Capitulo Diesseis
“Keda Ferviente den Boso Amor pa Otro”
1. Kico hopi bes ta impresiona hende cu cuminsa asisti na e reunionnan di Testigonan di Yehova?
ORA hende cuminsa asisti na e reunionnan di Testigonan di Yehova, hopi bes nan ta keda impresiona cu e amor demostra einan. Nan ta mira e amor den e manera cu ta ricibi nan y den e compañerismo cariñoso. Hende cu bishita nos congresonan tambe ta ripara e amor aki. Un reportero a skirbi tocante nos congreso: ‘No tin hende droga ni burachi. Ningun bochincha ni gritamento. Ni pushamento ni stotmento. Ningun hende ta zundra ni papia palabra malo. No tin chiste sushi ni papiamento di disparate. Ningun hende ta huma. Ni horta. Ningun hende ta tira cup abou. Esei si tawata straño.’ Tur esaki ta prueba di amor, e clase di amor cu “no ta comporta su mes indecente; [cu] no ta busca su propio interes.”—1 Corintionan 13:4-8.
2. (a) Cu tempo, kico mester ta bisto en cuanto e amor cu nos ta demostra? (b) Imitando Cristo, ki clase di amor nos tin cu cultiva?
2 Amor fraternal ta e marca cu ta distingui Cristiannan berdadero. (Huan 13:35) Segun cu nos ta crece spiritualmente, nos ta siña expresa amor mas plenamente. Apostel Pablo a pidi den oracion pa e amor di Cristiannan “por abunda mas y mas ainda.” (Filipencenan 1:9) Apostel Huan a indica cu nos amor mester ta un amor di sacrificio propio. El a skirbi: “Na esaki nos conoce amor, cu [e Yiu di Dios] a entrega su bida pa nos; y nos mester entrega nos bida pa e rumannan.” (1 Huan 3:16; Huan 15:12, 13) Di berdad nos lo entrega nos bida pa nos rumannan? Aunke mayoria situacion no ta exigi esei, te na ki grado nos ta dispuesto pa haci un esfuerso extra pa yuda nan awor, asta ora esei no ta cumbini nos?
3. (a) Den ki manera nos lo por expresa nos amor mas plenamente? (b) Pakico ta vital pa nos keda ferviente den nos amor pa otro awor?
3 Hunto cu nos obranan cu ta refleha un actitud di sacrificio propio, nos mester tin un cariño sincero pa nos rumannan. E Palabra di Dios ta urgi nos: “Stima otro cu amor fraternal.” (Romanonan 12:10) Nos tur tin e amor ei pa algun hende. Pero nos lo por siña stima mas hende cu e cariño ei? Segun cu fin di e sistema bieu aki ta acerca, ta vital pa nos hala mas cerca di nos compañeronan Cristian. Bijbel ta bisa: “Fin di tur cos ta cerca; . . . Riba tur cos, keda ferviente den boso amor pa otro, pasobra amor ta cubri un multitud di pica.”—1 Pedro 4:7, 8.
Ora Surgi Problema
4. (a) Dicon por surgi problema entre miembronan di un congregacion? (b) Aunke no ta semper nos ta inclina na aplica e conseho di Bijbel, ki bon resultado nos por tin si nos hacie toch?
4 Pero tanten cu nos ta imperfecto, lo tin biaha cu nos ta haci cosnan cu ta ofende otro hende. Nos rumannan tambe por peca contra nos den varios manera. (1 Huan 1:8) Si bo haya bo den un situacion asina, kico bo mester haci? E Scritura ta duna e guia necesario. Pero loke e ta bisa podise no ta cuadra cu loke nos como hende imperfecto ta inclina na haci. (Romanonan 7:21-23) No obstante, si nos ta aplica cu empeño e conseho cu Bijbel ta contene, esei lo duna evidencia di nos deseo sinsero di agrada Yehova. Tambe esei lo mehora e calidad di nos amor pa otro hende.
5. Dicon nos no mester tuma vengansa si un hende ofende nos?
5 Tin biaha ora hende ta sinti nan ofendi, nan ta busca manera pa tuma vengansa contra esun cu a ofende nan. Pero ta piyo so esei ta haci e situacion. Si mester paga e hende bek, nos mester laga esei den man di Dios. (Proverbionan 24:29; Romanonan 12:17-21) Tin hende ta purba evita contacto cu esun cu a ofende nan. Pero nos no mester haci asina cu nos compañeronan di adoracion, pasobra amor pa nos rumannan ta un di e rekisitonan pa Dios acepta nos adoracion. (1 Huan 4:20) Pesei Pablo a skirbi: “Boso soporta otro y pordona otro, si un di boso tin un keho contra un otro; mescos cu Señor a pordona boso, asina boso tambe mester haci.” (Colosencenan 3:13) Abo por haci esei?
6. (a) Cuanto bes nos tin cu pordona nos ruman? (b) Kico nos tin cu reconoce tocante nos mes pa por trata cu un pica comete contra nos?
6 Kico si un persona ta peca cada bes contra nos, pero e no ta comete picanan serio pa cua nan por sac’e for di e congregacion? Pa picanan menor asina, apostel Pedro a sugeri pa pordona “te shete bes.” Pero Hesus a bisa: “No te shete bes, sino te setenta bes shete.” Cu un ilustracion el a enfatisa con grandi nos debe cerca Dios ta na comparacion cu loke cualkier hende por debe nos. (Mateo 18:21-35) Den hopi manera nos ta peca contra Dios tur dia, sin realisa mes cu nos ta pecando—tin biaha door di haci algo egoista, door di loke nos ta bisa of pensa, of door di loke nos ta keda sin haci. (Romanonan 3:23) Sinembargo, Dios ta sigui mustra misericordia na nos. (Salmo 103:10-14; 130:3, 4) E ta exigi pa nos ta mesun misericordioso cu otro hende. (Mateo 6:14, 15; Efesionan 4:1-3) E ora ei nos ta practica e clase di amor cu “no ta warda rencor.”—1 Corintionan 13:4, 5; 1 Pedro 3:8, 9.
7. Kico nos mester haci si un ruman tin algo contra nos?
7 Tin biaha nos ta realisa cu maske nos no tin rencor contra nos ruman, e si tin algo contra nos. Nos por scohe pa ‘cubri e pica cu amor’, manera 1 Pedro 4:8 ta sugeri. Of nos por tuma e iniciativa pa papia cu ne y purba trece pas bek den e relacion.—Mateo 5:23, 24.
8. Si un compañero di creencia ta haci algo cu ta irita nos, kico nos por haci al respecto?
8 Podise un compañero di creencia tin algo ta haci cu ta irita bo y tambe otro hende. Lo no ta bon pa papia cu ne? Kisas. Si abo personalmente splic’e e problema na un manera bondadoso, esaki por duna bon resultado. Pero prome bo tin cu puntra bo mes: ‘Di berdad e ta haciendo algo cu ta contra di loke Bijbel ta bisa? Of e problema ta sinta principalmente den e echo cu mi custumbernan y criansa ta diferente for di esnan di dje?’ Tene cuidou pa bo no fiha bo propio normanan anto husga hende segun esakinan. (Santiago 4:11, 12) Yehova ta acepta hende di tur sorto di antecedente sin haci distincion di persona, y e ta tene pasenshi cu nan segun cu nan ta crece spiritualmente.
9. (a) Ken ta duna atencion na casonan di malecho serio den e congregacion? (b) Ki ora ta e responsabilidad di e persona cu nan a peca contra di e pa e dal e prome paso, y cu ki meta?
9 Si un hende den congregacion ta envolvi den malecho serio, manera por ehempel inmoralidad, mester duna atencion mesora na esei. Ken mester duna e atencion ei? E ancianonan. (Santiago 5:14, 15) Sinembargo, si a comete un pica contra un persona, podise den un asunto di negoshi of un hende a papia algo perhudicial cu a ofende e persona aki, e persona cu nan a peca contra di e mester cuminsa na purba acerca den priva esun cu a ofend’e. (Mateo 18:15) Si esei no soluciona e asunto, mester dal mas paso, manera Mateo 18:16 y 17 ta describi. Amor pa nos ruman cu a faya y un deseo pa “gana” nos ruman, lo yuda nos haci esaki di un manera cu ta alcansa su curason.—Proverbionan 16:23.
10. Ora surgi un problema, kico lo yuda nos mira e asunto corectamente?
10 Ora surgi un problema, sea cu e ta grandi of chikito, nos lo beneficia si nos purba comprende con Yehova ta mir’e. E no ta aproba di ningun clase di pica, y na su debido tempo, e ta saca for di su organisacion tur hende cu ta practica pica sin repenti. Sinembargo, laga nos no lubida cu nos tur ta peca den maneranan menos serio y cu nos tin mester di Yehova su pasenshi y misericordia. Pues nos tin Yehova su ehempel pa imita ora nos ta confronta e picanan di otro hende. Ora nos mustra misericordia, nos ta refleha su amor.—Efesionan 5:1, 2.
Busca Maneranan pa ‘Hancha Nos Curason’
11. Dicon Pablo a anima e Corintionan pa ‘hancha nan curason’?
11 Pablo a pasa hopi luna fortaleciendo e congregacion na Corinto, Grecia. El a traha duro pa yuda e rumannan einan, y e tawata stima nan. Pero algun di nan no tawatin cariño p’e. Nan tawata masha critico. El a urgi nan pa ‘hancha nan curason’ pa expresa cariño. (2 Corintionan 6:11-13; 12:15) Ta bon pa nos cada un wak te na ki grado nos ta expresa amor na otro hende y busca maneranan pa hancha nos curason.—1 Huan 3:14.
12. Con nos amor pa tur hende den congregacion por crece?
12 Tin hende den congregacion cu nos ta haya ta dificil pa cera cu nan? Si nos haci extra esfuerso pa pasa por halto di cualkier diferencia di personalidad cu tin—manera nos lo kier pa nan haci cu nos—esaki por drecha nos relacion cu nan. Nos sintimentonan pa nan por drecha tambe si nos busca nan bon cualidadnan y concentra riba esakinan. Esaki sigur lo pone nos amor pa nan crece.—Lucas 6:32, 33, 36.
13. Con nos por hancha nos curason mas tanto pa mustra amor na esnan den nos congregacion?
13 Ta cierto cu tin limite na loke nos por haci pa otro hende. Kisas nos no por cuminda tur hende na tur reunion. Kisas no ta posibel pa nos inclui tur hende ora nos ta invita amigonan pa un comemento. Pero nos lo por hancha nos curason mas tanto door di tuma djis un par di minuut pa siña conoce un hende den nos congregacion mas miho? Nos lo por invita de bes en cuando un hende cu nos no conoce di e bon ei pa nos traha cu ne den sirbishi di veld?
14. Ora nos ta entre Cristiannan cu nunca nos no a topa, con nos por demostra amor ferviente pa otro?
14 Congresonan Cristian ta un bon oportunidad pa nos hancha nos curason pa demostra amor. Podise tin miles di hende presente. Nos no por cera conoci cu nan tur, pero nos por comporta nos mes di tal manera cu ta mustra cu nos ta pone nan bienestar prome cu nos cumbinencia. Entre e sesionnan, nos por demostra interes personal door di tuma iniciativa pa cera conoci cu algun hende rond di nos. Un dia, tur hende cu ta biba riba tera lo ta nos ruman, uni den adoracion di e Dios berdadero y Tata di nos tur. Ki un goso lo ta e ora ei pa siña conoce otro! Amor ferviente lo impulsa nos di kier haci esei. Dicon no cuminsa for di awor?
Como Repaso
• Ora surgi problema entre Cristiannan, con mester soluciona nan, y dicon?
• Den ki maneranan nos amor tambe mester crece pareu cu nos spiritualidad?
• Con ta posibel pa demostra amor ferviente na mas cu solamente un grupo intimo di amigo?
[Plachi na pagina 148]
Nos por demostra amor Cristian den hopi manera, por ehempel na reunionnan di congregacion