Capitulo Diesocho

“Nan No Ta Parti di Mundo”

1. (a) Prome cu Hesus su morto, kico el a pidi den oracion na fabor di su disipelnan? (b) Dicon ta asina importante pa nan “no ta parti di mundo”?

E ANOCHI prome cu nan a mat’e, Hesus a haci oracion na fabor di su disipelnan. Sabiendo cu Satanas lo pone tremendo presion riba nan, Hesus a bisa su Tata: “Mi no ta pidi bo pa saca nan for di mundo, ma pa bo warda nan di e malbado. Nan no ta [parti, NW] di mundo, mescos cu ami no ta [parti, NW] di mundo.” (Huan 17:15, 16) Dicon tawata asina importante pa nan ta separa for di mundo? Pasobra ta Satanas ta e gobernante di mundo. Cristiannan lo no kier bira parti di un mundo cu ta bou di su control.—Lucas 4:5-8; Huan 14:30; 1 Huan 5:19.

2. Con Hesus a demostra cu e no tawata parti di mundo?

² E echo cu Hesus no tawata parti di mundo no a nifica cu e no a stima otro hende. Al contrario, el a cura hende malo, lanta morto, y a siña hende tocante e Reino di Dios. El a asta duna su bida pa humanidad. Pero e no a stima e actitud y accionnan malbado di esnan cu a manifesta e inclinacion mental cu ta domina e mundo di Satanas. Ta pesei el a spierta contra cosnan manera deseonan inmoral, un moda di biba materialista y buscamento di prominencia. (Mateo 5:27, 28; 6:19-21; Lucas 20:46, 47) Nada straño anto cu Hesus no a mete den asuntonan politico di mundo. Aunke e tawata un Hudiu, el a keda neutral den e controversianan politico cu tawatin entre Roma y e Hudiunan.

“Mi Reino No Ta di e Mundo Aki”

3. (a) Di kico e lidernan religioso Hudiu a acusa Hesus dilanti Pilato, y dicon? (b) Kico ta mustra cu Hesus no tawata interesa pa bira un rei humano?

³ Considera kico a sosode ora e lidernan religioso Hudiu a laga aresta Hesus y hib’e dilanti e gobernado Romano Poncio Pilato. Eigenlijk e lidernan ei tawata rabia pasobra Hesus a desenmascara nan hipocresia. Pa pone e gobernado tuma accion contra Hesus, nan a acus’e bisando: “Nos a haya e homber aki ta gaña nos nacion y ta prohibi di paga belasting na Cesar, y ta bisa cu ta e mes ta Cristo, un rei.” (Lucas 23:2) Esaki tawata un mentira flagrante pasobra un aña prome ora e pueblo kier a haci Hesus rei, el a nenga. (Huan 6:15) Hesus tawata sa cu lo e bira un Rei celestial den futuro. (Lucas 19:11, 12) Y cu ta Yehova lo a pon’e riba trono, no hende.

4. Ki actitud Hesus tawatin pa cu pagamento di belasting?

⁴ Apenas tres dia prome cu su aresto, e Farizeonan a purba pone Hesus bisa algo cu lo a conden’e den e asunto di paga belasting. Pero Hesus a bisa: “Mustra mi un denario [un moneda Romano]. Ken su imagen y inscripcion tin riba dje?” Ora nan a bisa “di Cesar”, el a bisa nan: “Anto duna Cesar loke ta di Cesar, y Dios loke ta di Dios.”—Lucas 20:20-25.

5. (a) Ki les Hesus a siña su disipelnan ora e hendenan a bin arest’e? (b) Ki splicacion Hesus a duna pa loke el a haci? (c) Kico tawata e resultado di e huicio?

⁵ No, Hesus no a siña su disipelnan rebeldia contra autoridad di gobierno. Ora solda a bini hunto cu otro hende pa aresta Hesus, Pedro a saca su spada y a kita horea di un di e hombernan. Pero Hesus a bisa: “Pone bo spada bek na su luga; pasobra tur esnan cu saca spada lo perece pa medio di spada.” (Mateo 26:51, 52) E siguiente dia Hesus a splica su accion na Pilato, bisando: “Mi reino no ta di e mundo aki. Si mi reino tawata di e mundo aki, mi sirbidonan lo a bringa, pa mi no wordo entrega na e Hudiunan.” (Huan 18:36) Pilato a admiti cu e ‘no a haya ningun culpa den Hesus di loke nan ta acus’e.’ Pero bou di presion di e multitud violento, Pilato a laga claba Hesus na staca.—Lucas 23:13-15; Huan 19:12-16, NW.

E Disipelnan Ta Sigui Hesus Su Ehempel

6. Con Cristiannan di prome siglo a mustra cu nan a evita e actitud di mundo pero cu nan a stima hende?

⁶ Pues e disipelnan di Hesus a comprende loke nan mester a haci pa nan no ta parti di mundo. Nan tawatin cu evita e actitud- y accionnan malbado di mundo, locual a inclui e dibirticionnan violento y inmoral di e arena y teatro Romano. Pa motibo cu nan no a haci e cosnan ei, hende tawata bisa cu nan a odia hende. Pero ningun ora so nan no a odia nan prohimo; al contrario, nan a traha duro pa yuda otro hende beneficia di Dios su areglonan pa salbacion.

7. (a) Como cu e disipelnan di prome siglo no tawata parti di mundo, kico nan a experencia? (b) Con nan a mira gobernantenan politico y pagamento di belasting, y dicon?

⁷ Hesus su siguidonan a ser persigui mescos cu ne, y hopi bes door di funcionarionan gubernamental mal informa. Sinembargo, rond di aña 56 Era Comun, apostel Pablo a urgi Cristiannan na Roma den un carta pa nan “somete nan mes na e autoridadnan cu ta goberna. Pasobra no tin autoridad cu no ta di Dios.” No ta asina cu ta Yehova ta establece gobiernonan di mundo, pero si, E ta permiti nan existi te ora cu su Reino so ta goberna henter mundo. Apropiadamente, Pablo a conseha Cristiannan pa respeta funcionarionan gubernamental y paga belasting.—Romanonan 13:1-7; Tito 3:1, 2.

8. (a) Te na ki grado Cristiannan mester ta sumiso na autoridad gubernamental? (b) Con e prome Cristiannan a sigui Hesus su ehempel?

⁸ Sinembargo, sumision na gobernantenan politico mester ta relativo, no sin limite. Ora tin un conflicto entre e leinan di Yehova y e leinan di hende, personanan cu ta sirbi Yehova ta obedece Su leinan. Tuma nota di loke e buki On the Road to Civilization—A World History (Riba Caminda pa Civilisacion—Un Historia di Mundo) ta bisa di e prome Cristiannan: “E Cristiannan a nenga di participa den cierto deber di ciudadanonan Romano. Pa e Cristiannan, . . . tawata un violacion di nan fe pa drenta servicio militar. Nan a nenga di acepta puesto politico. Nan a nenga di adora emperador.” Ora e corte supremo Hudiu ‘a taha e disipelnan strictamente’ pa stop di predica, nan a contesta: “Nos mester obedece Dios mas cu hende.”—Echonan 5:27-29.

9. (a) Dicon Cristiannan den Herusalem a hui bai di e stad na aña 66 Era Comun? (b) Ki ehempel balioso esaki ta pa nos?

⁹ Pa loke ta controversianan politico y militar, e disipelnan a keda strictamente neutral. Na aña 66 Era Comun, Hudiunan na Hudea a lanta contra Cesar. E ehersito Romano a rondona Herusalem rapidamente. Kico e Cristiannan den e stad a haci? Nan a corda Hesus su conseho pa sali for di e stad. Ora e Romanonan a retira temporalmente, e Cristiannan a hui bai na otro banda di Riu Yordan, den e Seronan di Pella. (Lucas 21:20-24) Nan neutralidad ta sirbi como un ehempel pa Cristiannan fiel cu a bini despues.

Cristiannan Mester Ta Neutral den e Ultimo Dianan Aki

10. (a) Ki trabou Testigonan di Yehova ta haciendo, y dicon? (b) Relaciona cu kico nan ta neutral?

¹⁰ Historia ta mustra cu tawatin un grupo den e ultimo dianan aki cu a tene nan mes strictamente neutral, imitando asina e prome Cristiannan? Si, Testigonan di Yehova a haci esei. Durante henter e periodo di ultimo dianan aki, nan a keda predica cu e Reino di Dios ta e unico medio pa trece pas, prosperidad y felicidad duradero pa amante di husticia. (Mateo 24:14) Pero nan a keda strictamente neutral pa loke ta e controversianan entre e nacionnan.

11. (a) Con e posicion neutral di e Testigonan ta na contraste cu e practicanan di pastornan? (b) Ki punto di bista Testigonan di Yehova tin di loke otro hende ta haci tocante politica?

¹¹ Un contraste skerpi cu esaki ta cu pastornan di religionnan di e mundo aki tawata masha envolvi den asuntonan politico. Den algun pais, nan a hiba campaña activo sea na fabor of contra di candidatonan politico. Algun pastor asta tin puesto politico. Otronan a presiona politiconan pa bini cu proyectonan cu nan como pastor ta aproba. Sinembargo, Testigonan di Yehova no ta mete den politica. Tampoco nan no ta stroba otro hende di join un partido politico ni di bira candidato pa un puesto politico ni di vota den eleccion. Hesus a bisa cu su disipelnan lo no ta parti di mundo, pesei Testigonan di Yehova no ta tuma parti den politica.

12. E echo cu religionnan di e mundo aki no ta neutral, a resulta den kico?

¹² Manera Hesus a profetisa, nacionnan a bai guera bes tras bes. Asta partidonan den e mesun nacion a bringa contra otro. (Mateo 24:3, 6, 7) Casi semper lidernan religioso a apoya un nacion of partido contra e otro, urgiendo nan siguidonan pa haci mescos. Cu ki resultado? Miembronan di mesun religion ta mata otro den bataya djis pa motibo di diferencia di nacionalidad of tribu. Esaki ta contrario na Dios su boluntad.—1 Huan 3:10-12; 4:8, 20.

13. Ki evidencia tin cu ta mustra cu Testigonan di Yehova ta neutral?

¹³ Sinembargo, Testigonan di Yehova a keda strictamente neutral den tur conflicto. E Toren di Vigilancia (na Ingles) di 1 di november 1939, a declara: “Tur hende cu ta na banda di Señor lo ta neutral en cuanto nacionnan den guera.” Testigonan di Yehova den tur nacion y bou di tur sircunstancia ta sigui mantene e posicion aki. Nan no ta permiti mundo su politica y gueranan cu ta causa desunion, kibra nan hermandad mundial. Nan ta “bati nan spadanan traha ploeg cu nan, y nan [ta] bati nan lansanan traha sker pa snui cu nan.” Como cu nan ta neutral, nan no ta train mas pa guera.—Isaias 2:3, 4; 2 Corintionan 10:3, 4.

14. Kico Testigonan di Yehova a experencia como cu nan ta keda separa di mundo?

¹⁴ Kico ta un di e resultadonan di nan neutralidad? Hesus a bisa: “Pasobra boso no ta [parti, NW] di mundo, . . . mundo ta odia boso.” (Huan 15:19) Hopi Testigo di Yehova a ser encarsela pasobra nan ta sirbido di Dios. Tin di nan a ser tortura, asta mata, mescos cu a pasa cu e Cristiannan di prome siglo. Esei ta pasobra Satanas, “e dios di e mundo aki”, ta opone e sirbidonan di Yehova, kendenan no ta parti di su mundo.—2 Corintionan 4:4; Revelacion 12:12.

15. (a) Den ki direccion tur nacion ta marchando, y kico Testigonan di Yehova ta evita? (b) Dicon keda separa di mundo ta un asunto asina serio?

¹⁵ Yehova su sirbidonan ta contento cu nan no ta parti di mundo, pasobra tur e nacionnan di mundo ta marchando rumbo pa nan fin na Armagedon. (Daniel 2:44; Revelacion 16:14, 16; 19:11-21) Nos lo evita e fin desastroso ei, pasobra nos ta keda separa for di mundo. Como un pueblo mundialmente uni, nos ta fiel na Dios su Reino celestial. Ta berdad cu como cu nos no ta parti di mundo, hende ta haci bofon di nos y persigui nos. Pero djis aki esei lo stop, ya cu e mundo malbado aki bou di mando di Satanas lo ser destrui pa semper. Na otro banda, esnan cu ta sirbi Yehova lo biba pa semper den su husto mundo nobo bou di e Reino di Dios.—2 Pedro 3:10-13; 1 Huan 2:15-17.

Como Repaso

• Con Hesus a demostra kico ta encera ‘no ser parti di mundo’?

• Ki actitud e prome Cristiannan tawatin pa cu (a) e inclinacion mental cu a domina mundo, (b) gobernantenan di mundo, y (c) pagamento di belasting?

• Den ki manera Testigonan di Yehova di tempo actual a duna prueba di nan neutralidad Cristian?

[Plachi na pagina 165]

Hesus a splica cu ni e ni su siguidonan no tawata “parti di mundo”