Kico Lo Pasa cu Religion?

1. Tur religion ta bon?

Den tur religion tin hende sincero. Dios ta tuma nota di e hendenan aki y ta interesa den nan. Pero lamentablemente, hende ta haci hopi maldad den nomber di religion. (2 Corintionan 4:3, 4; 11:13-15) Segun informe di noticia, tin religion hasta ta envolvi den terorismo, genocidio, guera y tambe maltrato y abuso sexual di mucha. E cosnan aki ta haci hende sincero cu ta kere den Dios masha tristo.—Lesa Mateo 24:3-5, 11, 12.

Mientras religion berdadero ta duna gloria na Dios, religion falso ta deshonra Dios cu nan siñansanan. Por ehempel, loke nan ta siña hende tocante Dios y e condicion di e mortonan no ta basa riba Bijbel. Pero Jehova kier pa hende haya sa e berdad tocante dje.—Lesa Eclesiastes 9:5, 10; 1 Timoteo 2:3-5.

2. Kico lo pasa cu religion?

Un cos ta sigur: E religionnan cu ta pretende di stima Dios pero cu en realidad ta stima e mundo di Satanas no por gaña Dios. (Santiago 4:4) Segun e Palabra di Dios, tur religion falso ta parti di “Babilonia e Grandi.” Babilonia tabata e stad di antiguedad caminda religion falso a cuminsa despues di e Diluvio di tempo di Noe. Pronto, Dios lo pone un fin repentinamente na tur religion cu ta gaña y oprimi hende.—Lesa Revelacion 17:1, 2, 5, 16, 17; 18:8.

Sinembargo, Jehova no a lubida e hendenan sincero cu awe ta plama den religion falso rond mundo. E ta siña nan e berdad y ta uni nan.—Lesa Mikeas 4:2, 5.

3. Kico hende sincero mester haci?

Jehova ta interesa den hende cu ta stima loke ta berdad y loke ta bon. E ta urgi nan pa sali for di religion falso. Hende cu ta stima Dios ta dispuesto pa haci cambio den nan bida pa nan por agrad’e.—Lesa Revelacion 18:4.

Den prome siglo, ora hende sincero a tende e bon noticia for di e apostelnan, nan a bira masha contento mes. Nan a siña di e caminda di Jehova, si, di un bida mas feliz cu a duna nan speransa y un proposito den bida. Nan ta un bon ehempel pa nos awe, ya cu nan a acepta e bon noticia y a pone Jehova na prome luga den nan bida.—Lesa 1 Tesalonicensenan 1:8, 9; 2:13.

Jehova ta extende un invitacion na hende cu ta sali for di religion falso pa bira parti di su pueblo. Si bo acepta e invitacion caluroso ey, Jehova lo permiti bo bira su amigo, forma parti di su famia di adoradornan amoroso y haya bida eterno.—Lesa Marco 10:29, 30; 2 Corintionan 6:17, 18.

4. Con Dios lo bendiciona hende di tur nacion?

E huicio cu lo bin riba religion falso ta un bon noticia. Rond mundo, hende lo haya alivio for di opresion. Nunca mas religion falso lo gaña humanidad y causa division. Na e tempo ey, tur hende lo ta uni den adoracion di e unico Dios berdadero.—Lesa Revelacion 18:20, 21; 21:3, 4.