Dicon Nos Mester Respeta Autoridad?

1, 2. (a) Ki lucha nos tin relaciona cu autoridad? (b) Ki preguntanan nos lo trata?

BO A yega di wak con un mucha chikito ta reacciona ora cu su tata of su mama pidie haci algo cu e no tin gana di haci? Bo por mira na su cara cu e ta den un dilema. E ta tende e stem di su mayor y sa cu e tin cu respeta su autoridad. Pero e biaha aki, gewoon e no tin gana di obedece. Su lucha ta ilustra algo cu de bes en cuando ta pasa cu nos tur.

² No ta semper facil pa nos respeta autoridad. Abo a yega di tin problema pa respeta personanan cu tin un grado di autoridad riba bo? Wel, bo no ta e unico. Nos ta biba den un tempo cu aparentemente tin menos respet pa autoridad cu antes. Sinembargo, Bijbel ta bisa cu nos tin cu mustra respet pa hende cu tin autoridad. (Proverbionan 24:21) De echo, ta sumamente importante pa nos haci esey si nos kier keda den e amor di Dios. Esaki ta lanta algun pregunta. Dicon ta asina dificil pa nos respeta autoridad? Dicon Jehova ta rekeri esaki di nos, y kico lo yuda nos obedec’e? Por ultimo, cua ta algun manera cu nos por mustra respet pa autoridad?

DICON NO TA FACIL PA RESPETA AUTORIDAD?

3, 4. Con pica y imperfeccion a cuminsa, y con nos naturaleza pecaminoso ta stroba nos di respeta autoridad?

³ Laga nos considera brevemente dos motibo dicon ta asina dificil pa nos respeta hende cu tin autoridad. Di prome, nos ta imperfecto, y di dos, e hendenan cu ta eherce autoridad tambe ta imperfecto. Pica y imperfeccion a cuminsa hopi tempo pasa ora Adam cu Eva a rebela contra e autoridad di Dios den e hofi di Eden. Pues, pica a cuminsa cu rebelion. Y te awe nos ta nace cu e tendencia di rebela.​—Genesis 2:​15-17; 3:​1-7; Salmo 51:5; Romanonan 5:12.

⁴ Debi na nos naturaleza pecaminoso, mayoria di nos facilmente por bira orguyoso y arogante. Ma di otro banda, nos tin cu traha duro pa desaroya y mantene humildad. Hasta despues di sirbi Dios fielmente pa hopi aña, nos por bira cabesura y orguyoso. Tuma por ehempel Core, kende a biba den tempo di Moises. El a sostene e pueblo di Dios fielmente durante hopi dificultad. Sinembargo, el a cuminsa anhela mas autoridad y tabatin e tribilidad di encabesa un rebelion contra Moises, e homber mas manso di e tempo ey. (Numbernan 12:3; 16:​1-3) Pensa tambe riba Rey Uzias; su orguyo a pon’e drenta e tempel di Jehova y efectua un tarea sagrado cu sacerdote so tabatin mag di haci. (2 Cronicanan 26:​16-21) E dos hombernan ey a paga caro pa nan rebelion. Pero nan mal ehempel ta un bon recor­datorio pa nos tur. Nos tin cu lucha contra orguyo, pasobra ta bira dificil pa nos respeta autoridad si nos tin e actitud ey.

5. Con hende imperfecto a abusa di nan autoridad?

⁵ Di otro banda, ta hende imperfecto den puesto di autoridad mes a pone cu ta reina un falta di respet pa autoridad. Hopi di nan tabata cruel, abusado of dictatorial. De echo, historia humano ta basicamente un relato di abuso di poder. (Eclesiastes 8:9) Por ehempel, Saul tabata un bon hende, un homber humilde, ora cu Jehova a scog’e pa bira rey. Ma el a laga orguyo y envidia domin’e y a persigui fiel ­David. (1 Samuel 9:​20, 21; 10:​20-22; 18:​7-11) Mas despues, David a bira un di e mihor reynan cu Israel tabatin. Sinembargo, el a abusa di su poder ora cu el a drumi cu e ­esposa di Urias, e Heteo, y despues a manda e homber inocente ey den e fila mas dilanti di bataya pa nan mat’e. (2 Samuel 11:​1-17) Pues, ta bisto cu debi na imperfeccion ta dificil pa hende uza e poder cu nan tin na un manera corecto. Anto esey ta bira pio ora esnan na poder no ta respeta Jehova. Despues cu un politico Britanico a describi e manera cu algun papa catolico a start cu un persecucion na gran escala, el a skirbi: “Poder tin tendencia di corumpi, y poder absoluto ta corumpi na un grado absoluto.” En bista cu a traves di historia hende a abusa di nan autoridad, kisas nos ta puntra nos mes: Dicon nos mester respeta autoridad?

DICON NOS MESTER RESPETA AUTORIDAD?

6, 7. (a) Kico nos amor pa Jehova ta motiva nos pa haci, y dicon? (b) Con nos ta demostra un actitud sumiso?

⁶ E tres motibonan principal pa respeta autoridad ta motiva pa amor: amor pa Jehova, pa nos prohimo y pa nos mes. E prome motibo ta cu nos ta stima Jehova mas cu tur cos; pues, nos kier haci su curason contento. (Proverbionan 27:11; Marco 12:​29, 30) Nos sa cu Jehova su soberania, es decir, su derecho di goberna e universo, a ser cuestiona riba tera desde e rebelion den Eden. Nos a siña tambe cu gran parti di humanidad a tuma parti pa Satanas y a rechasa e gobernacion di Jehova. Pero, pa loke ta nos, gustosamente nos ta scoge pa apoya e soberania di Jehova. Pesey nos ta sinti nos masha conmovi ora nos lesa e palabranan cu ta proclama e grandeza di Jehova na Revelacion 4:11. Pa nos ta bisto cu Jehova ta e Gobernante legitimo di uni­verso! Di henter nos curason nos ta apoya su soberania y ta acepta p’e dirigi nos den nos bida diario.

⁷ Awor, respeta Jehova ta nifica mas cu obedec’e so. Nos ta cla pa haci loke e ta bisa nos pasobra nos ta stim’e. Ma lo tin biaha cu, mescos cu e mucha menciona na principio, ta masha dificil pa nos obedec’e. Na e ocasionnan ey, nos lo tin cu siña mustra sumision. Nos ta corda cu Hesus a obedece su Tata, hasta ora tabata parce masha dificil pa e haci esey. El a bisa Jehova: “No laga mi boluntad, sino di bo sosode.”​—Lucas 22:42.

8. (a) Sumision na e autoridad di Jehova ta encera kico awe, y kico Jehova ta pensa di esaki? (b) Kico por yuda nos scucha conseho y acepta disciplina? (Wak e cuadro “Scucha Conseho y Acepta Disciplina.”)

⁸ Claro cu awe Jehova no ta papia cu cada un di nos directamente; e ta uza su Palabra y su representantenan riba tera. Pues, mayoria di biaha nos ta mustra sumision na e autoridad di Jehova ora nos ta respeta e hendenan cu el a pone, of ta permiti keda, den puesto di autoridad. Nos lo ofende Dios si nos mester rebela contra e personanan ey, por ehempel, ora nos ta nenga di acepta nan conseho y coreccion biblico. Ora e Israelitanan a murmura y rebela contra Moises, Jehova a considera esey un atake contra dje personalmente.​—Numbernan 14:​26, 27.

9. Dicon nos amor pa prohimo lo motiva nos pa respeta autoridad? Duna un ehempel.

⁹ E di dos motibo pakico nos ta mustra respet pa autoridad ta pasobra nos ta stima nos prohimo. Pa compronde esey mihor, imagina cu bo ta un soldaat. Pa e ehercito por tin exito, y hasta sobrevivi, cada soldaat mester coopera cu e cadena di mando, obedec’e y respet’e. Si bo rebela contra e autoridad di e organisacion ey, bo por debilit’e y pone bida di tur e otro soldaatnan na peliger. Ta berdad cu ehercitonan humano ta causa daño y destruccion teribel den e mundo djawe, pero Jehova tin ehercito cu ta haci bon so. Bijbel ta referi cientos di biaha na Dios como “Jehova di ehercitonan.” (Romanonan 9:29) E ta e Comandante di un cantidad inmenso di criatura spiritual poderoso. Jehova ta compara su sirbidornan riba tera tambe cu un ehercito. (Salmo 68:11; Ezekiel 37:​1-10) Awor, kico lo pasa si nos rebela contra e hendenan cu Jehova a encarga cu autoridad? Nos lo no ta poniendo bida di nos compañeronan na peliger? Kiermen, ora un cristian rebela contra e ancianonan nombra, otro rumannan den congregacion tambe por ser perhudica. (1 Corintionan 12:​14, 25, 26) Mescos ta pasa ora cu un yiu tin un actitud rebelde; henter e famia ta sufri. Pues, nos ta demostra nos amor pa prohimo ora nos ta respeta esnan cu tin autoridad y ta coopera cu nan.

10, 11. Kico mas ta motiva nos pa obedece autoridad?

¹⁰ E di tres motibo pakico nos ta respeta autoridad ta pasobra esey ta pa nos mes bon. Por lo general, ora Jehova pidi nos respeta autoridad, e ta bisa nos tambe kico ta e beneficionan di esey. Por ehempel, e ta bisa yiunan obedece nan mayornan pa nan por tin un bida largo y feliz. (Deuteronomio 5:16; Efesionan 6:​2, 3) E ta bisa nos respeta e ancianonan di congregacion, pasobra si nos no haci esey, nos lo daña nos relacion cu Jehova. (Hebreonan 13:​7, 17) Y e ta bisa nos obedece autoridad gubernamental, pasobra esey lo ta un proteccion pa nos.​—Romanonan 13:4.

¹¹ Bo no ta haya cu ta mas facil pa nos respeta autoridad ora nos sa dicon Jehova kier pa nos ta obediente? Pues, laga nos ban wak con nos por mustra respet pa autoridad den tres area importante di bida.

RESPET DEN FAMIA

12. Ki responsabilidad Jehova a duna esposo, y con e por cumpli cu ne?

¹² Ta Jehova ta e Creador di famia. Como Dios di orden, el a indica bon cla con un famia mester ta organisa pa e por funciona bon. (1 Corintionan 14:33) El a duna esposo autoridad pa actua como cabes di famia. E esposo ta mustra respet pa Cristo Hesus, kende ta su Cabes, imitando e manera cu Hesus a eherce su autoridad como cabes riba e congregacion. (Efesionan 5:23) Pues, un esposo no mester huy pa su debernan, sino mas bien, asumi su responsabilidad manera un berdadero homber. Tampoco e no mester trata su esposa y su yiunan cu severidad ni manera un ­dictador. Al contrario, e mester ta cariñoso, bondadoso y rasonabel. E tin cu corda cu su autoridad tin limite y ta semper inferior na e autoridad di Jehova.

13. Con un esposa por cumpli cu su responsabilidad na un manera cu ta agrada Jehova?

¹³ Un esposa mester actua como ayudante di su esposo. E tambe a ricibi autoridad den e famia, pasobra Bijbel ta bisa yiunan pa nan ‘no bandona e siñansa [of, “ley”, NW] di nan mama.’ (Proverbionan 1:8) Claro cu e no tin mas autoridad cu su esposo. Un esposa cristian ta mustra respet pa e autoridad di su casa door di yud’e cumpli cu su papel como cabes di famia. E no ta menosprecia su esposo ni manipul’e ni tuma su puesto. Mas bien, e ta apoy’e y coopera cu ne. Ora e no ta di acuerdo cu e decisionnan di su esposo, e por expresa su punto di bista na un manera respetuoso y toch keda sumiso. Si su esposo no ta creyente, lo e por hay’e cu situacionnan dificil. Pero asina mes, si e esposa respeta su autoridad, e esposo lo por dicidi di busca Jehova.​—1 Pedro 3:1.

14. Con yiunan por haci curason di tanto nan mayornan como di Jehova contento?

¹⁴ Yiunan ta haci Jehova su curason contento ora nan ta obedece nan mama cu nan tata. Ademas, esey ta honra nan mayornan y ta haci nan curason tambe contento. (Proverbionan 10:1) Den famianan di un solo mayor, yiunan ta aplica e mesun principio di obediencia, sabiendo cu nan mayor tin hasta mas mester di nan apoyo y cooperacion. Famianan den cua tur miembro ta cumpli cu e papel cu Dios a duna nan ta gosa di paz y felicidad. Esaki ta honra Jehova Dios, e Creador di tur famia.​—Efesionan 3:​14, 15.

RESPET DEN CONGREGACION

15. (a) Con nos por mustra den congregacion cu nos ta respeta e autoridad di Jehova? (b) Ki principionan por yuda nos obedece e rumannan cu ta dirigi e congregacion? (Wak e cuadro “Obedece Esnan Cu Ta Dirigi Boso.”)

¹⁵ Jehova a nombra su Yiu como Cabes di e congregacion cristian. (Colosensenan 1:13) Anto Hesus, na su turno, a asigna su “esclavo fiel y prudente” pa atende e necesidadnan spiritual di e pueblo di Dios riba tera. (Mateo 24:​45-47) Anto tin un directiva, e Cuerpo Gobernante di Testigonan di Jehova, cu ta representa e “esclavo” ey. Mescos cu den e congregacion cristian di prome siglo, ancianonan ta ricibi instruccion y conseho for di e Cuerpo Gobernante, sea via carta of via su representantenan, entre nan, e superintendentenan biahero. Ora nos ta respeta e autoridad di e ancianonan cristian, ta Jehova nos ta obedece.​—Hebreonan 13:17.

16. Den ki sentido anciano ta ser nombra pa spirito santo?

¹⁶ E anciano- y sirbidornan ministerial no ta perfecto. Mescos cu nos, nan tambe tin nan imperfeccionnan. Pero asina mes, nan ta “regalo den forma di hende” cu Jehova a percura pa yuda e congregacion keda spiritualmente fuerte. (Efesionan 4:8) Anciano ta ser nombra pa spirito santo. (Echonan 20:28) Con asina? Na prome luga, e hombernan ey tin cu cumpli prome cu cierto rekisito cu e Palabra inspira di Dios ta menciona. (1 Timoteo 3:​1-7, 12; Tito 1:​5-9) Na di dos luga, e ancianonan cu ta evalua si un ruman ta cumpli cu e rekisitonan ey ta pidi Jehova sinceramente pa guia nan pa medio di su spirito santo.

17. Dicon muhernan cristian tin biaha ta tapa nan cabes ora nan ta haci cierto actividad den congregacion?

¹⁷ Den congregacion tin varios tarea cu por lo general ta na encargo di anciano y sirbidor ministerial, por ehempel, dirigi e reunion pa sirbishi di veld. Kico si ningun di nan ta disponibel pa haci esey? Den casonan asina, un otro ruman homber batisa por hacie. Si no tin ningun ruman homber disponibel, e ora ey un ruman muher capacita por hacie. Sinembargo, ora un hende muher ta efectua un tarea cu normalmente un hende homber batisa mester haci, e tin cu tapa su cabes.a (1 Corintionan 11:​3-10) E rekisito aki no ta rebaha hende muher. Mas bien, e ta duna nan un oportunidad pa demostra respet pa e structura cu Jehova a establece den famia y den congregacion.

RESPET PA AUTORIDAD GUBERNAMENTAL

18, 19. (a) Con lo bo splica e principionan menciona na Romanonan 13:​1-7? (b) Con nos ta mustra respet pa autoridad gubernamental?

¹⁸ Cristiannan berdadero ta haci esfuerso diligente pa sigui e principionan menciona na Romanonan 13:​1-7. Segun cu bo ta lesa e textonan ey, bo por mira cu e ta papia di “autoridadnan superior”, esta, di e gobiernonan. Jehova ta permiti nan existi pa nan por efectua algun funcion importante, manera mantene un cierto grado di orden y percura servicionan necesario. Con nos ta mustra respet pa e auto­ridadnan aki? Door di obedece nan leynan. Pues, nos ta percura pa paga tur belasting cu nos debe, yena tur formulario of documento cu nan ta pidi y cumpli cu tur ley cu ta aplica na nos, na nos famia, negoshi of propiedad. Ma nos no ta obedece autoridad gubernamental ora nan ta manda nos desobedece Dios. Den tal caso, nos ta contesta nan mescos cu e apostelnan di antiguedad: “Nos tin cu obedece Dios na prome luga, y no hende.”​—Echonan 5:​28, 29; wak e cuadro “Ken Su Autoridad Mi Mester Obedece?”

¹⁹ Otro forma di mustra respet pa autoridad gubernamental ta pa medio di nos actitud. Tin biaha, nos tin cu atende un asunto directamente cu funcionarionan di gobierno. Por ehempel, apostel Pablo a papia cu gobernan­tenan ­manera Rey Herodes Agripa y Gobernador ­Festo. E hombernan aki tabatin defectonan grave, pero Pablo a papia cu nan cu respet. (Echonan 26:​2, 25) Nos ta imita e ehempel di ­Pablo, sea cu e funcionario ta un gobernante poderoso of un agente policial. Na scol, hobennan cristian ta haci esfuerso pa mustra tal respet tambe na nan maestronan y na cualkier otro empleado di scol. Claro cu nos no ta respeta solamente hende cu ta simpatisa cu nos creencianan, sino tambe hende cu ta contra Testigonan di Jehova. Pues, tur hende cu no ta comparti nos fe lo mester por mira cu nos ta respetuoso.​—Romanonan 12:​17, 18; 1 Pedro 3:15.

20, 21. Menciona algun beneficio cu nos ta ricibi ora nos mustra e debido respet pa autoridad.

²⁰ Apostel Pedro a skirbi: “Honra tur sorto di hende.” (1 Pedro 2:17) Si, laga nos semper mustra respet sincero pa otro hende. Hopi hende ta keda masha impresiona ora nan ripara cu nos ta trata nan cu berdadero respet. No lubida cu respet ta birando mas y mas scars. Ora nos ta mustra respet, nos ta obedece e siguiente mandamento di Hesus: “Laga boso luz briya dilanti di hende, pa asina nan por mira boso obranan excelente y duna gloria na boso Tata cu ta den cielo.”​—Mateo 5:16.

²¹ Den e mundo djawe, hende humilde ta sinti nan atrai na e berdad tocante Dios. Ora nos ta mustra respet den famia, den congregacion y den asuntonan gubernamental, esey por atrae algun di nan y motiva nan pa adora Dios hunto cu nos. Esey si lo ta maraviyoso! Hasta si esey no sosode, un cos ta sigur: Nos respet pa hende ta agrada Jehova Dios y ta yuda nos keda den su amor. Ki recompensa mas grandi por tin cu esey?