Capitulo Diesshete
Practica Debocion na Dios na Cas
1. Ki efecto e guia di e Palabra di Dios tawatin riba hopi matrimonio ora hende a aplic’e?
YEHOVA ta Esun cu a origina matrimonio, y su Palabra ta duna e miho guia pa famia. Hopi hende cu a aplica e guia ei tin un bon matrimonio awor. Ta di elogia tambe cu algun hende cu tawata djis biba hunto, a sinti nan motiva pa registra nan matrimonio legalmente. Otronan a stop di tene relacion sexual pafo di matrimonio. Hombernan violento cu tawata abusa di nan casa y yiunan, a siña demostra bondad y ternura.
2. Kico bida di famia Cristian ta encera?
2 Bida di famia Cristian ta encera hopi cos. Por ehempel, con nos ta mira e duracion di e union matrimonial, kico nos ta haci pa cumpli cu nos responsabilidadnan den famia y con nos ta trata miembronan di famia. (Efesionan 5:33–6:4) Tal bes nos sa bon bon kico Bijbel ta conseha tocante bida di famia, pero ta aplica ta e cos. Ningun di nos no kier ta manera e hendenan cu Hesus a condena pasobra nan tawata hala Dios su mandamentonan un banda. Nan a rasona ekibocadamente cu debocion religioso so tawata suficiente. (Mateo 15:4-9) Nos no kier duna e impresion di ta religioso, pero no ta demostra esei den nos mes famia. Al contrario, nos kier desplega berdadero debocion na Dios, locual ‘ta duna hopi beneficio.’—1 Timoteo 5:4; 6:6, SAB; 2 Timoteo 3:5.
Pa Cuanto Tempo e Matrimonio Lo Dura?
3. (a) Kico ta pasando cu hopi matrimonio, pero kico nos mester ta dicidido pa haci? (b) Uzando bo Bijbel, contesta e preguntanan na final di e paragraf aki.
3 Matrimonio a bira ta kibra masha lihe. Tin pareha cu tawata hunto pa añanan, ta dicidi di diborcia y casa cu otro hende. Ademas no ta straño tampoco pa tende cu parehanan jong a separa despues di tin poco tempo casa. Sin importa kico otro hende ta haci, nos si mester tin e deseo di agrada Yehova. Pesei laga nos considera e siguiente preguntanan y textonan biblico pa wak kico e Palabra di Dios ta bisa tocante e duracion di e union matrimonial.
Ora un homber y un mohe casa, pa cuanto tempo nan mester pensa di keda hunto? (Marco 10:6-9; Romanonan 7:2, 3)
Den bista di Dios, cua ta e unico base valido pa diborcia cu e posibilidad di bolbe casa? (Mateo 5:31, 32; 19:3-9)
Kico Yehova ta opina di diborcio cu su Palabra no ta autorisa? (Malakias 2:13-16)
Bijbel ta boga pa uza separacion como un medio pa soluciona problema matrimonial? (1 Corintionan 7:10-13)
Bou di ki sircunstancia un separacion lo por ta hustifica? (Salmo 11:5; Lucas 4:8; 1 Timoteo 5:8)
4. Kico ta pone cu algun matrimonio si ta dura?
4 Tin matrimonio ta bai bon, y e parehanan ta keda hunto. Con bini? Un factor importante ta cu e pareha ta warda pa casa te ora nan tur dos ta maduro. Pero un otro factor importante tambe ta pa haya un casa cu ta comparti bo interesnan y cu ken bo por papia abiertamente. Sinembargo, lo mas importante ta pa haya un casa cu ta stima Yehova y cu ta respeta su Palabra como e base pa atende problema. (Salmo 119:97, 104; 2 Timoteo 3:16, 17) Un persona asina lo no tin e actitud cu si cos no bai bon, e por separa of busca un diborcio. Lo e no uza e debilidadnan di su casa como un excuse pa keda sin cumpli cu su propio responsabilidadnan. Mas bien, lo e atende e problemanan cu surgi y purba haya solucionnan practico.
5. (a) Ki papel fieldad na Yehova ta hunga den un matrimonio? (b) Asta ora un Cristian ta haya oposicion di su casa, ki beneficionan e por haya door di cumpli cu e normanan di Yehova?
5 Segun Satanas, ora nos ta sufri nos lo bandona e normanan di Yehova. (Job 2:4, 5; Proverbionan 27:11) Pero e gran mayoria di Testigo di Yehova cu a sufri pasobra nan tin un casa cu ta opone nan, no a renuncia nan voto matrimonial. Nan ta sigui fiel na Yehova y na su mandamentonan. (Mateo 5:37) Algun di nan cu a persevera tawatin e goso di mira nan casa join nan den sirbi Yehova, asta despues di hopi aña di oposicion! (1 Pedro 3:1, 2) Tin Cristiannan kende nan casa no ta duna ningun indicacion di cambio of kende nan casa a bandona nan pasobra nan ta sirbi Yehova. Pero e Cristiannan aki tambe sa cu nan lo ser bendiciona ya cu nan a duna prueba di nan debocion na Dios den nan cas.—Salmo 55:22; 145:16.
Kada Ken Haci Su Parti
6. Ki areglo nos mester respeta pa nos por tin un bon matrimonio?
6 Ta claro cu pa nos tin un bon matrimonio esei ta exigi mas cu djis keda hunto. Un necesidad basico di parti di cada casa ta pa nan respeta Yehova su areglo di un cabes di famia. Esaki ta contribui na bon ordo y un sintimento di siguridad den e hogar. Na 1 Corintionan 11:3, nos ta lesa: “Cristo ta e cabes di tur homber, y e homber ta e cabes di e mohe, y Dios ta e cabes di Cristo.”
7. Con e esposo mester actua como cabes di famia?
7 Bo a ripara kico ta e prome cos cu e versiculo ta menciona? Si, tur homber tin un Cabes, Cristo, na ken nan mester somete nan mes. Esaki ta nifica cu e homber tin cu actua como cabes di famia di tal manera cu e ta refleha e cualidadnan di Hesus. Cristo ta somete su mes na Yehova, e stima e congregacion masha hopi y ta percura p’e. (1 Timoteo 3:15) El a asta “entrega su mes p’e.” Hesus no ta orguyoso ni sin consideracion, pero mas bien “manso y humilde di curason.” Esnan cu ta acept’e como nan cabes ta “haya sosiego pa [nan] alma.” Ora un esposo ta trata su famia den e manera aki, e ta mustra cu e ta somete su mes na Cristo. E ora ei un esposa Cristian lo ripara cu ta probechoso y refrescante pa copera cu nan casa y respet’e como cabes di famia.—Efesionan 5:25-33; Mateo 11:28, 29; Proverbionan 31:10, 28.
8. (a) Dicon por parce cu metodonan Cristian no ta duna e resultado desea den algun cas? (b) Kico nos mester haci si nos ta confronta un situacion asina?
8 Sinembargo, lo surgi problema. Kisas prome cu un miembro di e famia a cuminsa aplica principionan biblico, ya caba e otro miembronan tawatin e tendencia fuerte di nenga instruccion di otro hende. Por ta, ora bo haci peticion den un forma bondadoso y amoroso, ningun hende no ta haci caso. Nos sa cu Bijbel ta bisa pa nos kita “furia, rabia, griteria y calumnia.” (Efesionan 4:31) Pero kico bo mester haci si aparentemente algun miembro di famia no ta reacciona si no ta ora bo grita of rabia? Wel, Hesus no a imita esnan cu a menas’e y zundr’e, sino mas bien a confia den su Tata. (1 Pedro 2:22, 23) Pesei ora situacionnan cu ta causa tension surgi den cas, duna prueba di bo debocion na Dios door di pidi Yehova su yudansa den oracion, en bes di adopta e sistema di mundo.—Proverbionan 3:5-7.
9. En bes di piki pieu, kico hopi esposo Cristian a siña haci?
9 Cosnan no sa cambia mesora, pero e conseho di Bijbel realmente ta resulta eficas si nos aplic’e diligentemente y cu pasenshi. Hopi esposo a ripara cu nan matrimonio a cuminsa drecha ora nan a comprende con Cristo ta trata e congregacion. E congregacion ei no ta consisti di hende perfecto. Pero toch Hesus ta stim’e, e ta pone un bon ehempel p’e y ta uza e Scritura pa yud’e mehora. El a entrega su bida pa e congregacion. (1 Pedro 2:21) Hesus su ehempel a anima hopi esposo Cristian pa actua como bon cabes di famia y ofrece yudansa amoroso pa yuda drecha nan matrimonio. Esaki ta produci mas miho resultado cu ora e esposo ta piki pieu of ta nenga di papia.
10. (a) Den ki maneranan un esposo of esposa—asta uno cu ta bisa di ta un Cristian—por haci bida dificil pa otro hende den cas? (b) Kico un hende lo por haci pa mehora e situacion?
10 Pero kico si un esposo no ta conciente di e necesidadnan emocional di su famia, of no ta tuma e iniciativa pa haci areglo pa lesa y studia Bijbel ni pa haci otro actividadnan? Of kico si un esposa no ta copera ni demostra sumision na su casa? Tin famia ta haya bon resultado door di sinta hunto y papia den un forma respetuoso tocante e problemanan. (Genesis 21:10-12; Proverbionan 15:22) Pero asta si nos no haya tur e resultadonan cu nos a spera, cada un di nos por yuda drecha e ambiente na cas door di desplega Dios su fruta di spirito den tur aspecto di nos bida, demostrando consideracion amoroso pa otro miembronan di famia. (Galationan 5:22, 23) E situacion lo drecha, no door di warda pa e otro persona haci algo, sino door cu cada un di nos ta haci nos parti, demostrando asina cu nos ta practica debocion na Dios.—Colosencenan 3:18-21.
Unda pa Haya Contesta
11, 12. Kico Yehova a percura pa yuda nos haci bida di famia un exito?
11 Hende ta acudi na hopi fuente pa haya conseho tocante asunto di famia. Pero nos sa cu e Palabra di Dios ta contene e miho conseho, y nos ta gradicido cu mediante su organisacion visibel, Dios ta yuda nos aplic’e. Bo ta probecha plenamente di e yudansa ei?—Salmo 119:129, 130; Mikeas 4:2.
12 Fuera di asisti na reunionnan di congregacion, bo a aparta un ora fiho pa studia Bijbel como famia? Famianan cu haci esei por traha pa nan ta uni den nan adoracion. Nan bida di famia ta bira mas rico segun cu nan ta aplica e Palabra di Dios na nan propio sircunstancia.—Deuteronomio 11:18-21.
13. (a) Si nos tin pregunta riba asuntonan di famia, unda hopi bes nos por haya e yudansa necesario? (b) Kico mester keda refleha den tur decision cu nos tuma?
13 Kisas bo tin pregunta tocante asuntonan di famia. Por ehempel, kico di plania famia? Tin ocasion cu aborto ta hustifica? Si un yiu tin masha tiki interes den asuntonan spiritual, te na ki grado por exigi pa e participa cu e famia den adoracion? Literatura publica door di Testigonan di Yehova a trata hopi di e preguntanan ei. Siña uza publicacionnan cu ta yuda bo studia Bijbel, entre otro e indexnan, pa haya e contesta. Si bo no tin e publicacionnan cu e index ta referi na dje, chek e biblioteca den e Salon di Reino. Of podise bo tin acceso na e publicacionnan aki riba bo computer. Tambe bo por considera bo preguntanan cu Cristiannan maduro. Pero no spera cu semper bo ta haya un si of no riba tur pregunta. Hopi bes ta abo tin cu dicidi, sea personalmente of como pareha. Anto tuma decisionnan cu ta demostra cu bo ta practica debocion na Dios no solamente den publico, sino tambe na cas.—Romanonan 14:19; Efesionan 5:10.
Como Repaso
• Kico fieldad na Yehova tin di aber cu fieldad na bo casa?
• Kico lo yuda nos haci loke ta agrada Dios ora nos ta bou di presion debi na problemanan di famia?
• Asta si otro miembro di famia no ta cumpli cu nan parti, kico nos por haci pa drecha e situacion?
[Plachi na pagina 155]
E manera cu un esposo ta actua como cabes mester refleha e cualidadnan di Hesus
[Plachi na pagina 157]
Un studio di Bijbel regular cu e famia ta yuda trece union