Mira e Bon Cu Tin den Tur Bo Trabou

1-3. (a) Kico hopi hende ta pensa di nan trabou? (b) Bijbel ta anima nos pa nos tin ki punto di bista di trabou, y cua preguntanan nos lo analisa den e capitulo aki?

PA HOPI hende awe, trabou ta un castigo. Nan no tin niun tiki placer den dje. Dia aden dia afo, nan tin cu traha oranan largo, haciendo algo cu nan no ta ni sikiera gusta. Cu un actitud asina, no ta facil pa nan mustra interes den nan trabou, corda pa nan haya satisfaccion den dje. Kico por motiva hende asina pa cambia nan actitud?

² Bijbel ta anima nos pa nos tin un punto di bista positivo di trabou duro. E ta bisa cu trabou y e fruta cu esey ta produci ta un bendicion. Salomon a skirbi: “No tin nada mihor pa hende, cu . . . come y bebe y mira e bon cu tin den tur su trabou—esaki ta e regalo di Dios.” (Eclesiastes 3:12, 13) Jehova stima nos y semper ta desea lo mihor pa nos. Pesey tambe e kier pa nos haya satisfaccion den nos trabou y disfruta di e fruta di nos labor. Nos lo keda den su amor si nos siña mira trabou manera e ta mir’e y laga su principionan guia nos.—Eclesiastes 2:24; 5:18.

³ Den e capitulo aki nos lo analisa cuater pregunta: Con nos por mira e beneficionan di nos trabou? Ki tipo di trabou no ta pa cristian berdadero? Con nos por balansa nos trabou cu actividadnan relaciona cu nos adoracion? Y cua ta e trabou di mas importante cu nos mester haci? Pero prome, laga nos considera e ehempel di e dos mihor trahadornan den universo: Jehova Dios y Hesucristo.

E TRAHADOR SUPREMO Y E TRAHADOR EXPERTO

4, 5. Con Bijbel ta indica cu Jehova ta un trahador masha diligente?

⁴ Jehova ta e Trahador Supremo. Genesis 1:1 ta bisa: “Na principio Dios a crea e cielonan y tera.” Ora Dios a termina su trabou di creacion relaciona cu nos planeta Tera, el a declara cu “tur cos tabata masha bon.” (Genesis 1:31) Cu otro palabra, e tabata completamente satisfecho cu tur su trabou. No tin duda cu Jehova, “e Dios feliz”, a sinti un gran goso di por ta un trahador asina productivo.—1 Timoteo 1:11.

⁵ Jehova ta masha diligente y nunca e no a stop di traha. Hopi tempo despues cu su trabou di creacion relaciona cu nos tera a termina, Hesus a bisa: “Mi Tata ta traha te ainda, y ami tambe ta sigui traha.” (Juan 5:17) Kico e Tata ta haci? El a keda masha activo cuidando y guiando humanidad for di cielo. Tambe el a produci “un creacion nobo”, esta, cristiannan ungi pa spirito santo, kendenan lo bay reina hunto cu Hesus den cielo. (2 Corintionan 5:17) Ademas, el a sigui traha pa cumpli cu su proposito pa humanidad, esta, pa esnan cu stim’e por haya bida eterno den un mundo nobo. (Romanonan 6:23) Jehova lo mester ta masha contento cu e resultado di su trabou: Miyones di hende a reacciona bon na e mensahe di Reino, el a hala nan cerca dje y nan a haci cambio den nan bida pa keda den su amor.—Juan 6:44.

6, 7. Dicon nos por bisa cu Hesus tin hopi tempo ta traha diligentemente?

⁶ Hesus ta un trahador diligente pa hopi tempo caba. Prome cu el a bin na tera como hende, e tabata e “trahador experto” pa medio di ken Jehova a crea tur cos, “tanto den cielo como riba tera.” (Proverbionan 8:22-31; Colosensenan 1:15-17) Y ora e tabata riba tera, el a sigui traha duro. For di mucha el a siña un ofishi den ramo di construccion y a bira conoci como “e carpinte.”a (Marco 6:3) E ofishi ey a encera trabou pisa y a rekeri habilidad. Corda cu den e tempo ey no tabatin fabrica ni deposito di palo ni hermentnan electrico. Bo por imagina bo con Hesus tabata sali bay busca palo? Kisas e mes mester a kap e palo prome y despues lastr’e hiba caminda e tabata traha. Bo por mir’e ta traha un cas, ta prepara y pega e biganan di e dak, ta traha porta y hasta algun mueble? Sin duda, Hesus tabata sa di experencia ki satisfaccion bo ta sinti ora bo traha duro y haci un bon trabou.

⁷ Hesus tabata masha diligente tambe den su sirbishi. Durante tres aña y mey, el a ocupa su mes intensamente cu e trabou sumamente importante aki. E kier a alcansa mas tanto hende posibel. Pues, el a probecha bon di su dianan: E tabata lanta mainta trempan y keda traha te anochi laat. (Lucas 21:37, 38; Juan 3:2) El a “biaha di stad pa stad y di pueblito pa pueblito, predicando y anunciando e bon noticia di e Reino di Dios.” (Lucas 8:1) Hesus a cana literalmente cientos di kilometer riba caminda di tera pa hiba e bon noticia na e hendenan.

8, 9. Con Hesus a mira e beneficionan of fruta di su trabou?

⁸ Hesus a mira e fruta di su trabou duro? Claro cu si! El a sembra asina tanto simia di e berdad di Reino cu el a bay laga cunucunan cla pa cosecha atras. E trabou di Dios a duna Hesus asina tanto forsa y energia cu e tabata dispuesto pa keda sin come pa e por a caba e trabou ey. (Juan 4:31-38) Esta un gran satisfaccion lo e mester a sinti ora cu na final di su sirbishi riba tera e por a bisa su Tata: “Mi a glorifica bo riba tera y a caba cu e trabou cu bo a duna mi pa haci.”—Juan 17:4.

⁹ Un cos ta sigur, Jehova y Hesus ta e mihor ehempel di personanan cu a mira e beneficionan di nan trabou duro. Nos amor pa nan ta motiva nos pa “imita Dios” y pa “sigui [Hesus] su pasonan fielmente.” (Efesionan 5:1; 1 Pedro 2:21) Pues, ban analisa con nos por mira e beneficionan di nos trabou duro.

CON NOS POR MIRA E BENEFICIONAN DI NOS TRABOU?

10, 11. Kico por yuda nos cultiva un actitud positivo pa cu nos trabou?

¹⁰ Actividadnan laboral tin nan debido luga den bida di tur cristian berdadero. Nos kier sinti nos satisfecho y, te na cierto grado, contento cu nos trabou. Pero esaki por ta masha dificil si nos tin un trabou cu nos no ta gusta. Den un situacion asina, con toch nos por mira e beneficionan di nos trabou?

¹¹ Cultiva un actitud positivo. Kisas nos no por cambia nos circunstancianan, pero semper nos por cambia nos actitud. Un cos cu por yuda nos cultiva un actitud positivo ta si nos medita riba e punto di bista di Dios. Por ehempel, si bo ta un cabes di cas, pensa riba esaki: Maske con laf of insignificante bo trabou por parce, e ta yuda bo percura pa e necesidadnan di bo famia, y esey ta un cos serio den bista di Dios. Su Palabra ta bisa cu esun cu no ta percura pa su famia “ta pio cu un persona sin fe.” (1 Timoteo 5:8) Pues, bo trabou ta yuda bo logra un meta, ya cu e ta permiti bo cumpli cu un responsabilidad cu Dios a duna bo. Ora bo ta compronde esey, bo por haya un grado di satisfaccion y motivacion cu kisas bo coleganan no tin.

12. Dicon ta bale la pena pa nos ta diligente y honesto na trabou?

¹² Demostra cu nos ta diligente y honesto. Nos por haya hopi beneficio si nos ta diligente y ta siña haci nos trabou bon. Doñonan di trabou hopi biaha ta aprecia trahador cu ta diligente y habil. (Proverbionan 12:24; 22:29) Ademas, nos mester ta honesto na trabou, y esey ta encera no horta placa, material ni tempo di nos doño di trabou. (Efesionan 4:28) Manera nos a mira den e capitulo anterior, ta bale la pena ora nos ta honrado. Nos por gana e confianza di nos hefenan. Y hasta si nan no ripara cu nos ta un bon trahador, nos por tin e satisfaccion di “tin un consenshi limpi” y di sa cu nos ta agrada nos Dios stima.—Hebreonan 13:18; Colosensenan 3:22-24.

13. Ki resultado nos bon ehempel na trabou por tin?

¹³ Reconoce cu nos comportacion por duna gloria na Dios. Ora nos tin un comportacion ehemplar na trabou, es decir cu nos ta pega na e normanan cristian halto, otro hende lo nota esaki sigur. Di e manera ey nos “por dorna e siñansa di nos Salbador, Dios.” (Tito 2:9, 10) Pues, nos bon comportacion en berdad por atrae otro hende na nos forma di adoracion. Djis imagina con lo bo sinti bo si un colega reacciona di un manera positivo na e berdad pa motibo di bo bon ehempel na trabou! Y mas importante ainda: No tin nada mas dushi cu sa cu bo bon comportacion ta haci Jehova su curason contento y ta dun’e gloria.—Proverbionan 27:11; 1 Pedro 2:12.

UZA BO CAPACIDAD DI COMPRONDE ORA DI SCOGE TRABOU

14-16. Cua ta e dos preguntanan clave cu nos tin cu haci nos mes ora di tuma un decision tocante trabou?

¹⁴ Bijbel no ta duna instruccion detaya encuanto cua trabou ta aceptabel of cua no. Pero esey no kiermen cu nos por acepta cualkier trabou, sin importa kico e ta. E Scritura por yuda nos scoge trabou honrado y productivo cu ta agrada Dios y evita trabou cu ta desagrad’e. (Proverbionan 2:6) Tin dos pregunta clave cu nos tin cu haci nos mes ora di tuma un decision tocante trabou.

¹⁵ E trabou aki ta consisti di un actividad cu Bijbel ta condena? E Palabra di Dios claramente ta condena hortamento, gañamento y trahamento di imagen. (Exodo 20:4; Echonan 15:29; Efesionan 4:28; Revelacion 21:8) Pues, nos lo rechasa cualkier trabou cu ta pidi nos haci e tipo di cosnan ey. Nos amor pa Jehova no ta permiti nos acepta un trabou cu ta pone nos bay contra e mandamentonan di Dios.—1 Juan 5:3.

¹⁶ E trabou aki lo pone mi apoya of bira complice di un practica cu ta malo? Laga nos wak un ehempel. E trabou di recepcionista, riba su mes, no ta nada malo. Pero kico si un cristian haya e oferta pa traha recepcionista na un banco di sanger? Ta berdad cu lo e no participa directamente den saca sanger for di hende pa haci transfusion. Ma e trabou cu e ta haci tur dia eynan ta contribui si na e proceso di tuma y duna sanger pa transfusion, un practica cu ta bay contra e Palabra di Dios. (Echonan 15:29) Amor pa Jehova ta pone cu nos no kier tin nada di haber cu loke e Scritura ta condena.

17. (a) Menciona algun factor cu ta bon pa nos evalua relaciona cu trabou. (Wak e cuadro “Mi Por Tuma e Trabou Aki?”) (b) Con nos consenshi por yuda nos tuma un decision cu ta agrada Dios?

¹⁷ Nos lo por tuma bon decision den asunto di trabou si nos analisa cuidadosamente e contesta riba e dos preguntanan clave di paragraf 15 y 16. Pero tin algun factor mas cu ta bon pa nos evalua relaciona cu trabou.b Nos no por spera cu e esclavo fiel ta establece regla pa delaster un situacion cu lo por surgi. Aki ta caminda nos mes mester uza nos capacidad di compronde. Manera nos a siña den Capitulo 2, nos mester educa y entrena nos consenshi. Nos ta haci esey ora nos ta studia e Palabra di Dios y analisa con pa aplic’e den nos bida diario. Asina nos ta entrena nos “capacidad di compronde”, y nos consenshi lo por yuda nos tuma un decision cu ta agrada Dios y cu ta laga nos keda den su amor.—Hebreonan 5:14.

MANTENE UN PUNTO DI BISTA BALANSA DI TRABOU

18. Dicon no ta facil pa nos mantene balansa spiritual?

¹⁸ Nos ta bibando den e “ultimo dianan” cu su “temponan critico, dificil pa trata cu ne.” No ta facil pa nos mantene balansa spiritual, esta, pa tuma decisionnan cu semper lo yuda nos keda cu e aprobacion di Jehova. (2 Timoteo 3:1) Ta un reto pa haya trabou y keda cu ne. Como cristian berdadero, nos sa e importancia di traha duro pa percura pa nos famia. Pero si nos no tene cuidou, nos por laga e presion di trabou of e manera di pensa materialista di mundo interferi cu nos actividadnan spiritual. (1 Timoteo 6:9, 10) Laga nos wak con nos por mantene nos balansa y “haci sigur kico ta e cosnan mas importante.”—Filipensenan 1:10.

19. Dicon Jehova merece pa nos mustra pleno confianza den dje, y kico e confianza ey ta yuda nos evita?

¹⁹ Pone pleno confianza den Jehova. (Proverbionan 3:5, 6) E merece tal confianza? Ta mas cu claro, ya cu e ta interesa den nos. (1 Pedro 5:7) E conoce nos necesidadnan mihor cu nos mes, y su man no ta mucho cortico. (Salmo 37:25) Pesey ta bon pa nos haci caso di e recordatorio aki cu su Palabra ta duna nos: “Laga boso manera di biba ta liber di amor pa placa, y keda contento cu loke boso tin. Pasobra Dios a bisa: ‘Hamas lo mi bandona bo, y hamas lo mi laga bo desampara.’” (Hebreonan 13:5) Hopi ruman cu ta den sirbishi di tempo completo por confirma cu Dios semper ta percura pa e necesidadnan basico. Si nos ta confia plenamente den Jehova, nos lo no ta demasiado preocupa tocante con pa percura pa nos famia. (Mateo 6:25-32) Nos lo no neglisha e predicacion di e bon noticia, nos baymento di reunion y otro actividadnan spiritual pa motibo di trabou.—Mateo 24:14; Hebreonan 10:24, 25.

20. Kico kiermen mantene un wowo simpel, y con nos por haci esey?

²⁰ Mantene bo wowo simpel. (Mateo 6:22, 23) Un wowo simpel ta nifica cu nos no ta haci nos bida complica. E wowo simpel di un cristian ta enfoca riba un solo meta: haci e boluntad di Dios. Si nos bista spiritual ta bon enfoca, nos lo no ta obsesiona pa haya un trabou cu ta paga hopi placa of pa por tin un bida di luho. Tampoco nos lo ta coriendo tras di e ultimo novedadnan cu medionan di publicidad kier laga nos kere ta indispensabel pa nos ta feliz. Con bo por mantene bo wowo simpel? No hinca bo curpa den debe innecesario. No prop bo bida cu yen di cos material cu ta exigi demasiado tempo y atencion. Y manera Bijbel ta bisa, keda contento cu ‘cuminda, paña y un dak riba bo cabes.’ (1 Timoteo 6:8) Pues, purba simplifica bo bida mas tanto posibel.

21. Dicon nos mester fiha prioridad, y kico mester ta na prome luga den nos bida?

²¹ Pone cosnan spiritual semper na prome luga. Como cu nos tin solamente cierto cantidad di ora pa dia, nos tin cu fiha prioridad. Si no, cosnan menos importante lo kita tur nos tempo valioso y nos lo neglisha e cosnan mas importante. Kico mester ta na prome luga den nos bida? Hopi hende ta pone enfasis riba sigui un estudio avansa pa nan por tin un bon carera den e mundo aki. Ma Hesus a urgi su siguidornan pa “sigui busca . . . prome e Reino.” (Mateo 6:33) Pues, como cristian berdadero, nos ta pone e Reino di Dios na prome luga den nos bida. Nos manera di biba, esta, nos decisionnan, metanan y actividadnan mester demostra cu e Reino y e boluntad di Dios ta mas importante pa nos cu cos material y actividadnan di mundo.

TRAHA DURO DEN SIRBISHI DI VELD

22, 23. (a) Kico ta e trabou principal di cristiannan berdadero, y con nos por demostra cu e ta importante pa nos? (Wak e cuadro “Mi Decision a Duna Mi Hopi Goso y Satisfaccion.”) (b) Kico ta bo determinacion relaciona cu trabou?

²² Como sirbidor di Dios, nos sa cu e fin ta hopi cerca y pesey nos ta sigui concentra riba e trabou principal di cristiannan berdadero: e trabou di predica y haci discipel. (Mateo 24:14; 28:19, 20) Mescos cu nos Gran Ehempel, Hesus, nos kier ta intensamente ocupa cu e trabou aki cu por salba bida. Con nos por demostra cu e trabou aki ta importante pa nos? Mayor parti di e pueblo di Dios ta participa di henter nan alma den e predicacion como publicador di congregacion. Algun ruman a regla nan asuntonan di tal manera cu nan por sirbi como pionero of misionero. Y hopi mayor ta anima nan yiunan pa drenta den e sirbishi di tempo completo, ya cu nan ta mira e importancia di pone meta spiritual. E rumannan aki cu ta proclama e Reino yen di entusiasmo ta mira e beneficionan di nan trabou duro den sirbishi? Claro cu si! Ora nos ta sirbi Jehova di henter nos alma, nos por ta sigur cu nos lo disfruta di un bida yen di goso, satisfaccion y bendicion.—Proverbionan 10:22.

²³ Hopi di nos ta pasa oranan largo na trabou pa nos por percura materialmente pa nos famia. Corda cu Jehova kier pa nos mira e beneficionan di nos trabou duro. Nos por haya satisfaccion den nos trabou si nos percura pa nos actitud y comportacion ta na harmonia cu su punto di bista y principionan. Pero sea determina pa no laga e trabou cu nos tin pa gana nos pan di cada dia kita nos atencion for di nos actividad principal: proclamacion di e bon noticia di e Reino di Dios. Di e manera ey nos ta duna prueba cu nos ta stima Jehova y nos lo keda den su amor.