“Pa Boso No Cai Den Tentacion”

“Keda vigila y haci oracion, pa boso no cai den tentacion.”—MATEO 26:41.

E PRESION tawata intenso, distinto for di cualkier presion cu Hesucristo, e Yiu di Dios, a yega di experencia. Fin di su bida riba tera tawata serca. Hesus a realisa cu pronto nan lo a arest’e, conden’e na morto y clab’e na un staca di tormento. E tawata sa cu tur su decision- y accionnan lo a sea halsa of rebaha e nomber di su Tata. Tambe Hesus tawata sa cu humanidad su speransa pa bida den futuro tawata den wega. Confronta cu tur e presion aki, kico el a haci?

² Hesus a bai na e hofi di Getsemani cu su disipelnan. Esei tawata Hesus su luga preferi. Einan el a kita bai un distancia cortico for di su disipelnan. Ora e tawata su so, el a acudi na su Tata celestial pa haya fortalesa, y a expresa su sintimentonan di mas profundo den oracion ferviente, no un biaha sino tres biaha. Aunke Hesus tawata perfecto, toch e no a sinti cu e por a enfrenta e presion riba su mes forsa.—Mateo 26:36-44.

³ Awe, nos tambe ta bou di presion. Mas dilanti den e foyeto aki nos a considera prueba cu ta mustra cu nos ta bibando den e dianan final di e sistema malbado aki. Tentacion y presion di e mundo di Satanas ta bira mas y mas intenso. E decision- y accionnan di cualkier un di nos cu ta bisa cu nos ta sirbi e Dios berdadero, ta sea halsa of rebaha Dios su nomber y tin un efecto profundo riba nos speransa individual di haya bida den su mundo nobo. Nos stima Yehova. Nos kier “persevera te na fin”, sea ta fin di nos bida of fin di e sistema aki, esun cu bin prome. (Mateo 24:13) Pero con nos por sigui tene na mente cu e tempo ta urgente y keda vigila?

⁴ Hesus tawata sa cu su disipelnan tambe lo ta bou di presion—tanto den e tempo aya como awe—y pesei el a urgi: “Keda vigila y haci oracion, pa boso no cai den tentacion.” (Mateo 26:41) Kico e palabranan ei ta nifica pa nos awe? Ki tentacion abo ta confronta? Y con bo por “keda vigila”?

Tentacion pa Haci Kico?

⁵ Diariamente nos tur ta confronta e tentacion pa entrega na “e trampa di Diabel.” (2 Timoteo 2:26) Bijbel ta spierta nos cu Satanas ta mik specialmente riba adoradonan di Yehova. (1 Pedro 5:8; Revelacion 12:12, 17) Cu ki meta? No necesariamente pa kita nos bida. Satanas no ta gana nada si nos muri fiel na Dios. Satanas sa cu Yehova, na Su debido tempo, lo lanta hende for di morto.—Lucas 20:37, 38.

⁶ Satanas kier destrui un cos cu ta asta mas balioso cu nos bida actual, nos integridad na Dios. Satanas ta haci tur loke ta den su poder pa proba cu e por kita nos di adora Yehova. Pesei pa Satanas, si e por pone nos bira infiel—stop di predica e bon nobo of bandona normanan cristian—esei lo ta un victoria! (Efesionan 6:11-13) Pa e motibo ei “e Tentado” ta pone tentacion nos dilanti.—Mateo 4:3.

⁷ Satanas su “plannan engañoso” ta bin den varios forma. (Efesionan 6:11, Beibel na papiamentu koriente) Podise e ta tenta nos cu materialismo, miedo, duda of buscamento di placer. Pero un di su metodonan mas efectivo ta desanimacion. Siendo cu e ta un oportunista tramposo, e sa cu desanimacion por debilita nos spiritualmente y haci nos vulnerable pa tentacion. (Proverbionan 24:10) Pesei specialmente ora nos ta “masha kibra” emocionalmente, e ta tenta nos pa entrega.—Salmo 38:8.

⁸ Segun cu nos ta yega mas serca di e fin di e ultimo dianan, ta parce cu e cosnan cu ta causa desanimacion ta aumenta, y nos no ta immuun pa nan. (Wak e cuadro “Algun Factor Cu Ta Causa Desanimacion.”) Sea cual sea e causa, desanimacion por caba cu nos energia. Si bo ta fisicamente, mentalmente y emocionalmente agota, lo ta dificil pa ‘haci bon uzo di bo tempo’ pa cumpli cu obligacionnan spiritual, incluso pa studia Bijbel, asisti na reunionnan cristian y participa den sirbishi di veld. (Efesionan 5:15, 16) Corda cu Satanas, e Tentado, kier pa bo stop. Pero aworaki no ta tempo pa bo bai mas trankil of perde for di bista e urgencia di e tempo den cua nos ta biba! (Lucas 21:34-36) Con bo por resisti tentacion y keda vigila? Considera cuater sugerencia cu por yuda bo.

“Haci Oracion Continuamente”

⁹ Depende riba Yehova mediante oracion. Corda Hesus su ehempel den e hofi di Getsemani. Kico el a haci ora e tawata bou di tension emocional intenso? El a acudi na Yehova pa yudansa, haciendo oracion asina ferviente cu “su sodo a bira manera gotanan di sanger cu tawata cai abou na suela.” (Lucas 22:44) Pensa riba esei un rato. Hesus tawata conoce Satanas bon. Tempo cu Hesus tawata den shelo el a observa tur e tentacionnan cu Satanas a uza den su intento pa cohe sirbidonan di Dios den trampa. Y toch Hesus no a sinti cu facilmente lo e por a handle cualkier tentacion cu Satanas lo por a pone su dilanti. Si e Yiu perfecto di Dios a sinti e necesidad di haci oracion pa pidi yudansa y fortalesa dibino, cuanto mas nos mester haci esei!—1 Pedro 2:21.

¹⁰ Corda tambe cu despues di a urgi su disipelnan pa “haci oracion continuamente” [NW], Hesus a bisa: “E spirito ta boluntario, ma e carni ta debil.” (Mateo 26:41) Na ken su carni Hesus tawata referi? Ta sigur cu no tawata na esun di dje; no tawatin nada debil den su carni humano perfecto. (1 Pedro 2:22) Pero e situacion di su disipelnan tawata otro. Debi na imperfeccion hereda y inclinacionnan pecaminoso, nan specialmente lo tawatin mester di yudansa pa resisti tentacion. (Romanonan 7:21-24) Ta pesei el a urgi nan—y tur cristian berdadero despues di nan—pa haci oracion y pidi yudansa pa por enfrenta tentacion cu exito. (Mateo 6:13) Yehova ta contesta e tipo di oracionnan ei. (Salmo 65:2) Con? Den por lo menos dos manera.

¹¹ Na prome luga, Dios ta yuda nos reconoce tentacion. Satanas su tentacionnan ta manera trampa cu tin plama riba un caminda scur. Si bo no mira nan, bo por cai den nan. Mediante Bijbel y publicacionnan basa riba Bijbel, Yehova ta yuda hende mira e trampanan di Satanas, y asina ta haci posibel cu nos por evita di entrega na tentacion. Atrabes di añanan, literatura y programanan di congreso y asamblea bes tras bes a spierta nos pa peligernan manera miedo di hende, inmoralidad sexual, materialismo y otro tentacionnan satanico. (Proverbionan 29:25; 1 Corintionan 10:8-11; 1 Timoteo 6:9, 10) Bo no ta gradicido na Yehova cu e ta spierta nos pa e trikinan di Satanas? (2 Corintionan 2:11) Tur e spiertamentonan ei ta un contesta riba bo oracionnan den cua bo ta pidi yudansa pa resisti tentacion.

¹² Na di dos luga, Yehova ta contesta nos oracionnan door di duna nos e fortalesa pa soporta tentacion. Su Palabra ta bisa: “Dios . . . lo no permiti pa boso wordo tenta mas cu boso por soporta, ma hunto cu e tentacion e lo provee salida tambe.” (1 Corintionan 10:13) Basta nos sigui depende riba Dios, nunca lo e permiti un tentacion bira asina aplastante cu nos lo no tin e fortalesa spiritual pa resistie. Con Dios ta “provee salida” pa nos? E ta “duna e spirito santo na esnan cu pidie.” (Lucas 11:13) E spirito ei lo por yuda nos corda riba principionan biblico cu por fortalece nos determinacion pa haci loke ta corecto y por yuda nos tuma decisionnan sabi. (Huan 14:26; Santiago 1:5, 6) Tambe spirito santo por yuda nos desplega precis e cualidadnan cu nos tin mester pa nos por vence mal inclinacion. (Galationan 5:22, 23) Dios su spirito por asta motiva nos compañeronan den fe pa bira “un encurashamento” pa nos. (Colosensenan 4:11) Bo no ta gradicido cu Yehova ta reacciona na maneranan asina amoroso riba bo peticionnan pa yudansa?

Sea Realistico den Bo Expectativanan

¹³ Pa keda vigila, nos mester ta realistico den nos expectativanan. Debi na e presionnan di bida, nos tur ta cansa tin ora. Pero nos tin cu corda cu Dios nunca a priminti cu nos lo tin un bida sin problema den e sistema bieu aki. Asta den tempo biblico, sirbidonan di Dios a confronta calamidad, incluso persecucion, pobresa, depresion y enfermedad.—Echonan 8:1; 2 Corintionan 8:1, 2; 1 Tesalonicensenan 5:14; 1 Timoteo 5:23.

¹⁴ Awe tambe nos tin nos problemanan. Podise nos ta confronta persecucion, precupacionnan financiero, nos ta lucha cu depresion, ta bira malo y ta sufri den otro maneranan. Si Yehova lo mester a proteha nos milagrosamente di tur daño, esei lo no a duna Satanas un base pa reprocha Yehova? (Proverbionan 27:11) Yehova ta permiti su sirbidonan ser tenta y poni na prueba, den algun caso asta te na morto prematuro na man di opositor.—Huan 16:2.

¹⁵ Pero ta kico Yehova a priminti anto? Manera nos a menciona anteriormente, el a priminti cu lo e yuda nos pa nos por resisti cualkier tentacion cu nos topa cu ne, basta cu nos ta confia den dje plenamente. (Proverbionan 3:5, 6) Mediante su Palabra, su spirito y su organisacion, e ta proteha nos spiritualmente, y ta yuda nos conserva nos relacion cu ne. Si e relacion ei keda intacto nos ta sali gana, asta si nos muri. Nada—ni sikiera morto—no por stroba Dios di recompensa su sirbidonan fiel. (Hebreonan 11:6) Y den e mundo nobo cu awor ta serca, Yehova sigur lo cumpli cu e resto di su maraviyoso promesanan di trece bendicion pa esnan cu ta stim’e.—Salmo 145:16.

Corda e Cuestionnan Envolvi

¹⁶ Pa persevera te na fin, nos tin cu corda riba e cuestionnan sumamente importante cu ta envolvi den e echo cu Dios a permiti maldad. Si nos problemanan tin biaha ta parce aplastante y nos ta sinti gana di stop di sirbi Dios, nos mester recorda nos mes cu Satanas a cuestiona Yehova su derecho di goberna como Soberano di universo. Tambe Satanas a cuestiona e debocion y integridad di e adoradonan di Dios. (Job 1:8-11; 2:3, 4) E cuestionnan ei y e manera cu Yehova a scohe pa resolve nan ta mas importante cu nos propio bida. Con asina?

¹⁷ E echo cu temporalmente Dios a permiti sufrimento, a duna otro hende tempo pa acepta e berdad. Pensa un rato riba esaki: Hesus a sufri pa asina nos por haya bida. (Huan 3:16) Nos no ta gradicido pa esei? Pero nos ta dispuesto pa soporta sufrimento pa un poco tempo mas ya asina mas hende lo por gana bida? Pa persevera te na fin, nos tin cu reconoce cu Yehova su sabiduria ta hopi mas grandi cu di nos. (Isaias 55:9) Yehova lo caba cu maldad na e tempo cu ta mas miho pa resolve e cuestionnan pa semper y cu ta na nos bienestar eterno. En realidad, lo por tin un miho manera pa haci esei? No tin inhusticia serca Dios!—Romanonan 9:14-24.

“Hala Serca Dios”

¹⁸ Pa mantene nos sentido di urgencia, nos mester keda serca di Yehova. No lubida nunca cu Satanas ta haci tur loke ta den su poder pa destrui nos bon relacion cu Yehova. Satanas lo kier pa nos kere cu e fin lo no bin nunca y cu no ta bale la pena predica e bon nobo of biba segun normanan biblico. Pero e “ta un gañado y e tata di mentira.” (Huan 8:44) Nos mester ta determina pa “resisti Diabel.” Nos relacion cu Yehova ta algo cu nunca nos mester considera como di poco balor. Amorosamente Bijbel ta urgi nos: “Hala serca Dios y e lo hala serca boso.” (Santiago 4:7, 8) Con bo por hala mas serca di Yehova?

¹⁹ Meditacion acompaña cu oracion ta sumamente importante. Ora cu presionnan di bida ta parce aplastante, expresa bo sintimentonan di mas profundo na Yehova. Mas spesifico bo ta, mas facil lo ta pa bo mira su contesta riba bo peticionnan. E contesta kisas no ta semper precis loke bo tawatin na mente, pero si bo deseo ta pa honra Dios y mantene integridad, lo e percura e yudansa cu bo mester pa asina bo por persevera cu exito. (1 Huan 5:14) Segun cu bo ta mira su guia den bo bida, lo bo hala mas serca dje. Tambe ta esencial pa bo lesa y medita riba Yehova su cualidadnan y camindanan cu Bijbel ta revela. E tipo di meditacion ei ta yuda bo conoce Yehova miho; e ta conmove bo curason y ta profundisa bo amor p’e. (Salmo 19:14) Y ta e amor ei, mas cu tur otro cos, lo yuda bo resisti tentacion y keda vigila.—1 Huan 5:3.

²⁰ Pa keda serca di Yehova, ta importante tambe pa nos keda serca di nos compañeronan den fe. E seccion final di e foyeto aki lo considera e punto aki.

PREGUNTANAN DI STUDIO

• Kico Hesus a haci ora cu e tawata bou di presion extremo na final di su bida, y kico el a urgi su disipelnan pa haci? (Par. 1-4)

• Dicon Satanas ta mik riba e adoradonan di Yehova, y den ki maneranan e ta tenta nos? (Par. 5-8)

• Pa por resisti tentacion, dicon nos tin cu haci oracion continuamente (Par. 9-12), ser realistico den nos expectativanan (Par. 13-15), corda riba e cuestionnan envolvi (Par. 16-17) y “hala serca Dios” (Par. 18-20)?

[Cuadro na pagina 25]

Algun Factor Cu Ta Causa Desanimacion

Salu of edad avansa. Si nos ta sufri di malesa cronico of si edad avansa ta restringi nos, nos lo por bira deprimi pasobra nos no por haci mas tanto den nos sirbishi na Dios.—Hebreonan 6:10.

Decepcion. Nos por bira desanima si tin masha tiki reaccion positivo riba nos esfuerso pa predica e Palabra di Dios.—Proverbionan 13:12.

Sintimento di no tin balor. Un persona cu sufri maltrato pa hopi aña, por bira combenci cu ningun hende no ta stim’e, ni sikiera Yehova.—1 Huan 3:19, 20.

Dolor emocional. Si un hende ser ofendi profundamente door di un compañero den fe, lo e por bira asina desanima cu e ta sinti gana di stop di asisti na reunionnan cristian of di participa den sirbishi di veld.—Lucas 17:1.

Persecucion. Otro hende cu no ta di bo religion kisas ta bai contra bo, ta persigui bo of haci bofon di bo.—2 Timoteo 3:12; 2 Pedro 3:3, 4.

[Komentario di e plachi na página 26]

Hesus a urgi nos pa “haci oracion continuamente” y asina pidi yudansa pa lucha contra tentacion