Con Bo Por Tin un Bida di Famia Feliz?—Parti 2

Yiu ta un regalo di Jehova. Jehova kier pa tur mayor cuida e regalo cu nan a haya bon, y e ta duna nan bon conseho pa yuda nan haci esey. Jehova ta bisa e yiunan tambe kico nan mester haci pa nan famia por ta feliz.

1. Ki conseho Jehova ta duna e mayornan?

Jehova kier pa tur mayor stima nan yiunan y pasa mas tanto tempo posibel cu nan. Ademas, Jehova kier pa un mayor proteha su yiunan contra peliger y pa uza principio di Bijbel pa siña nan. (Proverbionan 1:8) Jehova ta bisa e tatanan pa “sigui ... inculca su manera di pensa den nan [yiunan].” (Lesa Efesionan 6:4.) Jehova ta keda contento ora e mayornan ta sigui su guia y ta lanta nan yiunan nan mes y no ta duna otro hende e responsabilidad ey.

2. Ki conseho Jehova ta duna e yiunan?

Jehova ta bisa e yiunan: “Obedece boso mayornan.” (Lesa Colosensenan 3:20.) Ora un yiu ta respeta y ta obedece su mayornan, e ta haci tanto Jehova como su mayornan contento. (Proverbionan 23:22-25) Hesus a pone bon ehempel den esey tempo e tabata mucha. Aunke e tabata perfecto y su mayornan tabata imperfecto, el a obedece y respeta nan.​—Lucas 2:51, 52.

3. Con boso famia por hala mas cerca Dios?

Si bo ta un mayor, sin duda bo kier pa bo yiunan stima Jehova mes tanto cu abo ta stim’e. Con bo por logra esey? Bo por logra esey ora bo sigui e siguiente conseho di Bijbel: “Siña [e palabranan di Jehova] cu tur diligencia na bo yiunan, y papia di nan ora bo ta sinta den bo cas, [y] ora bo ta cana riba caminda.” (Deuteronomio 6:7) E expresion “siña cu tur diligencia” ta nifica cu bo ta ripiti algo pa siña un hende. Siguramente bo sa cu ta importante pa ripiti algo varios bes si bo kier pa bo yiu keda corda esey. E texto ta mustra cu regularmente bo mester busca oportunidad pa papia cu bo yiunan tocante Jehova. Ta importante pa un famia aparta tempo tur siman pa studia Bijbel hunto. Hasta si bo no tin yiu, lo bo beneficia hopi si bo tuma tempo tur siman pa studia Bijbel.

KICO MAS NOS POR SIÑA?

4. Educa bo yiunan cu amor

No ta semper facil pa un mayor educa su yiunan. Con Bijbel por yuda un mayor haci esey? Lesa Santiago 1:19, 20. Despues, analisa e siguiente preguntanan:

• Con un mayor por mustra su yiunan cu e ta stima nan ora e ta papia cu nan?

• Dicon nunca no ta bon pa un mayor disciplina su yiunan ora e ta rabia?a

5. Proteha bo yiunan

Pa un mayor proteha su yiunan, ta masha importante pa e papia cu cada yiu tocante sex. Esey por ta un topico incomodo pa papia tocante dje. Pasa e VIDEO. Despues, analisa e siguiente preguntanan:

VIDEO: Protehá Bo Yunan di Loke Ta Malu (2:58)

• Dicon ta dificil pa algun mayor papia cu nan yiunan tocante sex?

• Kico algun mayor a haci pa splica nan yiunan tocante sex?

Manera a ser profetisa, e mundo di Satanas ta sigui bay di malo pa pio. Lesa 2 Timoteo 3:1, 13. Despues, analisa e siguiente pregunta:

• Algun di e hendenan malbado cu versiculo 13 ta menciona ta hende cu ta abusa sexualmente di mucha. Pesey, dicon ta importante pa un mayor siña su yiunan tocante sex y pa siña nan con pa proteha nan mes contra hende cu kier abusa di nan?

Bo tabata sa?

Testigonan di Jehova tin diferente publicacion pa yuda un mayor siña su yiunan tocante sex y pa yuda e mayor proteha su yiunan contra hende cu por abusa di nan. Por ehempel:

• Protehá Bo Yunan (video)

• Siña for di e Gran Maestro, capitulo 10 y 32

• “Con pa Papia cu Bo Yiu Tocante Sex” (Spierta! Num. 5 2016)

6. Respeta bo mayornan

VIDEO: Kon Mi Por Papia ku Mi Mayornan? (2:19)

• Dicon ta bon pa un mucha of un teenager papia na un manera respetuoso cu su mayornan?

• Con un mucha of un teenager por papia cu su mayornan na un manera respetuoso?

Lesa Proverbionan 1:8. Despues, analisa e siguiente pregunta:

• Con un yiu mester reacciona ora cu su mayornan bis’e kico pa haci?

7. Adora Jehova como famia

Testigonan di Jehova ta aparta un tempo specifico tur siman pa nan por adora Jehova hunto como famia. Con un adoracion como famia ta bay? Pasa e VIDEO. Despues, analisa e siguiente preguntanan:

VIDEO: Adorashon Komo Famia—E Retonan i e Bendishonnan (8:04)

• Kico un famia por haci pa nan por tin adoracion como famia tur siman?

• Kico un mayor por haci pa nan adoracion como famia ta practico y algo cu nan tur por disfruta di dje?—Wak e plachi cu tin na comienso di e les aki.

• Kico por ta algun reto cu por stroba bo famia di studia hunto?

Den Israel di antiguedad, Jehova tabata kier pa famia papia cu otro regularmente tocante e Scritura. Lesa Deuteronomio 6:6, 7. Despues, analisa e siguiente pregunta:

• Con bo por sigui e conseho aki?

Algun sugerencia pa bo adoracion como famia:

• Prepara hunto pa reunion di congregacion.

• Lesa y trata un relato biblico cu bo famia lo gusta.

• Si bo tin yiu chikito, download of print un di e actividadnan pa mucha for di jw.org.

• Si bo tin yiu teenager, trata un di e articulonan pa hoben cu tin riba jw.org.

• Pensa riba un relato biblico y actua of hunga rol di personahenan di Bijbel ey.

• Wak y trata un video riba jw.org.

RESUMEN

Jehova kier pa tur mayor stima, educa y proteha nan yiunan. E kier pa tur yiu respeta y obedece nan mayornan. Ademas, e kier pa tur e miembronan di famia ador’e hunto.

Repaso

• Con un mayor por educa y proteha su yiunan?

• Con un yiu por mustra respet na su mayornan?

• Ki beneficio un famia ta haya ora nan aparta tempo pa adora Jehova hunto tur siman?

MAS INFORMACION INTERESANTE

Kico ta algun les cu bo yiu mester siña prome cu e bira adulto?

“Seis Les Cu Yiunan Tin Cu Siña” (Spierta! Num. 2 2019)

Wak algun conseho practico cu Bijbel ta duna yiunan cu mester cuida nan mayornan di edad.

“Kico Bijbel Ta Bisa Tocante Cuida Mayornan di Edad Avansa?” (articulo riba jw.org)

Wak con un homber cu na prome instante no tabata sa con pa lanta yiu a bira un bon tata.

Yehova A Siña Nos Kon pa Lanta Nos Yunan 5:58

Wak con un tata por logra haya un mihor relacion cu su yiu homber.

“Con un Tata Por Mantene un Bon Relacion cu Su Yiu Homber?” (La Atalaya di 1 di november 2011)