Capitulo Bintiun

Yehova Su Proposito Ta Alcansa Exito Glorioso

1, 2. (a) Kico ta Yehova su proposito relaciona cu su criaturanan inteligente? (b) Ken a forma parti di Dios su famia uni di adorado?

YEHOVA su proposito ta pa tur criatura inteligente ta uni den adoracion di e unico Dios berdadero y pa nan tur disfruta di libertad glorioso como yiunan di Dios. Amante di husticia tambe ta desea esei sinceramente.

² Yehova a cuminsa cumpli cu e gran proposito aki ora El a cuminsa cu su obranan di creacion. Su prome creacion tawata un Yiu cu desde su resureccion ta “e resplandor di [Dios] su gloria y e representacion exacto di su naturalesa.” (Hebreonan 1:1-3) E Yiu aki tawata unico, ya cu ta Dios so a cre’e. Despues, tawata via e Yiu aki cu a crea tur otro cos: prome e angelnan den shelo, despues hende riba tera. (Job 38:7; Lucas 3:38) Tur e criaturanan aki a forma un solo famia universal. Pa nan tur, Yehova tawata Dios, e Soberano di universo, y nan Tata amoroso.

3. (a) Kico nos tur a hereda for di nos prome mayornan? (b) Ki areglo amoroso Yehova a haci pa Adam su desendientenan?

³ Ora Dios a sentencia nos prome mayornan humano na morto como pecador boluntario, El a saca nan for di Eden y a nenga nan como yiu. Nan no tawata forma parti mas di su famia universal. (Genesis 3:22-24; Deuteronomio 32:4, 5) Nos tur ta nan desendiente, pesei nos a nace cu e inclinacion pa haci pica. Pero Yehova tawata sa cu algun desendiente di Adam cu Eva lo stima husticia. Pesei amorosamente El a haci un areglo pa esakinan por a alcansa “e libertad glorioso di e yiunan di Dios.”—Romanonan 8:20, 21.

Israel Ta Perde Nan Posicion Privilegia

4. Ki privilegio Yehova a concede antiguo Israel?

⁴ Un 2.500 aña despues di creacion di Adam, Yehova a concede cierto hende e privilegio di tin un relacion special cu ne. El a scohe antiguo Israel pa ta su pueblo y a duna nan su Lei. (Genesis 12:1, 2) El a organisa nan como nacion y a uza nan en conexion cu su proposito. (Deuteronomio 14:1, 2; Isaias 43:1) Sinembargo, ainda nan tawata catibo di pica y morto, pues nan no a disfruta di e libertad glorioso cu Adam cu Eva tawatin originalmente.

5. Con e Israelitanan a perde nan posicion special cu Dios?

⁵ Pero toch e Israelitanan tawatin un posicion privilegia cerca Dios. Tambe nan tawatin e responsabilidad di respeta Yehova como nan Tata y traha na harmonia cu su proposito. Hesus a enfatisa e importancia di cumpli cu e obligacion ei. (Mateo 5:43-48) Sinembargo, e nacion di Israel no a haci esaki. Aunke e Hudiunan ei a pretende cu “nos tin un Tata, esta Dios”, Hesus a declara cu nan accionnan y e actitud cu nan a demostra a contradeci e palabranan ei. (Huan 8:41, 44, 47) Na aña 33 Era Comun, Dios a pone fin na e Lei y na su relacion special cu Israel. Pero esaki a nifica cu nunca mas hende lo por a disfruta di un relacion special cu Dios?

Reuniendo ‘Loke Ta den Shelo’

6. Kico ta e proposito di e “administracion” cu Pablo a menciona na Efesionan 1:9 y 10?

⁶ Apostel Pablo a mustra cu algun hende lo disfruta di un relacion special cu Dios. Por ehempel, Pablo a skirbi lo siguiente tocante e areglo cu Yehova a haci pa esnan cu eherce fe den Dje por bira miembro di Su cas: “[Dios] a haci conoci na nos e misterio di su boluntad, segun su bon intencion cu El a propone den su mes, pa, como preparacion [administracion, NW] di e cumplimento di e temponan, E reuni hunto tur cos den Cristo, tanto loke ta den e shelonan como loke ta riba tera.” (Efesionan 1:9, 10) E “administracion” aki ta drai rond di Hesucristo. Via dje, hende ta haya un condicion aproba dilanti Dios. Un cantidad limita di hende tin e speransa di bai biba den shelo. Un cantidad hopi mas grandi lo biba riba tera pa semper.

7. Ken ta “loke ta den e shelonan”?

⁷ Cuminsando prome na Pentecoste di aña 33 Era Comun, a duna atencion na “loke ta den e shelonan”, esta, esnan cu lo ta coheredero cu Cristo den e Reino celestial. A base di nan fe den e balor di e sacrificio di Hesus, Dios a declara nan husto. (Romanonan 5:1, 2) Cu tempo, e grupo ei a bin inclui Hudiu y hende cu no ta Hudiu, y “loke ta den e shelonan” lo a alcansa un cantidad di 144.000 persona. (Galationan 3:26-29; Revelacion 14:1) Ta un resto di nan so ta riba tera ainda.

Reuniendo “Loke Ta Riba Tera”

8. Ken ta “loke ta riba tera”, y ki relacion nan tin cu Yehova?

⁸ E mesun administracion ta reuniendo tambe “loke ta riba tera.” Miyones di hende ta ser reuni awor cu e speransa di biba pa semper riba tera. Den union cu e resto di herederonan di Reino, nan ta engrandece e nomber di Yehova y ta halsa su adoracion. (Isaias 2:2, 3; Sofonias 3:9) Nan tambe ta yama Yehova “Tata” pasobra nan ta reconoc’e como e fuente di bida. Y nan ta gosa di Dios su aprobacion a base di nan fe den Hesus su sanger drama. (Revelacion 7:9, 14) Pero como cu ainda nan ta imperfecto, ta den futuro nan lo ser reconoci plenamente como yiunan di Dios.

9. Ki promesa Romanonan 8:21 ta ofrece humanidad?

⁹ E hendenan aki cu tin speransa di biba riba tera, ansiosamente ta spera e tempo ora cu e creacion humano lo “wordo libra for di su sclabitud na corupcion.” (Romanonan 8:21) Nan liberacion lo cuminsa despues cu Cristo y su ehersito celestial finalisa e gran tribulacion cu lo culmina den Armagedon. Esaki lo nifica destruccion di henter e sistema di cosnan malbado di Satanas, sigui pa e bendicionnan di Cristo su Reinado di Mil Aña den poder di Reino.—Revelacion 19:17-21; 20:6.

10. Yehova su sirbidonan lo canta cua cantica di alabansa?

¹⁰ Esta emocionante lo ta ora e sirbidonan di Yehova riba tera uni pa ripiti e sintimentonan di su sirbidonan den shelo, kende cu goso ta proclama: “Grandi y maravioso bo obranan ta, o SEÑOR Dios Todopoderoso; husto y berdadero bo camindanan ta, Abo, Rei di e nacionnan. Ken lo no teme, o SEÑOR, y glorifica bo nomber? Pasobra Abo so ta santo; pasobra tur e nacionnan lo bin y adora bo dilanti; pasobra bo obranan husto a wordo revela.” (Revelacion 15:3, 4) Si, tur sirbido di Yehova lo uni den adoracion di e unico Dios berdadero. Asta e mortonan lo resucita y haya e oportunidad di uni nan bos den alabansa na Yehova.—Echonan 24:15.

Libertad Maravioso den Futuro

11. Ki libertad maravioso hende cu sobrevivi e gran tribulacion lo tin?

¹¹ Despues cu e gran tribulacion, cu lo culmina den Armagedon, a limpia mundo di maldad, Satanas e Diabel lo no ta “dios di e mundo aki” mas. Adoradonan di Yehova lo no tin cu lucha mas contra Satanas su mal influencia. (2 Corintionan 4:4; Revelacion 20:1, 2) Religion falso lo no duna informacion robes tocante Yehova mas ni lo no sirbi como un influencia cu ta causa desunion den sociedad humano. Sirbidonan di e Dios berdadero lo no sufri di inhusticia mas ni di abuso na man di autoridadnan humano. Ki un libertad maravioso nan lo tin!

12. Con tur hende lo libra di pica y su efectonan?

¹² Hesus, como “e Lamchi di Dios cu ta kita pica di mundo”, lo aplica e balor di su sacrificio y asina anula pica di humanidad. (Huan 1:29) Tempo Hesus tawata riba tera y a pordona e picanan di un persona, el a cura e persona ei como prueba di esaki. (Mateo 9:1-7; 15:30, 31) Di igual manera Cristo Hesus, como Rei celestial di e Reino di Dios, milagrosamente lo cura hende ciego, mudo, sordo, mancaron, mentalmente aflihi y esnan cu tin cualkier otro malesa. (Revelacion 21:3, 4) E “lei di pica” di tur hende obediente lo ser anula, di manera cu nan pensamentonan y accionnan lo agrada nan mes y tambe Dios. (Romanonan 7:21-23) Pa fin di e Mil Aña, nan lo a alcansa perfeccion humano, den e ‘imagen y semehansa’ di e unico Dios berdadero.—Genesis 1:26.

13. Ki accion Cristo lo tuma na fin di e Reinado di Mil Aña, y cu ki resultado?

¹³ Despues cu Cristo hiba humanidad na perfeccion, lo e duna su Tata e autoridad bek cu el a ricibi pa haci e trabou aki: “E ta entrega e reino na Dios Tata, ora cu el a pone un fin na tur dominio y na tur autoridad y poder. Pasobra e mester reina te ora cu [Dios] a pone tur su enemigonan bou di su pia.” (1 Corintionan 15:24, 25) E Reinado di Mil Aña di e Reino lo a cumpli cabalmente cu su proposito; pesei lo no ta necesario mas pa e gobierno ausiliar aki keda entre Yehova y humanidad. Y ya cu pica y morto a keda completamente elimina y humanidad ta rescata, no tin mester di Hesus mas como Rescatador. Bijbel ta splica: “E ora ei e Yiu mes tambe lo wordo someti na Esun, kende a somete tur cos na dje, pa Dios por ta tur den tur.”—1 Corintionan 15:28.

14. Hende perfecto lo ser somete na kico, y dicon?

¹⁴ Despues di esaki, humanidad perfecto lo haya e chens di demostra cu nan ta scohe pa sirbi e unico Dios berdadero pa semper. Pesei, prome cu Yehova adopta nan completamente como su yiu, lo E somete tur hende perfecto na un prueba final. Lo E los Satanas y su demoñonan for di abismo. Esaki lo no resulta den ningun daño permanente pa esnan cu di berdad stima Yehova. Pero ken cu ta infiel y cu ta laga Satanas hiba nan na desobedece Yehova lo ser destrui pa semper, hunto cu e rebelde original y su demoñonan.—Revelacion 20:7-10.

15. Ki situacion lo bolbe existi entre tur Yehova su criaturanan inteligente?

¹⁵ E ora ei Yehova lo adopta como su yiu tur hende perfecto cu a sostene Dios su gobernacion supremo durante e prueba final ei. For di e tempo ei padilanti, nan lo gosa plenamente di e libertad glorioso di e yiunan di Dios como parti di Dios su famia universal. Tur criatura inteligente den shelo y riba tera lo ta uni un bes mas den adoracion di e unico Dios berdadero. Yehova su proposito lo a alcansa exito glorioso! Abo kier ta parti di e famia felis, eterno y universal ei? Si ta asina, nos ta anima bo pa tuma na pecho loke Bijbel ta bisa na 1 Huan 2:17: “Mundo ta pasa bai y su deseonan tambe, ma esun cu haci e boluntad di Dios ta permanece pa semper.”

Como Repaso

• Prome cu e rebelion den Eden, ki relacion tur adorado di Yehova tawatin cu ne?

• Ki responsabilidad hende cu ta sirbi Dios tin?

• Ken mas lo bira yiu di Dios, y con esaki ta relaciona cu e proposito di Yehova pa loke ta adoracion uni?

[Plachi na pagina 190]

Hende obediente lo gosa di bida den un paradijs mundial