LES 13
Religion Falso Ta Aleha Hende for di Dios
Dios ta amor y ta siña nos pa stima otro. Pero toch, hopi religion cu ta bisa cu nan ta adora Dios ta haci hopi cos malo. Con esey por ta? Simplemente bisa, nan ta religion falso. Loke nan ta bisa y haci ta aleha hende for di Dios. Con religion falso ta haci esey? Kico Dios ta pensa di loke religion falso ta haci, y kico lo e haci cu nan?
1. Con e cosnan cu e lidernan di religion falso ta siña hende ta aleha hende for di Dios?
E lidernan di religion falso ta siña hende “mentira y no e berdad tocante Dios.” (Romanonan 1:25) Por ehempel, mayoria di religion no ta siña nan miembronan e nomber di Dios. Pero, Bijbel ta mustra cu ta importante pa hende uza e nomber di Dios. (Romanonan 10:13, 14) Ademas, ora un tragedia pasa, algun lider religioso ta bisa cu ta Dios su boluntad. Pero esey no ta berdad. Dios nunca ta causa maldad. (Lesa Santiago 1:13.) Lamentablemente, e mentiranan cu e lidernan religioso ta siña hende ta aleha hende for di Dios.
2. Con e cosnan cu e lidernan di religion falso ta haci ta duna un impresion robes di Dios?
E lidernan di religion falso no ta trata hende manera Jehova ta trata nan. Bijbel ta bisa cu religion falso su “picanan a montona yega te na cielo.” (Revelacion 18:5) Pa varios siglo, religion a mete den politica, a apoya guera y a causa of tabata envolvi den morto di miles di hende. Ademas, algun lider religioso kier hiba un bida luhoso y pesey nan ta exigi placa for di nan miembronan. Loke e lidernan religioso ey ta haci ta mustra cu nan no conoce Dios. Pesey, nan no tin derecho di bisa cu nan ta representante di Dios.—Lesa 1 Juan 4:8.
3. Con Dios ta sinti ora e mira loke religion falso ta haci?
Si e cosnan cu religion falso ta haci ta pone bo rabia, con bo ta kere Jehova ta sinti? Jehova ta stima hende, pero e ta rabia cu e lidernan religioso cu ta papia mentira tocante dje y cu ta trata e miembronan di nan iglesia malo. Jehova ta priminti cu lo e destrui tur religion falso y cu “nunca mas” lo haya nan. (Revelacion 18:21) Si, pronto Dios lo caba cu tur religion falso.—Revelacion 18:8.
KICO MAS NOS POR SIÑA?
Laga nos wak kico mas Dios ta pensa di religion falso. Ademas, wak kico mas e lidernan di religion falso a haci, y dicon esaki no mester stop bo di sigui conoce Jehova.
4. No ta tur religion ta agrada Dios
Hopi hende ta kere cu Dios ta acepta tur religion. Pero esey ta berdad? Lesa Mateo 7:13, 14. Despues, analisa e siguiente pregunta:
Kico Bijbel ta bisa tocante e caminda cu ta hiba na bida?
Pasa e VIDEO. Despues, analisa e siguiente pregunta:
Bijbel ta bisa cu Dios ta acepta tur religion?
5. Religion falso no ta refleha e amor di Dios
E lidernan di religion falso a haci varios cos malo den nomber di Dios. Un di e maneranan di mas bisto cu nan a haci esey ta door di envolve nan mes den guera. Pa wak un ehempel di esaki, pasa e VIDEO. Despues, analisa e siguiente preguntanan:
Kico hopi religion a haci durante Segundo Guera Mundial?
Kico bo ta pensa di loke nan a haci?
Lesa Juan 13:34, 35 y 17:16. Despues, analisa e siguiente preguntanan:
Con bo ta kere cu Jehova ta sinti ora e mira hende cu ta bisa cu nan ta sirbie participa den guera?
Religion falso a yega di haci hopi cos malo y no ta obedece Dios su mandamento pa mustra amor. Abo a yega di mira esey? Menciona algun ehempel.
Religion falso no ta refleha e amor di Dios
6. Dios kier yuda hende sali for di religion falso
Lesa Revelacion 18:4.a Despues, analisa e siguiente pregunta:
Con bo ta sinti bo awor cu bo a haya sa cu Dios kier libra hende cu a ser engaña door di religion falso?
7. Sigui siña tocante e Dios berdadero
Acaso bo mester laga e mal cosnan cu religion falso ta bisa y haci influencia e manera cu bo ta mira Dios? Imagina bo e siguiente escena: Un tata ta duna su yiu homber bon conseho. Pero, e yiu no ta haci caso di e conseho di su tata. E yiu ta bay fo’i cas y ta haci hopi cos malo. E tata no ta niun tiki contento cu e mal decisionnan cu su yiu a tuma. Dicon no ta husto pa culpa e tata pa e cosnan malo cu su yiu homber rebelde a haci?
Awor, ta husto pa culpa Jehova pa e cosnan malo cu religion falso a haci y laga esey stroba bo di siña mas tocante Jehova?
LOKE HENDE SA BISA: “Mi no ta interesa den Dios pasobra religion a causa hopi problema na mundo.”
Bo tambe ta pensa asina?
Dicon nos no mester laga loke religion falso ta haci pone nos pensa malo di Dios?
RESUMEN
Religion falso ta aleha hende for di Dios pa medio di nan siñansanan falso y e cosnan malo cu nan ta haci. Dios lo destrui tur religion falso.
Repaso
Kico bo ta pensa tocante e siñansanan di e lidernan religioso falso y e cosnan malo cu religion falso ta haci?
Kico Jehova ta pensa di religion falso?
Kico Dios lo haci cu religion falso?
MAS INFORMACION INTERESANTE
Wak den ki dos manera mayoria di religion ta desagrada Dios.
“Tur Religion Ta Yuda Nos Hala Cerca Dios?” (articulo riba jw.org)
Dicon Jehova kier pa nos reuni hunto cu otro hende pa ador’e?
“Nos Mester Pertenece na un Religion Organisa?” (articulo riba jw.org)
Un pastoor tabata preocupa cu algun cos cu tabata sosode den su religion. Pero e no a laga esakinan strob’e di siña e berdad tocante Dios.
“Kico A Pone un Pastoor Bandona Su Iglesia?” (¡Despertad! di februari 2015)
Pa cientos di aña, religion a siña hende mentira cu a laga hende kere cu Dios no ta interesa den nos y cu e ta un Dios cruel. Wak e berdad tocante tres di e mentiranan ey.
“Mentira Cu Ta Aleha Hende for di Dios” (E Toren di Vigilancia di 1 di november 2013)