Bo Sa Sinti Miedo Ora Bo Ta Bo So?

Wak e mucha homber riba e plachi. Parce cu e tin miedo y e ta sintie su so, no? Abo a yega di sinti asina?— Tur hende sa sinti asina tin biaha. Bijbel ta conta di algun amigo di Jehova cu tambe a yega di sinti cu nan tabata nan so anto nan a haya miedo. Un di nan ta Elias. Ban siña algo di dje.

Elias a biba na Israel hopi tempo pasa, prome cu Hesus a nace. Acab, e Rey di Israel, no tabata adora Jehova, e Dios berdadero. Acab cu su casa Jezabel, tabata adora Baal, un dios falso. Pesey, casi tur hende na Israel tambe a cuminsa adora Baal. Reina Jezabel tabata hopi mal hende. E kier a mata tur hende cu ta adora Jehova. E kier a mata Elias tambe! Bo sa kico Elias a haci?—

Elias a core bay! El a bay sconde den un cueba te leu aya, na un luga caminda no tin niun niun hende ta biba. Dicon bo ta kere cu Elias a core bay sconde?— Si, pasobra e tabatin miedo. Pero e no mester a sinti miedo. Bo sa pakico? Pasobra e tabata sa cu Jehova por yud’e. Jehova a yega di mustra Elias caba cuanto poder e tin. Un biaha, Jehova a manda candela for di cielo pa contesta oracion di Elias. Kiermen, di mes cu Jehova por a yuda Elias e biaha aki tambe!

Ora Elias tabata den e cueba, Jehova a papia cu ne y a puntr’e: ‘Ta kico bo a bin haci aki?’ Elias a contesta: ‘No a resta niun hende mas cu ta adora bo. Ta ami so a keda. Mi ta mi so, y mi tin miedo cu nan ta bay mata mi.’ Elias a kere cu nan a mata tur otro hende cu ta adora Jehova. Pero Jehova a bisa Elias: ‘No, no ta asina. Tin 7.000 hende cu ta adora mi ainda. No tene miedo. Mi tin mas trabou pa bo!’ Bo ta kere cu Elias a keda contento di tende loke Jehova a bisa?—

Kico abo por siña for di loke a pasa cu Elias?— Cu nunca bo no mester sinti cu bo ta bo so y haya miedo. Bo tin amigo cu ta stima Jehova y cu ta stima abo tambe. Anto corda cu Jehova tin masha hopi poder, y semper e ta cla pa yuda bo! Bo no ta contento di sa cu Jehova nunca no ta bay laga bo?—