LES 17
Ki Clase di Persona Hesus Ta?
Ora nos lesa tocante e cosnan cu Hesus a haci tempo cu e tabata aki riba Tera, nos lo siña mas tocante su cualidadnan. Segun cu nos ta siña tocante e cualidadnan ey, nos lo haya mas gana di ta amigo di Hesus y di su Tata, Jehova. Laga nos wak algun di e bunita cualidadnan aki y con nos por imita Hesus den nos bida.
1. Den ki sentido Hesus ta manera su Tata?
Tempo Hesus tabata den cielo, el a pasa miles di miyones di aña ta observa su Tata y a siña masha hopi for di dje. Pesey, e ta sinti, pensa y haci mescos cu su Tata. (Lesa Juan 5:19.) Hesus ta imita e cualidadnan di su Tata asina bon cu el a bisa: “Esun cu a mira mi, a mira e Tata tambe.” (Juan 14:9) Segun cu bo ta siña tocante e cualidadnan di Hesus, lo bo siña conoce Jehova mihor. Por ehempel, ora bo mira cuanto interes Hesus a mustra den hende, esey lo yuda bo mira cuanto interes Jehova tin den bo tambe.
2. Con Hesus a mustra cu e ta stima Jehova?
Hesus a bisa: “Mi ta haci precies manera e Tata a manda mi haci, pa mundo por sa cu mi ta stima e Tata.” (Juan 14:31) Tempo Hesus tabata riba Tera, el a demostra cu e ta stima su Tata masha hopi mes pasobra el a obedec’e hasta ora esey tabata dificil p’e. Ademas, como cu Hesus ta stima su Tata, el a siña otro hende tocante su Tata y a yuda nan cera un amistad cu ne.—Juan 14:23.
3. Con Hesus a mustra cu e ta stima hende?
Bijbel ta bisa cu Hesus “tabatin un cari̇́ño special pa hende.” (Proverbionan 8:31) Su amor pa hende a motiv’e pa duna di su tempo y energia pa yuda nan y anima nan. E milagernan cu Hesus a haci no solamente a demostra su poder sino tambe e compasion cu e tin pa hende. (Marco 1:40-42) Hesus a trata hende cu bondad y no a haci distincion di persona. Su palabranan a duna consuelo y speransa na tur hende di bon curason cu tabata scuch’e. Hesus tabata dispuesto pa hasta sufri y muri pa henter humanidad pasobra e ta stima nan. Pero e ta stima specialmente hende cu ta obedece loke el a siña nan.—Lesa Juan 15:13, 14.
KICO MAS NOS POR SIÑA?
Laga nos siña mas tocante e cualidadnan di Hesus y wak con bo por mustra amor y generosidad mescos cu Hesus.
4. Hesus ta stima su Tata
E ehempel di Hesus ta siña nos con nos mester stima Jehova. Lesa Lucas 6:12 y Juan 15:10, y tambe 17:26. Despues di lesa cada texto, analisa e siguiente pregunta:
Con nos por imita Hesus y demostra cu nos ta stima Jehova?
Hesus a stima su Tata celestial y a papia cu ne regularmente den oracion
5. Hesus ta interesa den bienestar di otro hende
Hesus tabata mas interesa den otro hende su bienestar cu esun di dje mes. Hasta ora Hesus tabata cansa, el a duna di su tempo y energia pa yuda otro hende. Lesa Marco 6:30-44. Despues, analisa e siguiente preguntanan:
Den e relato aki, con ta algun manera cu Hesus a mustra interes den hende?—Wak versiculo 31, 34, 41 y 42.
Kico a motiva Hesus pa yuda otro hende?—Wak versiculo 34.
Como cu Hesus ta imita Jehova su cualidadnan perfectamente, kico esey ta siña nos tocante Jehova?
Con bo por imita e manera cu Hesus a mustra interes den otro hende?
6. Hesus ta generoso
Maske Hesus no tabatin hopi cos material, el a comparti loke e tabatin cu otro hende. Hesus ta anima nos pa nos tambe ta generoso. Lesa Echonan 20:35. Despues, analisa e siguiente pregunta:
Segun Hesus, kico nos mester haci pa nos ta feliz?
Pasa e VIDEO. Despues, analisa e siguiente pregunta:
Hasta si nos no tin hopi cos material, con nos por ta generoso?
Bo tabata sa?
Bijbel ta siña cu nos tin cu haci oracion na Jehova den nomber di Hesus. (Lesa Juan 16:23, 24.) Haciendo esey nos ta demostra cu nos ta agradecido na Hesus pa loke el a haci pa nos por tin un amistad cu Jehova.
LOKE HENDE SA BISA: “Dios no ta worry si nos ta sufri.”
Con loke Hesus a haci tempo e tabata riba Tera ta demostra cu Jehova ta interesa den nos?
RESUMEN
Hesus ta stima Jehova y e ta stima hende. Como cu Hesus ta imita su Tata perfectamente, mas bo siña conoce Hesus, mas lo bo siña conoce Jehova.
Repaso
Mescos cu Hesus, con nos por demostra cu nos ta stima Jehova?
Mescos cu Hesus, con nos por demostra cu nos ta stima otro hende?
Ki cualidad di Hesus bo ta gusta mas?
MAS INFORMACION INTERESANTE
Wak algun cualidad di Hesus cu nos por imita.
“Imita Hesus: Sea un Persona ...” (Hesus—E Kaminda, e Bèrdat i e Bida, pagina 317)
Wak dicon ta importante pa haci oracion den nomber di Hesus.
“Dicon Ta Importante pa Resa den Nomber di Hesus?” (La Atalaya di 1 di februari 2008)
Bijbel ta bisa algo tocante e apariencia di Hesus?
Kico nos por siña for di e manera cu Hesus a trata hende muher?
“Dios Ta Duna Hende Muher Respet y Dignidad” (E Toren di Vigilancia di 1 di october 2012)