Con Nos Por Adora Dios na un Manera Cu Ta Agrad’e?

Manera e les anterior a splica, no ta tur religion ta agrada Dios. Sinembargo, nos por adora nos Creador na un manera cu ta agrad’e. Ki “forma di adoracion [of, religion]” ta agrada Dios? (Santiago 1:27) Laga nos wak con Bijbel ta contesta e pregunta ey.

1. Con nos por haya sa con Dios kier pa nos ador’e?

Bijbel por bisa nos esey. Hesus a bisa Dios: “Bo palabra ta e berdad.” (Juan 17:17) Algun religion ta pasa por halto di e berdadnan cu tin den e Palabra inspira di Dios, Bijbel. Nan ta prefera di sigui tradicion di hende. Pero, Jehova no ta niun tiki contento cu esnan cu a “pone [su] mandamento ... un banda.” (Lesa Marco 7:9.) Di otro banda, Dios ta keda contento ora nos ta ador’e manera Bijbel ta bisa y ta sigui e consehonan cu tin den Bijbel.

2. Con nos mester adora Jehova?

Como cu Jehova ta nos Creador, nos mester dun’e nos devocion exclusivo. (Revelacion 4:11) Esaki ta encera cu nos mester stima y adora e so, sin uza estatua of imagen den nos adoracion.—Lesa Isaias 42:8.

Nos adoracion mester ta limpi y agradabel of, aceptabel, den bista di Jehova. (Romanonan 12:1) Esaki ta encera cu nos mester obedece su leynan. Por ehempel, hende cu ta stima Jehova ta balora y ta obedece su leynan tocante matrimonio. Ademas, nan ta evita tur loke por haci nan mes of otro hende daño, manera uzo di tabaco of droga y mal uzo di alcohol.a

3. Dicon nos mester adora Jehova hunto cu otro sirbidor di Jehova?

Nos reunionnan semanal ta duna nos oportunidad pa alaba Jehova hunto cu otro hende. (Salmo 111:1, 2) Un manera cu nos ta adora Dios hunto ta door di canta cantica di alabanza na dje. (Lesa Salmo 104:33.) Jehova kier pa nos reuni hunto pasobra e ta stima nos y pasobra e sa cu e reunionnan lo yuda nos disfruta di bida pa semper. Y na nos reunionnan, nos ta haya oportunidad pa anima otro.

KICO MAS NOS POR SIÑA?

4. Nos no mester uza imagen den nos adoracion

VIDEO: Dios Ta Permití Nos Usa Imágen den Nos Adorashon na Dje? (3:26)

• Kico a sosode ora algun hende di e pueblo di Dios di antiguedad a ador’e uzando un imagen?

Algun hende ta uza imagen ora nan ta adora Dios, pasobra asina nan ta sinti cu nan ta mas cerca di Dios. Pero bo ta kere cu haciendo esey lo bo hala mas cerca dje of mas leu di dje? Lesa Exodo 20:4-6 y Salmo 106:35, 36. Despues, analisa e siguiente preguntanan:

• Kico hende sa uza pa adora Dios?

• Kico Jehova ta pensa tocante uzo di imagen?

• Kico abo ta pensa tocante uzo di imagen?

5. Ora nos ta adora Jehova so, nos lo ta liber di siñansa falso

VIDEO: E Bèrdat A Hasi Mi Liber (5:16)

Lesa Salmo 91:14. Despues, analisa e siguiente pregunta:

• Kico Jehova a priminti cu lo e haci pa nos ora nos ta stim’e y ta adora e so?

6. Nos ta adora Jehova na nos reunionnan

Ora nos ta canta y ta duna comentario na reunion, nos ta alaba Jehova y ta anima tur hende presente. Lesa Salmo 22:22. Despues, analisa e siguiente preguntanan:

• Bo ta gusta tende comentario na reunion?

• Abo tambe kier prepara un comentario pa bo duna na reunion?

7. Jehova ta keda contento ora nos ta conta otro hende loke nos ta siña

Bo por cuminsa conta otro hende loke bo ta siñando for di Bijbel fo’i awor. Lesa Salmo 9:1 y 34:1. Despues, analisa e siguiente pregunta:

• Kico bo a siña for di Bijbel cu bo tin gana di conta otro hende?

RESUMEN

Nos ta haci nos Creador Jehova contento ora nos ta adora e so, ta alab’e na nos reunionnan y ta conta otro hende loke nos ta siñando for di Bijbel.

Repaso

• Con nos por haya sa con Dios kier pa nos ador’e?

• Dicon nos tin cu adora Jehova so?

• Dicon nos tin cu adora Jehova hunto cu otro sirbidor di dje?

MAS INFORMACION INTERESANTE

Lesa e relato “Mi No Ta Adora Imagen Mas” pa wak con un señora a libra su mes di adoracion falso.

“Bijbel Ta Cambia Bida di Hende” (La Atalaya di 1 di juli 2011)

Wak kico por yuda bo duna comentario na e reunionnan.

“Alaba Jehova den Congregacion” (E Toren di Vigilansia di januari 2019)

Wak con un homber a beneficia masha hopi di e reunionnan aunke no tabata facil pa e bay.

Yehova A Sòru pa Mi (3:07)

Hopi hende ta pensa cu cruz ta representa cristianismo. Pero nos mester uza cruz ora di adora Dios?

“Pakico Testigonan di Jehova No Ta Uza Cruz den Nan Adoracion?” (articulo riba jw.org)