LES 54
Ken Ta “e Esclavo Fiel y Prudente” y Kico E Ta Haci?
Hesus ta Cabes di e congregacion cristian. (Efesionan 5:23) Hesus, como Rey den cielo, ta uza “e esclavo fiel y prudente” pa guia su siguidornan riba Tera. (Lesa Mateo 24:45.) Hesucristo mes a nombra “e esclavo” ey y a dun’e un grado di autoridad. Aunke “e esclavo” ey a haya un grado di autoridad, e mester obedece Cristo y sirbi e rumannan di Cristo. Ken e esclavo ey ta? Den ki manera e esclavo ey ta percura pa nos?
1. Ken ta “e esclavo fiel y prudente”?
Semper Jehova a uza un hende homber of un grupo chikito di hende homber pa guia su pueblo. (Malakias 2:7; Hebreonan 1:1) Despues di morto di Hesus, e apostelnan y e ancianonan na Jerusalem tabata guia e congregacion. (Echonan 15:2) Awe, di mes manera, un grupo chikito di anciano ta guia e congregacion cristian. Nan ta ser yama Cuerpo Gobernante di Testigonan di Jehova. Nan ta percura cuminda spiritual y ta dirigi e trabou di predica. E grupo aki ta “e esclavo fiel y prudente cu [Hesus] a nombra.” (Mateo 24:45a) Tur e miembronan di Cuerpo Gobernante ta cristian cu a ser ungi cu spirito santo. Nan ta warda riba e tempo cu nan lo goberna cu Hesus den su Reino celestial ora nan bida aki riba Tera termina.
2. Ki cuminda spiritual e esclavo fiel ta percura pa nos?
E esclavo fiel lo “duna nan [esta, e rumannan cristian] nan cuminda na e debido tempo”, manera Hesus a bisa. (Mateo 24:45b) Cuminda ta yuda nos curpa keda fuerte y saludabel. Di mes manera, cuminda spiritual, esta, instruccion for di Dios su Palabra, ta duna nos e forsa cu nos mester pa keda leal na Jehova y haci e trabou cu Hesus a duna nos. (1 Timoteo 4:6) Nos ta haya e cuminda spiritual ey pa medio di nos reunionnan, asambleanan, congresonan, publicacion basa riba Bijbel y video. Tur esakinan ta yuda nos compronde Dios su boluntad y yuda nos fortalece nos amistad cu ne.
KICO MAS NOS POR SIÑA?
Wak dicon nos tin mester di “e esclavo fiel y prudente”, esta, Cuerpo Gobernante.
Cuerpo Gobernante ta percura cuminda spiritual, instruccion y yudansa practico pa testigonan di Jehova rond mundo
3. E pueblo di Jehova mester ta organisa
Cuerpo Gobernante ta haya guia di Hesus pa sa con nan mester organisa e trabou di testigonan di Jehova. Hesus a guia e prome cristiannan na un manera similar. Pasa e VIDEO.
Lesa 1 Corintionan 14:33, 40. Despues, analisa e siguiente pregunta:
Con e texto aki ta mustra cu Jehova kier pa su Testigonan ta organisa?
4. E esclavo fiel ta organisa nos trabou di predica
E trabou di predica tabata e trabou di mas importante cu e cristiannan di prome siglo a haci. Lesa Echonan 8:14, 25. Despues, analisa e siguiente preguntanan:
Den tempo di e cristiannan di prome siglo, ken a dirigi e trabou di predica?
Ora Pedro cu Juan a haya instruccion cerca e otro apostelnan, kico nan a haci?
E trabou di predica ta e trabou di mas importante cu Cuerpo Gobernante ta organisa. Pasa e VIDEO.
Hesus a mustra con importante e trabou di predica ta. Lesa Marco 13:10. Despues, analisa e siguiente preguntanan:
Dicon Cuerpo Gobernante ta haya e trabou di predica asina importante?
Dicon ta necesario pa “e esclavo fiel y prudente” organisa e trabou aki cu ta tuma luga rond mundo?
5. E esclavo fiel ta guia nos
Cuerpo Gobernante ta guia e cristiannan rond mundo. Con nan ta dicidi ki instruccion nan tin cu duna? Wak con e cuerpo gobernante di e cristiannan di prome siglo a haci esey. Lesa Echonan 15:1, 2. Despues, analisa e siguiente preguntanan:
Ki desacuerdo algun cristian di prome siglo tabatin?
Cerca ken Pablo, Barnabas y algun otro cristian a bay pa resolve e desacuerdo aki?
Lesa Echonan 15:12-18, 23-29. Despues, analisa e siguiente pregunta:
Prome cu e cuerpo gobernante di prome siglo a tuma un decision, con nan a busca Dios su guia tocante e asunto ey?—Wak versiculo 12, 15 y 28.
Lesa Echonan 15:30, 31 y 16:4, 5. Despues, analisa e siguiente preguntanan:
Kico e cristiannan di prome siglo a haci ora nan a haya instruccion for di cuerpo gobernante?
Con Jehova a bendiciona e cristiannan di prome siglo pa nan obediencia?
Lesa 2 Timoteo 3:16 y Santiago 1:5. Despues, analisa e siguiente pregunta:
Ora di tuma decision, unda Cuerpo Gobernante ta busca guia awe?
LOKE HENDE SA BISA: “Si bo haci loke Cuerpo Gobernante ta bisa, ta hende bo ta sigui.”
Kico ta convence abo cu Hesus ta guia Cuerpo Gobernante?
RESUMEN
Cuerpo Gobernante ta “e esclavo fiel y prudente” cu Cristo a nombra. E esclavo ey ta duna e cristiannan rond mundo instruccion y cuminda spiritual.
Repaso
Ken a nombra “e esclavo fiel y prudente”?
Con Cuerpo Gobernante ta percura pa nos?
Bo ta convenci cu Cuerpo Gobernante ta “e esclavo fiel y prudente”?
MAS INFORMACION INTERESANTE
Wak con Cuerpo Gobernante ta organisa pa cumpli cu nan trabou.
“Kico Ta Cuerpo Gobernante di Testigonan di Jehova?” (articulo riba jw.org)
Wak con Cuerpo Gobernante ta haci sigur cu nos ta haya cuminda spiritual cu ta confiabel.
Kico e miembronan di Cuerpo Gobernante ta pensa tocante e trabou cu Hesus a duna nan pa haci?
Con nos reunionnan y congresonan ta mustra cu Jehova ta dirigi Cuerpo Gobernante?