SECCION 7

Educacion di Yiunan

“E palabranan aki, cu mi ta ordena bo awe, mester ta riba bo curason. Siña nan cu tur diligencia na bo yiunan.”—Deuteronomio 6:6, 7

Ora Jehova a introduci bida di famia, el a duna mayornan e responsabilidad di cuida nan yiunan. (Colosensenan 3:20) Pues, bo responsabilidad como mayor ta pa siña bo yiu stima Jehova y bira un adulto responsabel. (2 Timoteo 1:5; 3:15) Bo tin cu haya sa tambe kico tin den curason di bo yiu. Claro cu bo mes ehempel ta masha importante. Si bo kier siña bo yiu e Palabra di Jehova, e Palabra mester ta den bo curason prome.—Salmo 40:8.

1 LAGA BO YIUNAN SINTI CU SEMPER NAN POR PAPIA CU BO

LOKE BIJBEL TA BISA: “Tur hende mester ta cla pa scucha, slow pa papia.” (Santiago 1:19) Ta logico cu bo kier pa bo yiunan sinti nan liber pa papia cu bo. Pa bo logra esey, bo mester demostra cu bo ta cla pa scucha ora nan kier papia. Pesey, crea un ambiente di paz cu ta pone nan sinti comodo pa expresa nan mes. (Santiago 3:18) Si nan ta pensa cu bo ta bay reacciona mucho streng of cu lo bo no compronde pa nan, nan lo no habri nan curason ora nan ta papia cu bo. Tene pasenshi cu bo yiunan y bisa nan cu frecuencia cuanto bo ta stima nan.—Mateo 3:17; 1 Corintionan 8:1.

LOKE BO POR HACI:

Ora bo yiunan kier papia, tuma tempo pa scucha nan
Combersa regularmente cu bo yiunan, y no unicamente ora tin problema

2 PURBA DI COMPRONDE LOKE NAN KIER BISA REALMENTE

LOKE BIJBEL TA BISA: “E palabranan di boca di un hende ta awa hundo.” (Proverbionan 18:4) No ta tur ora mucha ta expresa realmente loke nan ta sinti. Pesey mes bo tin cu purba di compronde, no solamente loke nan bisa, pero loke realmente nan ta sinti tambe. Ta normal cu hobennan ta exagera of bisa cos cu en realidad nan no ta pensa. Bijbel ta bisa: “Esun cu responde prome cu e scucha, esey ta bobedad.” (Proverbionan 18:13) Pesey, no rabia lihe.—Proverbionan 19:11.

Un mama ta reacciona demasiado emocional riba loke su yiu muher a bisa

LOKE BO POR HACI:

Ora bo yiu ta papiando, haci bo best pa no interumpie, y, ni maske kico e bisa, no haci un pieu bira baca
Purba di corda con abo tabata sinti tempo cu bo tabatin su edad y kico tabata parce importante pa bo e tempo ey

3 TRAHA COMO TEAM

LOKE BIJBEL TA BISA: “Mi yiu, tende e instruccion di bo tata, y no bandona e siñansa di bo mama.” (Proverbionan 1:8) Jehova a duna tanto tata como mama autoridad riba nan yiunan. Boso tin cu siña boso yiunan pa respeta y obedece boso tur dos. (Efesionan 6:1-3) Un yiu ta ripara si su mayornan no ta “completamente uni den mesun pensamento.” (1 Corintionan 1:10) Si boso no ta di acuerdo cu otro, no discuti dilanti di e muchanan; esey por pone nan perde respet pa boso como mayor.

Un tata ta disciplina su yiu homber den priva mientras e mama y e ruman homber ta sinta den comedor

LOKE BO POR HACI:

Palabra con boso lo disciplina boso yiunan
Si abo cu bo casa tin diferente opinion tocante con pa educa boso yiunan, trata di compronde bo casa su punto di bista

4 PLANIA DI ANTEMANO

LOKE BIJBEL TA BISA: “Instrui un mucha den e caminda cu e mester cana.” (Proverbionan 22:6) No ta pa casualidad un yiu ta bon educa. Aboso mester plania con boso lo educa y disciplina boso yiunan. (Salmo 127:4; Proverbionan 29:17) Pero disciplina no ta nifica duna straf of castigo so. E ta encera yuda boso yiunan compronde pakico tin cierto regla. (Proverbionan 28:7) Ademas, siña nan stima e Palabra di Jehova y compronde su principionan. (Salmo 1:2) Esey lo yuda nan haya un bon consenshi.—Hebreonan 5:14.

LOKE BOSO POR HACI:

Haci sigur cu boso yiunan ta mira Dios como un Persona real cu nan por confia
Yuda nan siña identifica y evita cosnan cu por pone nan cay den inmoralidad, por ehempel cosnan riba Internet of rednan social. Siña nan con pa proteha nan mes for di hende cu ta abusa sexualmente di mucha

For di infancia e mayornan ta siña nan yiu homber stima Jehova y ta yud’e progresa te na bautismo — “Instrui un mucha den e caminda cu e mester cana”