Con Bo Por Keda Separa for di Mundo?

1. Kico Hesus a enfatisa durante su ultimo anochi como hende riba tera?

DURANTE Hesus su ultimo anochi como hende riba tera, el a expresa su preocupacion pa e futuro di su siguidornan. El a hasta haci oracion tocante e asunto, bisando su Tata: “Mi no ta pidi bo pa saca nan for di mundo, ma pa bo proteha nan pa motibo di e Malbado. Nan no ta parti di mundo, mescos cu ami no ta parti di mundo.” (Juan 17:15, 16) Cu e peticion sincero aki, Hesus a demostra cuanto e tabata stima su discipelnan y tambe con importante e palabranan cu el a bisa algun di nan mas prome tabata, esta: “Boso no ta parti di mundo.” (Juan 15:19) Claramente, pa Hesus tabata masha importante pa su siguidornan keda separa for di mundo!

2. Di cua “mundo” Hesus a papia?

² E “mundo” cu Hesus a papia di dje ta referi na tur hende aleha for di Dios y domina pa Satanas y pa e spirito egoista y orguyoso cu e ta contagia hende cu ne. (Juan 14:30; Efesionan 2:2; 1 Juan 5:19) Ta pesey Bijbel ta bisa: “Amistad cu mundo ta enemistad cu Dios.” (Santiago 4:4) Pero, con nos cu kier keda den e amor di Dios por biba den mundo y toch keda separa for di dje? Tin cinco cos cu por yuda nos: (1) keda neutral den asunto politico y keda leal na e Reino di Dios, (2) resisti e spirito di mundo, (3) ser modesto den nos forma di bisti y den nos apariencia, (4) mantene nos wowo simpel y (5) bisti e armadura spiritual. Laga nos analisa nan un pa un.

KEDA NEUTRAL Y KEDA LEAL NA E REINO

3. (a) Dicon Hesus no a mete den asunto politico di su tempo? (b) Dicon nos por bisa cu Hesus su siguidornan ungi ta sirbi como embahador? (Inclui nota.)

³ Hesus no a mete den asunto politico di su tempo; mas bien, el a enfoca riba predicacion di e Reino di Dios, e futuro gobierno celestial di cua e lo ta Rey. (Daniel 7:13, 14; Lucas 4:43; 17:20, 21) Pesey e por a bisa ora e tabata dilanti di e Gobernador Romano Poncio Pilato cu su “reino no ta parti di e mundo aki.” (Juan 18:36) Cristo su siguidornan fiel ta keda leal na dje y ta imita su ehempel kedando leal na e Reino di Dios y anunciando e Reino ey rond mundo. (Mateo 24:14) Apostel Pablo a skirbi: “Nos ta embahador den nomber di Cristo . . . Pues, como substituto di Cristo, nos ta roga hende: ‘Reconcilia cu Dios.’”a—2 Corintionan 5:20.

4. Di ki manera cristian berdadero semper a demostra nan lealtad na e Reino di Dios? (Wak e cuadro “E prome cristiannan A Keda Neutral.”)

⁴ Un embahador ta representa un pais of soberano den exterior. Pues, e no ta mete den asunto interno di e pais caminda e ta sirbi; e ta keda neutral. Sinembargo, e ta promove e interesnan di e gobierno di e pais cu e ta representa. Mescos ta e caso cu e discipelnan ungi di Cristo, kende nan “ciudadania ta den cielo.” (Filipensenan 3:20) Nan predicacion entusiasma di e Reino a yuda miyones di e ‘otro carnenan’ di Cristo “reconcilia cu Dios.” (Juan 10:16; Mateo 25:31-40) E otro carnenan aki tambe ta representa e Reino, ya cu nan ta apoya e rumannan ungi di Hesus. Como un tou uni cu ta promove e Reino Mesianico, ambos grupo ta keda estrictamente neutral den asunto politico di mundo.—Isaias 2:2-4.

5. Menciona un otro motibo pakico cristian berdadero ta neutral.

⁵ Lealtad na Cristo no ta e unico motibo pakico cristian berdadero ta keda neutral. Pa cuminsa, e Israelitanan di antiguedad tabata biba den un pais so, ma nos awe ta forma parti di un hermandad cu ta bin di tur nacion. (Mateo 28:19; 1 Pedro 2:9) Pesey, kico lo pasa si nos join un partido politico? Wel, nos lo pone nos union cristian na peliger y tambe nos lo no por papia cu frankesa ora nos predica e mensahe di Reino. (1 Corintionan 1:10) Ademas, den tempo di guera, nos lo haya nos ta bringa contra nos rumannan den fe, kendenan nos tin cu stima. (Juan 13:34, 35; 1 Juan 3:10-12) Cu bon motibo anto, Hesus a bisa su discipelnan pa no uza spada. Hasta el a bisa nan pa stima nan enemigonan!—Mateo 5:44; 26:52; wak e cuadro “Ami Ta Neutral?”

6. Ki efecto bo dedicacion na Dios tin riba bo relacion cu Cesar?

⁶ Como cristian berdadero, nos a dedica nos bida na Dios, no na ningun hende ni organisacion humano ni nacion. Segun 1 Corintionan 6:19 y 20: “Boso no ta pertenece na boso mes: Dios a cumpra boso pa un prijs halto.” Pues, aunke siguidornan di Hesus ta duna Cesar loke e tin derecho riba dje—honor, belasting y sumision te na e grado cu Dios ta permiti Cesar exigi esey—nan deber principal ta pa duna “Dios loke ta di Dios.” (Marco 12:17; Romanonan 13:1-7) E cosnan cu “ta di Dios” ta entre otro nan adoracion, nan amor di henter alma y nan obediencia y lealtad. Si ta necesario, nan ta dispuesto pa entrega nan bida pa Dios.—Lucas 4:8; 10:27; Echonan 5:29; Romanonan 14:8.

RESISTI “E SPIRITO DI MUNDO”

7, 8. Kico ta “e spirito di mundo”, y con e spirito ey ta “obra” den un persona?

⁷ Un otro manera cu cristiannan ta keda separa for di mundo ta ora nan ta resisti su spirito malbado. Pablo a skirbi: “Nos a acepta e spirito cu ta bin di Dios—no e spirito di mundo.” (1 Corintionan 2:12) El a bisa e Efesionan: “Boso un tempo tabata cana segun . . . e mundo aki, segun e gobernante di e autoridad di aire, e spirito cu awor ta obra den e yiunan di desobediencia.”—Efesionan 2:2, 3.

⁸ Kico ta e “aire”, of e spirito, di mundo? Esey ta e forsa invisibel cu ta influencia hende pa haci malo. Con? E ta instiga nan pa desobedece Dios y ta fomenta e ‘deseo di carni y deseo di wowo.’ (1 Juan 2:16; 1 Timoteo 6:9, 10) Dicon e spirito ey tin e “autoridad” of poder aki riba mundo? Pasobra e ta atrae e carni pecaminoso, e ta dificil pa reconoc’e y e ta eherce un influencia constante cu ta penetra tur caminda mescos cu “aire.” Ademas, e ta “obra” den un persona door di desaroya gradualmente cualidadnan anticristian, manera egoismo, arogancia, ambicion y e actitud di independencia moral y rebeldia.b Simplemente bisa, e spirito di mundo pocopoco ta laga e caracteristicanan di Diabel crece den un hende su curason.—Juan 8:44; Echonan 13:10; 1 Juan 3:8, 10.

9. Menciona algun manera cu e spirito di mundo por drenta nos mente y curason.

⁹ Acaso e spirito di mundo por cria raiz den bo mente y curason? Si, pero solamente si bo no keda alerta. (Proverbionan 4:23) Hopi biaha e influencia di e spirito malbado ey ta cuminsa sin cu bo ta ripara. Por ehempel, bo ta cuminsa anda cu personanan cu por parce bon hende, pero cu en realidad, no ta stima Jehova. (Proverbionan 13:20; 1 Corintionan 15:33) Bo por absorba e spirito ey tambe via literatura cuestionabel, websitenan pornografico of apostata, diberticion cu no ta sano y deportenan sumamente competitivo; cu poco palabra, via cualkier persona of cos cu ta transmiti e manera di pensa di Satanas of di su mundo.

10. Con nos por resisti e spirito di mundo?

¹⁰ Con nos por resisti e spirito peligroso ey di mundo y keda den e amor di Dios? Solamente si nos probecha plenamente di e medionan cu Jehova a pone disponibel pa fortalece nos spiritualidad—manera su Palabra, e reunionnan, etcetera—y si nos pidie constantemente pa duna nos su spirito santo. Jehova ta hopi mas poderoso cu Diabel y su mundo malbado. (1 Juan 4:4) Pues, ta masha importante pa nos keda cerca di Jehova mediante oracion!

SEA MODESTO DEN NOS FORMA DI BISTI Y DEN NOS APARIENCIA

11. Con e spirito di mundo a influencia e normanan di bistimento?

¹¹ Bo por mira na un hende su forma di bisti, na su apariencia y na su higiena ki spirito ta impuls’e. Na hopi pais, e normanan di bistimento a bay asina tanto atras cu un comentarista di television a bisa cu aki poco dia no ta resta nada pa e prostitutanan bisti pa nan hala atencion. Hasta mucha muher cu no ta teenager ainda ta sigui e forma di bisti aki, cu un corant a describi como “hopi sunu y nada di modestia.” Tambe ta hopi popular pa bisti con cu ta, na un manera slons cu ta refleha un actitud rebelde y tambe falta di dignidad y respet propio.

12, 13. Cua ta e principionan cu mester guia nos den bistimento y cuido di nos apariencia?

¹² Como sirbidor di Jehova ta logico cu nos kier tin un bon apariencia, locual ta nifica bisti paña nechi, limpi, di bon gusto y apropia pa cada ocasion. Nos apariencia semper mester refleha “modestia y sano huicio”, locual hunto cu “bon obra” ta pas pa tur hende “cu ta bisa cu nan ta devoto na Dios”, tanto hende homber como hende muher. Claro cu nos preocupacion principal no mester ta pa hala atencion na nos mes, sino pa “keda den e amor di Dios.” (1 Timoteo 2:9, 10; Judas 21) De echo, nos adorno di mas bunita mester ta ‘e hende cu nos ta di paden, loke ta di gran balor den bista di Dios.’—1 Pedro 3:3, 4.

¹³ Corda tambe cu nos forma di bisti y e manera cu nos ta cuida nos apariencia por influencia e manera cu otro hende ta mira adoracion berdadero. Ora uza e palabra Griego traduci como “modestia” den sentido moral, e ta expresa e idea di respet y admiracion pa sintimento y opinion di otro hende. Pues, nos ta haci bon di considera e consenshi di otro hende mas importante cu e derechonan cu nos ta pensa cu nos tin en conexion cu e manera cu nos kier bisti. Mas cu tur cos, nos kier honra Jehova y su pueblo y recomenda nos mes como sirbidor di Dios, si, nos kier “haci tur cos pa e gloria di Dios.”—1 Corintionan 4:9; 10:31; 2 Corintionan 6:3, 4; 7:1.

14. Relaciona cu nos apariencia y higiena, kico nos mester puntra nos mes?

¹⁴ Nos forma di bisti, e cuido di nos apariencia y nos higiena ta hasta mas importante ainda ora nos ta den sirbishi di veld of na un reunion cristian. Puntra bo mes: ‘Mi apariencia y higiena personal ta hala atencion? Mi ta pone hende su cara na berguensa? Kico ta mas importante pa mi: mi derecho den e asuntonan aki of cumpli cu e rekisitonan pa por ricibi privilegio den congregacion?’—Salmo 68:6; Filipensenan 4:5; 1 Pedro 5:6.

15. Dicon e Palabra di Dios no ta duna un lista di regla tocante bistimento, cuido di apariencia y higiena?

¹⁵ Bijbel no ta duna un lista di regla tocante bistimento, higiena y cuido di apariencia. Dicon no? Pasobra Jehova no tin intencion di kita nos libertad di scoge y di pensa pa nos mes. Al contrario, e kier pa nos bira hende madura cu por rasona riba principio di Bijbel y kende “a uza nan capacidad di compronde y asina a entrena esaki pa distingui loke ta bon for di loke ta malo.” (Hebreonan 5:14) Es mas, e kier pa nos laga amor guia nos, si, amor pa Dios y pa prohimo. (Marco 12:30, 31) Denter di e limitenan ey, por tin un variedad amplio di style di bisti y manera di cuida apariencia. Na cualkier reunion grandi di e pueblo di Jehova na mundo, nos por mira cantidad di ruman contento, bisti na tur color.

MANTENE BO WOWO “SIMPEL”

16. Con e spirito di mundo ta contrario na e siñansa di Hesus, y kico nos mester puntra nos mes?

¹⁶ E spirito di mundo ta engañoso y ta motiva miyones di hende pa busca felicidad den placa y cos material. Sinembargo, Hesus a bisa: “Hasta ora un hende tin na abundancia, su bida no ta depende di loke e tin.” (Lucas 12:15) Hesus no a aproba e estilo di bida extremo di priva bo mes di tur placer y luho. Pero el a siña hende si cu “esnan cu ta consciente di nan necesidad spiritual” y esnan cu mantene un wowo “simpel” lo haya berdadero felicidad. (Mateo 5:3; 6:22, 23) Puntra bo mes: ‘Di berdad mi ta kere loke Hesus a siña hende, of mi ta bou di influencia di e “tata di mentira”? (Juan 8:44) Kico mi palabranan, mi metanan, mi prioridadnan y mi manera di biba ta revela?’—Lucas 6:45; 21:34-36; 2 Juan 6.

17. Menciona algun beneficio cu esnan cu ta mantene un wowo simpel ta ricibi.

¹⁷ Hesus a bisa: “Sabiduria ta demostra pa medio di su obranan cu e ta husto.” (Mateo 11:19) Laga nos considera algun beneficio cu esnan cu ta mantene un wowo simpel ta ricibi. Pa cuminsa, nan ta haya berdadero alivio den e sirbishi di Reino. (Mateo 11:29, 30) Ademas, nan ta scapa di hopi inkietud, angustia y dolor. (1 Timoteo 6:9, 10) Y como cu nan ta keda contento cu loke nan tin, nan tin mas tempo pa nan famia y pa nan rumannan den fe. Kisas nan ta hasta drumi mihor. (Eclesiastes 5:12) Nan ta biba mas feliz, ya cu nan ta comparti loke nan tin cu otro hende. (Echonan 20:35) Tambe nan ta “abunda den speransa” y tin paz mental y satisfaccion. (Romanonan 15:13; Mateo 6:31, 32) E bendicionnan aki realmente ta impagabel!

BISTI “E ARMADURA COMPLETO”

18. Con Bijbel ta describi nos enemigo, su metodonan y e tipo di lucha cu nos tin?

¹⁸ Si nos keda den e amor di Dios, nos lo haya tambe proteccion contra Satanas su esfuersonan pa stroba nos di sirbi Dios, di haya felicidad y hasta di haya bida eterno. (1 Pedro 5:8) Pablo a bisa: “Nos lucha no ta contra carni y [weso], sino contra gobierno, contra autoridad, contra gobernante di mundo di e scuridad aki, contra forsanan spiritual di maldad den luganan celestial.” (Efesionan 6:12) E palabra Griego traduci como “lucha” ta duna e idea di un combate mano a mano y no di un combate for di un distancia, kisas den e siguridad di un bunker scondi bou di tera. Ademas, e palabranan “gobierno”, “autoridad” y “gobernante di mundo” ta indica cu e atake for di e region di spirito ta bon organisa y plania.

19. Describi e armadura spiritual di un cristian.

¹⁹ A pesar di nos debilidad- y limitacionnan, nos por sali victorioso. Con? Si nos “bisti e armadura completo cu Dios ta duna.” (Efesionan 6:13) Nos ta lesa e siguiente descripcion di e armadura ey na Efesionan 6:14-18: “Pesey, para firme cu e berdad mara manera un faha rond di boso cintura, y boso pecho proteha cu e harnas di husticia, y cu boso pia bisti cu e sandalia pa predica e bon noticia di paz. Den tur circunstancia, tuma e escudo grandi di fe, cu cua boso lo por paga tur e flechanan cendi di e Malbado. Ademas, acepta e helm [of, speransa] di salbacion, y e spada di spirito, esta, e palabra di Dios. Alabes, sigui resa tur ora bay bou di guia di spirito santo, uzando tur forma di oracion y suplica.”

20. Con nos situacion ta distinto for di un soldaat literal?

²⁰ E armadura spiritual nunca lo laga nos na caya, pasobra e ta bin di Dios. Un cos si, nos mester tin e semper bisti. Soldaatnan literal tin periodonan largo cu nan no tin cu bringa. Distinto for di nan, cristiannan ta nonstop den un lucha di bida y morto. Ta ora Dios destrui e mundo di Satanas y benta tur spirito malbado den abismo lo bin un fin na e lucha ey. (Revelacion 12:17; 20:1-3) Pues, si bo ta luchando contra debilidad of mal deseo, no entrega. Nos tur tin cu ‘golpia nos curpa’, na moda di papia, pa nos por keda fiel na Jehova. (1 Corintionan 9:27) De echo, ta juist ora nos no ta luchando nos tin cu preocupa.

21. Cua ta e unico manera pa nos sali victorioso den nos guera spiritual?

²¹ Ademas, nos no por gana e lucha aki riba nos mes forsa. Pesey Pablo ta corda nos cu nos mester “sigui resa tur ora bay” na Jehova. Alabes, nos tin cu scucha Jehova. Nos ta haci esey ora nos ta studia su Palabra y anda mas tanto posibel cu ‘nos compañeronan den lucha’, ya cu nos no ta den e lucha aki nos so. (Filemon 2; Hebreonan 10:24, 25) Si nos haci tur e cosnan aki fielmente, nos no solamente lo sali victorioso for di e lucha, sino tambe nos lo por defende nos fe ora esaki ta bou di atake.

SEA CLA PA DEFENDE BO FE

22, 23. (a) Dicon semper nos mester ta cla pa defende nos fe, y kico nos mester puntra nos mes? (b) Kico nos lo analisa den e siguiente capitulo?

²² Hesus a bisa: “Como cu boso no ta parti di mundo, . . . mundo ta odia boso.” (Juan 15:19) Pues, cristiannan mester ta semper cla pa defende nan fe, y nan mester haci esaki na un manera suave y cu respet. (1 Pedro 3:15) Puntra bo mes: ‘Mi ta compronde dicon tin biaha Testigonan di Jehova ta tuma un posicion cu ta contrario na opinion popular? Ora mi tin cu tuma e posicion dificil ey, mi ta completamente convenci cu loke Bijbel y e esclavo fiel ta bisa ta corecto? (Mateo 24:45; Juan 17:17) Y ora mi tin cu haci loke ta corecto den bista di Jehova, mi ta demostra cu no solamente mi ta dispuesto pa ta diferente, sino cu mi ta orguyoso tambe di esey?’—Salmo 34:2; Mateo 10:32, 33.

²³ Sinembargo, Diabel ta uza tambe tacticanan mas sutil pa pone nos deseo pa keda separa for di mundo na prueba. Por ehempel, manera a ser menciona mas prome, e ta purba atrae e sirbidornan di Jehova pa medio di diberticion degrada pa nan bay den mundo. Con nos por scoge diberticion sano cu ta refresca nos y laga nos cu un consenshi limpi? Nos lo analisa esey den e siguiente capitulo.