15) Pa gana conocemento exacto nos tin cu lesa cu sumo cuidou y atencion, y si un parti ta dificil pa comprende, kisas nos tin cu les’e mas cu un biaha pa por capta su sentido. Tambe nos lo beneficia si nos tuma tempo pa medita riba e informacion, pensando riba dje for di varios angulo. Na pagina 30 tin cuater manera balioso di rasona cu por yuda nos analisa loke nos ta lesa. Nos por analisa hopi parti di e Scritura di un forma probechoso uzando un of mas di e angulonan aki. Segun cu bo ta contesta e preguntanan riba e siguiente paginanan, lo bo mira con esaki ta e caso.

(1) Hopi bes e parti di e Scritura cu bo ta lesando por bisa bo algo tocante e clase di persona cu Yehova ta. Por ehempel, na Salmo 139:13 y 14, nos ta siña di Dios su gran interes den yiu cu no a nace ainda: “Bo a weef mi, forma mi den bariga di mi mama. Mi ta alaba bo, pasobra mi ta traha na un manera temerosamente maravioso; maravioso ta bo obranan, y mi alma sa esei masha bon.” Esta maravioso Yehova su obranan di creacion ta! E manera cu hende ta traha ta duna testimonio di su gran amor pa nos.

En bista di loke Huan 14:9 y 10 ta bisa, ora nos lesa con Hesus a trata otro hende, en realidad nos ta mirando con Yehova mes lo a actua. Cu esei na mente, kico nos por conclui tocante Yehova for di e sucesonan cu ta para skirbi na Lucas 5:12 y 13 y Lucas 7:11-15?

(2) Considera con e relato ta conecta cu e tema di Bijbel: vindicacion di Yehova su derecho di goberna como esun supremo y santificacion di su nomber mediante e Reino den man di Hesucristo, e Simiña priminti.

Con Ezekiel y Daniel a enfatisa e tema di Bijbel? (Ezekiel 38:21-23; Daniel 2:44; 4:17; 7:9-14)

Con Bijbel ta mustra bon cla cu ta Hesus ta e Simiña priminti? (Galationan 3:16)

Con Revelacion ta describi e gran culminacion di e tema di Reino? (Revelacion 11:15; 12:7-10; 17:16-18; 19:11-16; 20:1-3; 21:1-5)

(3) Puntra bo mes con abo personalmente por aplica loke bo ta lesando. Por ehempel, nos ta lesa den Exodo te cu Deuteronomio tocante e inmoralidad y rebeldia di Israel. Nos ta siña cu e actitudnan y accionnan ei tawatin mal consecuencia. Pues, esei mester motiva nos pa agrada Yehova door di no imita e mal ehempel di Israel. “E cosnan aki a sosode cu nan como un ehempel, y nan a wordo skirbi como un spiertamento pa nos, riba kendenan e finnan di e siglonan a bin.”—1 Corintionan 10:11.

E relato caminda Cain a mata Abel ta contene ki les pa nos? (Genesis 4:3-12; Hebreonan 11:4; 1 Huan 3:10-15; 4:20, 21)

E conseho biblico pa Cristiannan cu tin e speransa di bai shelo ta aplica tambe na esnan cu tin e speransa di bida eterno riba tera? (Numbernan 15:16; Huan 10:16)

Maske nos tin un bon reputacion den e congregacion Cristian, dicon nos tin cu considera con pa aplica mas cabalmente e conseho biblico cu nos sa caba? (2 Corintionan 13:5; 1 Tesalonicencenan 4:1)

(4) Pensa con bo por uza loke bo ta lesando pa yuda otro hende. Tur hende ta precupa cu problema di salu, pues nos por lesa pa nan e cosnan cu Hesus a haci pa demostra loke lo e haci ora e ta goberna como Rei poderoso den e Reino di Dios: “Multitudnan grandi a bin cerca dje, y a trece hunto cu nan esnan cu tawata lam, mancaron, ciego, mudo, y hopi otronan, . . . y e tawata cura nan.”—Mateo 15:30.

Ken lo bo por yuda cu e relato di e resureccion di e yiu mohe di Yairo? (Lucas 8:41, 42, 49-56)

13. Ki resultadonan nos por spera di un programa continuo di lesa y studia Bijbel hunto cu Yehova su organisacion?

¹³ Lesamento di Bijbel lo duna nos hopi recompensa ora nos considera e cuater puntonan menciona ariba. Un cos ta sigur, ta un reto pa lesa Bijbel. Pero e por beneficia nos pa bida largo, pasobra segun cu nos ta lesa e Scritura, nos lo por comprende miho e asuntonan cu tin di aber cu Dios. Lesa Bijbel regularmente lo hala nos mas cerca di nos amoroso Tata, Yehova, y mas cerca di nos rumannan Cristian. Tambe lo e yuda nos obedece e conseho pa tene “duro na e palabra di bida.”—Filipencenan 2:16.

[Nota]

Como Repaso

• Dicon Bijbel a ser skirbi y conserva te den nos tempo?

• Con nos por yuda otro hende comprende y respeta Bijbel?

• Dicon ta probechoso pa lesa Bijbel personalmente y cu regularidad? Cua ta e cuater angulonan cu nos por uza pa analisa di un forma probechoso loke nos ta lesa den Bijbel?

[Kuadro/Plachi na pagina 30]

ORA BO LESA UN PARTI DI BIJBEL, CONSIDERA

Kico e ta bisa bo tocante e clase di persona cu Yehova ta

Con e ta conecta cu e tema general di Bijbel

Ki efecto e mester tin riba bo propio bida

Con bo por uz’e pa yuda otro hende