Ken Ta Nos Rumannan?

UN DIA e Gran Maestro a puntra un cos hopi straño. El a puntra: “Ta ken ta mi mama y ta ken ta mi ruman hombernan?” (Mateo 12:48) Abo por contesta loke el a puntra?— Casi sigur bo sa cu mama di Hesus yama Maria. Pero bo sa con yama su ruman hombernan?— Y e tawatin ruman mohe tambe?—

Bijbel ta bisa cu e ruman hombernan di Hesus yama “Santiago y Hose y Simon y Hudas.” Y Hesus tawatin ruman mohe tambe na bida tempo cu e tawata predica. Hesus tawata e yiu mayo. Esei kiermen cu tur su rumannan tawata mas chikito cu ne.—Mateo 13:55, 56; Lucas 1:34, 35.

E rumannan di Hesus tambe tawata disipel di dje?— Bijbel ta bisa cu na cuminsamento nan “no tawata kere den dje.” (Huan 7:5) Pero despues si Santiago cu Hudas a bira su disipelnan, y nan a asta skirbi buki di Bijbel. Bo sa cua bukinan di Bijbel nan a skirbi?— Si, Santiago y Hudas.

Maske Bijbel no ta bisa nos con e ruman mohenan di Hesus tawata yama, nos sa cu e tawatin por lo menos dos. Pero por ta e tawatin mas. Su ruman mohenan a bira siguido di dje?— Nos no sa, pasobra Bijbel no ta bisa. Pero, bo sa ta dicon Hesus a puntra “Ta ken ta mi mama, y ta ken ta mi rumannan?”— Laga nos ban wak.

Ora Hesus tawata siñando su disipelnan, un hende a bira bis’e: “Ata bo mama y bo ruman hombernan para pafo y nan kier papia cu bo.” Hesus a probecha siña nan un les importante door di haci e pregunta straño ei: “Ta ken ta mi mama y ta ken ta mi ruman hombernan?” El a mustra riba su disipelnan, anto el a contesta cu un stem duro: “Ata mi mama y mi ruman hombernan!”

E ora ei Hesus a splica nan ta kico e kiermen. El a bisa: “Ken cu haci e boluntad di mi Tata cu ta den shelo, esei ta mi ruman homber y ruman mohe y mama.” (Mateo 12:47-50) Esei ta mustra cuanto Hesus tawata stima su disipelnan. Asina el a siña nos cu p’e, su disipelnan tawata echt manera ruman homber, ruman mohe y mama.

E tempo ei Santiago, Hose, Simon y Hudas, e rumannan mes di Hesus, no tawata kere cu Hesus ta Yiu di Dios. Parce cu nan no a kere loke angel Gabriel a bisa nan mama. (Lucas 1:30-33) Pesei, por ta cu nan a trata Hesus malo. Un hende cu ta haci asina no ta mustra cu e ta un ruman di berdad. Bo sa di un hende cu a trata su ruman malo?—

Bijbel ta conta nos di Yacob cu Esau, anto e ta splica con Esau a rabia asina tanto cu el a bisa: ‘Mi ta bai mata mi ruman Yacob.’ Rebeca nan mama a haya asina tanto miedo cu el a manda Yacob hui bai pa Esau no mat’e. (Genesis 27:41-46) Pero despues di hopi aña Esau a cambia, anto el a brasa Yacob y sunch’e.—Genesis 33:4.

Cu tempo Yacob a haya 12 yiu homber. Pero Jakob su yiunan mas grandi no a stima nan ruman chikito Hose. Nan tawata yalurs riba dje, pasobra e tawata e yiu preferi di nan tata. Pesei, nan a bend’e cu un par di hende cu ta haci negoshi cu catibo cu tawata riba caminda pa Egipto. Despues nan a bisa nan tata cu ta un bestia di mondi a mata Hose. (Genesis 37:23-36) Bo no ta haya cu e cos ei ta teribel?—

Despues Hose su rumannan a sinti duele di loke nan a haci. Pesei, Hose a pordona nan. Bo a mira con asina Hose tawata mescos cu Hesus?— Hesus su apostelnan a core bai lag’e ora e tawata den problema, y Pedro a asta nenga cu e conoc’e. Toch Hesus a pordona nan tur, mescos cu Hose a haci.

Tambe Bijbel ta conta nos di dos otro ruman, Cain cu Abel. For di nan tambe nos por siña un les. Dios a mira den Cain su curason cu e no tawata stima su ruman di berdad. Pesei Dios a bisa Cain cu e mester a cambia su manera. Si Cain a stima Dios di berdad, e lo a tende di dje. Pero e no a stima Dios. Un dia Cain a bisa Abel: ‘Ban den cunucu.’ Abel a bai cu Cain. Anto ora nan tawata nan so den cunucu, Cain a dal su ruman asina duro cu el a mat’e.—Genesis 4:2-8, BPK.

Bijbel ta bisa nos cu nos mester siña un les special for di e cos ei cu a pasa. Bo sa ki les esei ta?— ‘Esaki ta e mensahe cu boso a tende for di cuminsamento: Nos mester stima otro; no manera Cain, cu a bin di e malbado.’ Kiermen, rumannan mester stima otro. Nan no mester ta manera Cain.—1 Huan 3:11, 12.

Dicon ta malo si nos ta manera Cain?— Pasobra Bijbel ta bisa cu Cain a ‘bin di e malbado’, Satanas e Diabel. Cain a comporta su mes mescos cu Diabel. Pesei, ta como si fuera Diabel ta su tata.

Bo a mira dicon ta importante pa bo stima bo rumannan?— Si bo no stima nan, ta manera yiu di ken bo ta comporta bo?— Manera yiu di Diabel. Abo no kier ta yiu di Diabel, toch?— Awel, con bo por mustra cu bo kier ta un yiu di Dios?— Bo por hacie door di tin amor pa bo rumannan.

Pero kico ta amor?— Amor ta un sintimento fuerte den nos, cu ta pone nos haya gana di haci cos bon pa hende. Nos ta mustra cu nos tin amor pa hende door di tin cariño pa nan y haci cos bon pa nan. Y ta ken ta nos rumannan cu nos mester stima?— Corda cu Hesus a bisa cu nos mester stima nos rumannan cristian. Hunto nos ta forma un famia hopi grandi.

Con importante ta pa nos stima nos rumannan cristian?— Bijbel ta bisa: “Esun cu no ta stima su ruman cu el a mira, no por stima Dios, kende e no a mira.” (1 Huan 4:20) Esei kiermen cu nos no por stima djis un par di ruman di e famia cristian so. Nos tin cu stima nan tur. Hesus a bisa: “Na esaki tur hende lo sa cu boso ta mi disipel, si boso tin amor un pa otro.” (Huan 13:35) Abo ta stima tur e rumannan?— Corda cu si bo no ta stima nan tur, bo no por ta stima Dios.

Con nos por mustra cu di berdad nos ta stima nos rumannan?— Wel, si nos ta stima nan nos no ta keda leu for di nan pasobra nos no kier papia cu nan. Nos lo trata nan tur bon. Semper nos lo haci cos bon pa nan, y semper nos lo kier parti cos cu nan. Anto ora nan tin problema, nos ta yuda nan, pasobra nos ta manera un famia, un famia grandi.

Si di berdad nos ta stima tur nos rumannan, kico esei ta mustra?— E ta mustra cu nos ta disipel di Hesus e Gran Maestro. No ta esei mes nos kier?—