Unda Bo Por Haya Consuelo

BO SA sinti bo tristo, of, bo sa sinti bo so?— Bo sa puntra bo mes si tin hende cu ta stima bo?— Tin mucha sa sinti asina. Pero Dios ta priminti nos: “Ami si lo no lubida bo.” (Isaias 49:15) Bo no ta haya e cos ei hopi bunita pa pensa ariba?— Si, Yehova Dios ta stima nos masha hopi mes!

Un di e hendenan cu a skirbi Bijbel a bisa: ‘Maske mi tata y mi mama bandona mi, Señor lo tuma mi.’ (Salmo 27:10) Ta un gran consuelo pa sa e cos ei, no?— Si, Yehova ta bisa nos: “No tene miedo, pasobra mi ta cu bo; . . . si, lo mi sostene bo.”—Isaias 41:10.

Pero tin bes cu Yehova no ta stroba Satanas di trece problema pa nos. Yehova ta asta laga Satanas pone Su sirbidonan pasa den prueba. Un biaha, Diabel a pone Hesus sufri asina tanto cu Hesus a sclama na Yehova: “Mi Dios, mi Dios, pakico bo a bandona mi?” (Mateo 27:46) Pero maske Hesus tawata sufri, e tawata sa si cu Yehova ta stim’e. (Huan 10:17) Pero Hesus tawata sa tambe cu Dios ta laga Satanas pone Su sirbidonan pasa den prueba y haci nan sufri. Den un otro capitulo di e buki aki nos ta bai splica dicon Dios ta laga Satanas haci e cos ei.

Ora nos ta chikito ainda, tin bes ta dificil pa nos keda sin sinti miedo. Por ehempel, bo a yega di perde?— Anto bo a spanta?— Mayoria mucha lo spanta. Un dia e Gran Maestro a conta un cuenta tocante un chikitin cu a perde. Pero den su cuenta, no ta un mucha a perde. Ta un carne.

Abo ta un tiki manera un carne. Bo sa dicon? Wel, carne no ta hopi grandi ni nan no tin hopi forsa. Y nan tin mester di un hende pa percura pa nan y proteha nan. E hende cu ta percura pa nan yama wardado of cuidado di carne.

Den su cuenta Hesus a conta di un cuidado di carne cu tawatin shen carne. Pero un dia un di e carnenan a perde. Kisas el a bai na otro banda di sero pa wak ta kico tin. Pero sin cu e carne a ripara, el a cana bai leu for di e otronan. Bo por imagina bo con e carne a sinti ora el a bira wak rond anto mira cu e ta su so?—

Kico e cuidado di carne a haci ora el a haya sa cu falta un carne? Bo ta kere cu el a bisa cu ta e carne mes su falta, anto cu e no ta bai worry su cabes cu e cos ei? Of el a bai laga e 99 carnenan na un luga sigur, pa e bai busca esun cu a perde? Bo ta kere cu ta bale la pena pa pasa asina tanto trabou djis pa un carne so?— Si ta abo tawata e carne perdi ei, lo bo tawata kier pa e cuidado di carne bin busca bo?—

E cuidado di carne tawata stima tur su carnenan masha hopi; asta esun cu a perde. Pesei, el a bai busc’e. Imagina bo con contento e carne perdi a bira ora el a mira e cuidado di carne ta bin! Y Hesus a bisa cu e cuidado di carne tambe a bira contento ora el a haya su carne. E carne ei so a hacie mas contento cu tur e 99 otronan cu no a perde. Awor, ta ken ta manera e cuidado di carne den e cuenta di Hesus? Ta ken ta precupa pa nos mes hopi cu e cuidado di carne tawata precupa pa su bestianan?— Hesus a bisa cu ta su Tata den shelo. Y su Tata ta Yehova.

Yehova Dios ta e Gran Cuidado di su pueblo. E ta stima tur hende cu ta sirbie; mucha manera abo tambe. E no kier pa nada pasa ningun di nos, ni pa nos bai perdi. Si, ta dushi pa sa cu Dios ta stima nos asina tanto!—Mateo 18:12-14.

Abo ta sigur cu Yehova Dios ta existi?— Bo ta sinti cu e ta un persona real?— Ta berdad cu nos no por mira Yehova. Esei ta door cu e ta un Spirito. E curpa cu e tin ta invisibel pa nos wowo. Pero e ta un persona real si, y e por mira nos. E sa ora nos tin mester di yudansa. Y nos por papia cu ne den oracion mescos cu nos ta papia cu otro hende aki na tera. Ademas, Yehova kier pa nos papia cu ne.

Pesei, si un dia bo ta sinti bo tristo of bo so, kico bo mester haci?— Papia cu Yehova. Hala serca dje, y e lo consola bo y yuda bo. Corda cu Yehova ta stima bo, asta si bo ta sinti cu bo ta bo so. Laga nos coi nos Bijbel, anto lesa Salmo 23, cuminsando na versiculo 1. E ta bisa: “SEÑOR ta mi wardado, lo mi no tin falta di nada. E ta pone mi drumi den luganan di yerba berde; e ta hiba mi canto di awanan keto.”

Anto wak kico e salmo ta sigui bisa na versiculo 4: “Maske mi cana den e vaye di sombra di morto, mi no tin miedo di maldad, pasobra abo ta cu mi; bo bara y bo garoti ta consola mi.” Ta asina hende ta sinti si nan Dios ta Yehova. Ora nan ta den problema, nan ta haya consuelo. Ta asina abo tambe ta sinti?—

Mescos cu un wardado di carne ta percura cu amor pa su bestianan, asina Yehova ta percura bon pa su pueblo. E ta mustra nan unda nan mester bai, y nan ta cana contento su tras. Asta ora tin problema tur rond di nan, nan no tin nodi sinti miedo. Un cuidado di carne ta uza su bara y su garoti pa proteha su carnenan contra bestia cu por haci nan algo. Tempo David tawata un hoben, e tawata cuida carne, y Bijbel ta conta con el a yega di proteha su carnenan contra leon y beer. (1 Samuel 17:34-36) Y e pueblo di Dios sa cu Yehova ta proteha nan tambe. Nan por sinti nan trankil, pasobra Dios ta cu nan.

Yehova ta stima su carnenan hopi, y e ta percura pa nan cu hopi cariño. Bijbel ta bisa: ‘Manera un wardado di carne e lo cuida su mes carnenan. Lo e coi e lamchinan den su brasa.’—Isaias 40:11.

Bo no ta sinti contento di sa con Yehova ta?— Bo kier ta un di su carnenan?— Carne ta scucha stem di nan wardado. Nan ta keda serca di dje. Abo ta tende di Yehova?— Bo ta keda serca di dje?— E ora ei, bo no tin nodi sinti miedo nunca. Yehova lo ta cu bo.