LES 52
Dicon Ta Importante pa Nos Presta Atencion na Nos Manera di Bisti y na Nos Apariencia?
Nos tur tin nos mes gusto pa loke ta bistimento y nos apariencia. Si nos sigui algun principio di Bijbel, nos por bisti loke nos ta gusta y na mes momento agrada Jehova. Laga nos wak algun di e principionan ey.
1. Kico ta algun principio cu por yuda nos scoge kico pa bisti y con pa cuida nos apariencia?
Bijbel ta anima nos pa bisti “na ordo, cu modestia y sano huicio.” Ademas, nos mester percura pa semper nos apariencia ta limpi pa asina otro hende por mira cu nos ta sirbidor di Dios, si, cu nos ta “devoto na Dios.” (1 Timoteo 2:9, 10) Laga nos trata e cuater principionan cu e textonan a menciona: (1) Nos mester bisti “na ordo.” Ora bo bay un reunion di testigonan di Jehova, kisas bo ta ripara cu e rumannan ta bisti na diferente manera, pero semper nos manera di bisti y estilo di cabey ta mustra cu nos tin respet pa Dios. (2) Ora nos ta bisti “cu modestia”, nos ta percura pa nos manera di bisti no ta provocativo ni no ta hala mucho atencion na nos mes. (3) Nos ta mustra cu nos tin “sano huicio” ora cu nos no ta bay tras di tur moda of estilo cu ta popular. (4) Semper nos manera di bisti y nos apariencia mester demostra cu nos ta “devoto na Dios.” Asina hende por mira claramente cu nos ta adora e Dios berdadero.—1 Corintionan 10:31.
2. Dicon nos tin cu tene cuenta cu nos rumannan ora di scoge loke nos kier bisti?
Aunke cada un di nos por dicidi kico nos ta bisti, ta bon pa nos pensa con nos manera di bisti por laga otro hende sinti. Nos ta haci nos best pa no ofende niun hende; mas bien, nos kier “agrada [nos] prohimo pa su bon y pa fortalec’e.”—Lesa Romanonan 15:1, 2.
3. Con nos manera di bisti por duna hende gana di siña tocante Jehova?
Semper nos ta haci nos esfuerso pa bisti na un manera adecua pa e ocasion. Pero nos mester presta bon atencion na nos manera di bisti vooral ora nos ta bay reunion y ora nos ta sali den sirbishi. Nos ta haci esaki pasobra nos no kier kita atencion for di e mensahe importante cu nos ta predica na hende. Mas bien, nos kier pa nos apariencia duna hende gana di siña tocante e Dios cu nos ta sirbi y pa e “dorna e siñansa di nos Salbador.”—Tito 2:10.
KICO MAS NOS POR SIÑA?
Laga nos wak con nos por haci sigur cu nos manera di bisti y nos apariencia ta laga otro hende mira cu nos ta sirbi Jehova.
Nos manera di bisti y nos apariencia ta mustra si nos tin respet pa hende cu tin autoridad. Aunke Jehova ta mira kico tin den nos curason, nos manera di bisti y nos apariencia tambe mester mustra cu nos tin respet p’e
4. Ora nos apariencia ta representabel, nos ta mustra cu nos ta respeta Jehova
Kico ta e motibo principal pakico nos ta worry cu e impresion cu nos apariencia ta duna? Lesa Salmo 47:2. Despues, analisa e siguiente preguntanan:
Con e echo cu nos ta representa Jehova mester yuda nos ora di scoge kico pa bisti?
Bo ta kere cu ta importante pa nos presta bon atencion na nos apariencia ora nos ta bay reunion y ora nos ta sali den sirbishi? Dicon si, of dicon no?
5. Kico por yuda nos dicidi kico pa bisti y con pa cuida nos apariencia?
No ta importa cuanto nos pañanan ta costa. Loke ta importante ta pa nos pañanan ta limpi y apropia pa cada ocasion. Lesa 1 Corintionan 10:24 y 1 Timoteo 2:9, 10. Despues, analisa dicon nos mester evita di bisti paña ...
cu ta slons of cu no ta apropia pa e ocasion.
cu ta preta, cu ta saca mucho parti di nos curpa of cu ta provocativo.
Awe, como cristian, nos no ta sigui Ley di Moises. Pero e leynan ey ta yuda nos haya sa kico Jehova ta pensa tocante cierto asunto. Lesa Deuteronomio 22:5. Despues, analisa e siguiente pregunta:
Dicon un hende homber mester evita cu su manera di bisti y su apariencia ta parce esun di hende muher, y dicon un hende muher mester evita cu su manera di bisti y su apariencia ta parce esun di hende homber?
Lesa 1 Corintionan 10:32, 33 y 1 Juan 2:15, 16. Despues, analisa e siguiente preguntanan:
Dicon nos lo no kier pa nos manera di bisti y nos apariencia ofende hende caminda nos ta biba of hende den nos congregacion?
Con e hendenan caminda bo ta biba ta gusta bisti, y con nan ta gusta pa nan apariencia ta?
Tin algun di e stylenan cu bo a menciona cu no ta pas of cu no a apropia pa un cristian? Dicon si, of dicon no?
Tin diferente manera di bisti y style di cabey cu ta aceptabel pa Jehova
LOKE HENDE SA BISA: “Mi por bisti loke mi kier.”
Bo ta di acuerdo cu e pensamento ey? Dicon si, of dicon no?
RESUMEN
Ora nos ta tuma bon decision relaciona cu nos manera di bisti y nos apariencia, nos ta mustra cu nos ta respeta Jehova y otro hende.
Repaso
Dicon Jehova kier pa nos presta atencion na nos manera di bisti y na nos apariencia?
Kico ta algun principio di Bijbel cu por yuda nos ora ta trata di nos manera di bisti y nos apariencia?
Ki efecto nos manera di bisti y nos apariencia por tin riba hende cu no ta sirbi Jehova?
MAS INFORMACION INTERESANTE
Kico otro hende ta pensa di bo ora nan wak loke bo ta bisti?
“Kico Mi Manera di Bisti Ta Bisa di Mi?” (articulo riba jw.org)
Wak dicon ta sabi pa bo pensa bon prome cu bo pone un tattoo.
“Kico Bijbel Ta Bisa Tocante Tattoo?” (articulo riba jw.org)
Wak algun principio mas cu por yuda bo tuma bon decision ora di scoge kico pa bisti y con pa cuida bo apariencia.
“Bo Manera di Bisti Ta Duna Gloria na Dios?” (E Toren di Vigilansia di september 2016)
Wak con un señora cu kier a agrada Dios a siña acepta e manera cu otro hende ta bisti.