LES 15
Ken Hesus Ta?
Hesus ta un di e personanan di mas famoso cu a yega di existi. Hopi hende a yega di tende di Hesus, pero nan no sa hopi cos tocante dje. Ademas, hopi hende tin varios opinion tocante ken Hesus ta realmente. Pero, kico Bijbel ta bisa tocante Hesus?
1. Ken Hesus ta?
Hesus ta un spirito poderoso cu ta biba den cielo. Jehova Dios a crea Hesus prome cu tur otro cos. Pesey, Bijbel ta bisa cu Hesus ta “e prome di tur creacion.” (Colosensenan 1:15) Ademas, Bijbel ta referi na Hesus como Dios su “Yiu unigenito” pasobra Hesus ta e unico persona cu Dios a crea directamente, esta sin yudansa di ningun otro persona. (Juan 3:16) Hesus y su Tata, Jehova, ta masha pega cu otro y nan a traha hunto pa crea tur otro cos. (Lesa Proverbionan 8:30.) Hesus y Jehova tabatin y semper lo tin un bon relacion cu otro. Bijbel ta yama Hesus “e Palabra” como cu e ta vocero di Dios. Lealmente e ta duna Dios su mensahe- y instruccionnan na otro persona.—Juan 1:14.
2. Dicon Hesus mester a bin na Tera?
Mas o menos 2.000 aña pasa, Jehova a haci un milager. Jehova a uza su spirito santo pa manda bida di Hesus for di cielo den bariga di un birgen hoben cu yama Maria. Debi na e milager ey, Hesus por a nace como hende aki riba Tera. (Lesa Lucas 1:34, 35.) Hesus a bin na Tera como e Mesias priminti, of Cristo, pa salba humanidad.a Tur e profecianan cu Jehova a laga skirbi den Bijbel tocante e Mesias a cumpli. Debi na esey, hende por a identifica of reconoce Hesus como e Mesias, esta, como “Cristo, Yiu di e Dios bibo.”—Mateo 16:16.
3. Unda Hesus ta aworaki?
Despues cu Hesus a muri, Dios a resucit’e como spirito y el a bolbe na cielo. Den cielo, “Dios a hals’e na un puesto mas halto.” (Filipensenan 2:9) Awor, Hesus ta un spirito masha poderoso den cielo. E unico persona cu ta mas poderoso cu ne ta Jehova.
KICO MAS NOS POR SIÑA?
Haya sa mas tocante Hesus y wak dicon ta asina importante pa siña tocante dje.
4. Hesus no ta Dios Todopoderoso
Bijbel ta mustra cu aunke Hesus ta un spirito poderoso den cielo, e ta obedece su Dios y Tata, Jehova. Dicon? Pasa e VIDEO pa wak ki prueba Bijbel ta duna pa mustra cu Hesus y Dios Todopoderoso no ta igual na otro.
E siguiente textonan lo mustra cu Hesus y Jehova Dios ta dos diferente persona. Despues di lesa cada texto, analisa e preguntanan cu ta sigui:
Lesa Lucas 1:30-32.
Con loke e angel a bisa ta mustra cu Hesus y Jehova, “e Haltisimo”, ta diferente for di otro?
Lesa Mateo 3:16, 17.
Ora Hesus a batisa, kico e stem for di cielo a bisa?
Ken su stem bo ta kere esey tabata?
Lesa Juan 14:28.
Ken ta mas grandi y ken tin mas autoridad, un tata of su yiu?
Hesus a yama Jehova su Tata. Kico esey ta siña nos?
Lesa Juan 12:49.
Hesus ta pensa cu e cu su Tata ta igual? Na ki conclusion bo ta yega?
5. Ki prueba tin cu Hesus tabata e Mesias?
Den Bijbel, tin hopi profecia cu a yuda hende haya sa ken tabata e Mesias, esta, e persona cu Jehova a scoge pa salba humanidad. Pasa e VIDEO. Wak algun profecia tocante Hesus cu a cumpli tempo e tabata riba Tera.
Lesa algun profecia di Bijbel tocante e Mesias y analisa e preguntanan cu ta sigui:
Lesa Mikeas 5:2 y wak unda Bijbel ta bisa cu e Mesias mester a nace.b
E profecia aki a cumpli? Unda Hesus a nace?—Mateo 2:1.
Lesa Salmo 34:20 y Zacarias 12:10 pa wak algun detaye cu Bijbel a profetisa tocante morto di e Mesias.
E profecianan aki a cumpli?—Juan 19:33-37.
Dicon Hesus no por a influencia asunto pa e profecianan aki cumpli?
Ki prueba e profecianan ey ta duna nos tocante Hesus?
6. Nos ta beneficia hopi ora nos ta siña tocante Hesus
Bijbel ta bisa cu ta masha importante pa nos siña tocante Hesus y tocante e trabou cu Dios a dun’e pa haci. Lesa Juan 14:6 y 17:3. Despues, analisa e siguiente pregunta:
Dicon ta asina importante pa siña conoce Hesus?
Hesus a habri caminda pa nos bira amigo di Dios. El a siña hende e berdad tocante Jehova y pa medio di dje nos por haya bida eterno
LOKE HENDE SA BISA: “Testigonan di Jehova no ta kere den Hesus.”
Kico lo bo por bisa un persona cu bisa bo esey?
RESUMEN
Hesus ta un spirito poderoso. E ta Yiu di Dios y e ta e Mesias.
Repaso
Dicon Bijbel ta yama Hesus “e prome di tur creacion”?
Kico Hesus tabata haci prome cu el a bin na Tera?
Ki prueba tin cu Hesus ta e Mesias?
MAS INFORMACION INTERESANTE
Wak ki prueba mas tin cu Hesus ta e Mesias.
“E Profecianan Tocante e Mesias Ta Duna Prueba Cu Hesus Tabata e Mesias?” (articulo riba jw.org)
Wak segun Bijbel den ki manera Dios ta tata di Hesus.
“Dicon Hesus Ta Ser Yama Yiu di Dios?” (articulo riba jw.org)
Wak dicon Trinidad no ta un siñansa di Bijbel.
Lesa con un señora su bida a cambia despues cu el a analisa loke Bijbel ta bisa tocante Hesus.
“Un Señora Hudiu Ta Splica Dicon El A Bolbe Analisa Su Creencianan” (Spièrta! di mei 2013)