LES 51
Con Bo Manera di Papia Por Haci Jehova Contento?
Ora Jehova a crea nos, el a duna nos un bunita regalo. E regalo ey ta e echo cu nos por papia. Jehova ta worry con nos ta papia cu otro hende? Sigur cu si! (Lesa Santiago 1:26.) Pues, con nos por papia cu otro hende na un manera cu ta haci Jehova contento?
1. Con nos por uza e regalo aki cu Jehova a duna nos bon?
Bijbel ta bisa nos pa “sigui anima otro y fortalece otro.” (1 Tesalonicensenan 5:11) Bo sa di hende cu mester di animacion? Kico bo por haci pa nan por sinti nan mihor? Bo por laga nan sa con importante nan ta pa bo. Kisas bo por bisa nan kico bo ta aprecia di nan. Tambe bo por pensa riba un texto di Bijbel cu por anima nan. Tin varios texto di Bijbel cu bo por scoge. Ademas, ta bon pa corda cu e manera cu bo ta bisa algo ta mes importante cu loke bo ta bisa. Pues, semper haci bo best pa papia na un manera suave y bondadoso.—Proverbionan 15:1.
2. Kico nos mester evita ora nos ta papia?
Bijbel ta bisa: “No laga ningun palabra putri sali for di boso boca.” (Lesa Efesionan 4:29.) Esaki ta encera cu nos no mester papia palabra malo ni cos cu por ofende hende of haci nan dolor. Ademas, nos no mester haci redo ni papia malo di otro hende.—Lesa Proverbionan 16:28.
3. Kico por yuda nos papia na un manera cu ta laga otro hende sinti nan bon?
Hopi biaha, loke nos ta papia ta mustra realmente kico nos ta pensa y sinti. (Lucas 6:45) Pues, nos mester entrena nos mente pa pensa riba cos positivo. Por ehempel, nos mester pensa riba loke ta husto, loke ta puro, loke ta promove stimacion y loke ta digno di elogio. (Filipensenan 4:8) Pa nos por haci esey, nos mester scoge entretenimento sano y bon amigo. (Proverbionan 13:20) Algo cu por yuda nos tambe ta door di pensa bon loke nos kier bisa y con pa bis’e prome cu nos papia. Purba di pensa con hende lo sinti tocante e cosnan cu bo kier bisa. Bijbel ta bisa: “Palabra di hende cu ta papia sin pensa ta manera hinca di spada, pero lenga di hende sabi ta trece alivio.”—Proverbionan 12:18.
KICO MAS NOS POR SIÑA?
Laga nos wak con bo por papia na un manera cu ta haci Jehova contento y cu ta anima otro hende.
4. Wak bon kico bo ta papia, con bo ta papia y ki ora bo ta papia
Tin biaha, nos tur sa bisa cos cu despues ta duel nos. (Santiago 3:2) Lesa Galationan 5:22, 23. Despues, analisa e siguiente preguntanan:
Cua di e cualidadnan menciona den e texto aki bo por pidi den oracion pa yuda bo controla loke bo ta papia y e manera cu bo ta papia? Con e cualidadnan ey por yuda bo?
Lesa 1 Corintionan 15:33. Despues, analisa e siguiente pregunta:
Con bo amigonan y e entretenimento cu bo ta scoge por influencia bo manera di papia?
Kico por influencia bo manera di papia? Y con?
Lesa Eclesiastes 3:1, 7. Despues, analisa e siguiente pregunta:
Ki ora ta sabi pa bo keda keto of pa scoge un mihor momento pa papia?
5. Papia bon di otro hende
Con bo por evita di bisa algo cu ta haci hende dolor of cu ta ofende nan? Pasa e VIDEO. Despues, analisa e siguiente preguntanan:
Dicon e ruman homber den e video kier a cambia e manera cu e tabata papia di otro hende?
Kico el a haci pa cambia?
Lesa Eclesiastes 7:16. Despues, analisa e siguiente pregunta:
Kico bo mester corda ora bo haya gana di papia malo di un hende?
Lesa Eclesiastes 7:21, 22. Despues, analisa e siguiente pregunta:
Con e texto aki por yuda bo pa no rabia ora un hende bisa algo malo di bo?
6. Papia na un manera bondadoso cu bo famia
Jehova kier pa nos papia cu nos famia na un manera bondadoso y cariñoso. Pasa e VIDEO. Despues, analisa e siguiente pregunta:
Kico lo yuda bo papia na un manera bondadoso cu bo famia?
Lesa Efesionan 4:31, 32. Despues, analisa e siguiente pregunta:
Con bo por papia cu bo famia na un manera cu ta laga nan sinti bon?
Jehova a expresa kico e ta sinti pa su Yiu, Hesus. Lesa Mateo 17:5. Despues, analisa e siguiente pregunta:
Con bo por imita Jehova ora bo ta papia cu bo famia?
Busca oportunidad pa elogia otro hende
LOKE HENDE SA BISA: “Mi ta bisa loke mi ta pensa; si hende no ta gusta esey, ta nan problema.”
Bo tambe ta pensa asina? Dicon si, of dicon no?
RESUMEN
Loke nos ta bisa por sea yuda un hende of hacie dolor. Prome cu nos papia, nos tin cu pensa bon kico nos ta bay papia, con nos ta bay papia y ki ora nos ta papia.
Repaso
Kico ta algun cos cu bo por bisa pa yuda otro hende?
Kico bo mester evita ora bo ta papia?
Kico por yuda nos pa semper papia na un manera bondadoso y pa papia loke ta bon?
MAS INFORMACION INTERESANTE
Kico por yuda nos papia na un manera positivo?
Wak kico por yuda bo evita di papia palabra malo.
“Ta Asina Malo pa Papia Palabra Malo?” (articulo riba jw.org)
Wak con bo por evita di haci redo.
Wak con Jehova a yuda un homber stop di papia palabra malo.
“Mi A Cuminsa Pensa Seriamente Con Lo Para cu Mi Bida” (E Toren di Vigilansia di 1 di augustus 2013)