LES 55
Con Bo Por Yuda den Bo Congregacion?
Rond mundo, miyones di hende ta sirbi Jehova felizmente den miles di congregacion. Nan ta contento cu nan ta ricibi guia y instruccion na reunion y nan ta cla pa yuda nan congregacion den varios manera. Bo tambe ta sinti asina?
1. Con ta algun manera cu bo por uza bo tempo y energia pa yuda bo congregacion?
Nos tur por yuda den congregacion. Por ehempel, tin ruman di edad of ruman cu ta malo den bo congregacion? Bo por busca nan pa bay reunion? Bo por yuda nan den otro manera practico, por ehempel, cumpra cos pa nan of yuda nan cu trabou di cas? (Lesa Santiago 1:27.) Ademas, nos por yuda haci nos Salon di Reino limpi y yuda cu mantencion di salon. Niun hende no ta obliga nos pa yuda den congregacion. Ta nos amor pa Dios y pa nos rumannan ta motiva nos pa “ofrece [nos] mes boluntariamente” pa yuda.—Salmo 110:3.
E rumannan cu ta batisa por yuda den mas manera. E ruman hombernan cu ta spiritualmente cualifica por yuda como sirbidor ministerial y despues di tempo como anciano. Anto tanto ruman homber como ruman muher por haci mas hopi den e trabou di predica ora nan sirbi como pionero. Algun Testigo ta scoge pa yuda cu construccion di luga di adoracion y tin otro ta muda bay un area caminda un congregacion tin mester di mas yudansa.
2. Con nos por uza nos placa y nos pertenencianan pa yuda e congregacion?
Nos por “honra Jehova cu [nos] cosnan di balor.” (Proverbionan 3:9) Nos ta sinti nos feliz cu nos por uza nos placa y otro recurso material pa yuda nos congregacion y apoya e trabou di predica mundialmente. (Lesa 2 Corintionan 9:7.) Nos donacionnan ta ser uza tambe pa duna auxilio ora di desaster natural. Hopi ruman ta scoge pa regularmente “pone algo un banda” pa asina nan por haci donacion. (Lesa 1 Corintionan 16:2.) Nos por haci donacion tirando placa den e caha di contribucion na nos luganan di adoracion of nos por haci donacion online via donate.jw.org. Jehova ta duna nos e oportunidad pa mustr’e cuanto nos ta stim’e ora nos ta scoge pa uza nos placa y nos pertenencianan pa yuda e congregacion.
KICO MAS NOS POR SIÑA?
Laga nos wak den ki manera nos por yuda nos congregacion.
3. Nos por uza nos pertenencianan pa yuda e congregacion
Tanto Jehova como Hesus ta stima hende cu ta duna cu alegria. Por ehempel, Hesus a elogia un viuda cu tabatin tiki placa pero cu toch a duna Jehova algo. Lesa Lucas 21:1-4. Despues, analisa e siguiente preguntanan:
Nos mester duna hopi placa pa nos por agrada Jehova?
Con Jehova y Hesus ta sinti ora nos ta duna di curason?
Pasa e VIDEO pa wak con nos donacionnan ta ser uza. Despues, analisa e siguiente pregunta:
Con ta uza nos donacionnan pa yuda e congregacionnan rond mundo?
4. Nos por yuda como boluntario
Den tempo biblico, e adoradornan di Jehova tabata yuda cu entusiasmo pa mantene nan luganan di adoracion. Esaki a encera mas cu djis duna placa. Lesa 2 Cronicanan 34:9-11. Despues, analisa e siguiente pregunta:
Con tur Israelita a yuda mantene e cas di Jehova, esta, nan luga di adoracion?
Pasa e VIDEO pa wak con testigonan di Jehova ta sigui e ehempel biblico ey. Despues, analisa e siguiente preguntanan:
Dicon ta importante pa nos tene nos Salon di Reino limpi y den bon condicion?
Con ta algun manera cu bo por yuda cu esey?
5. Ruman homber por haci esfuerso pa haya mas responsabilidad den congregacion
Bijbel ta anima ruman homber pa haci tur nan esfuerso pa yuda e congregacion. Pa wak con un ruman homber por haci esey, pasa e VIDEO. Despues, analisa e siguiente pregunta:
Kico Ryan a haci pa yuda mas den congregacion?
Bijbel ta bisa kico ruman homber mester cumpli cu ne pa nan por sirbi como sirbidor ministerial y anciano. Lesa 1 Timoteo 3:1-13. Despues, analisa e siguiente preguntanan:
Kico e ruman hombernan cu kier sirbi como sirbidor ministerial y anciano mester cumpli cu ne?
Con nan famia mester ta?—Wak versiculo 4 y 11.
Ora ruman homber ta haci tur nan esfuerso pa cumpli cu loke Bijbel ta bisa, con tur hende den congregacion ta beneficia?
SI UN HENDE PUNTRA: “Unda testigonan di Jehova ta haya placa pa financia nan obra?”
Kico lo bo bisa?
RESUMEN
Jehova ta keda masha contento ora nos ta uza nos tempo, energia y pertenencianan pa yuda nos congregacion.
Repaso
Con nos por uza nos tempo y energia pa yuda e congregacion?
Con nos por uza nos placa y nos pertenencianan pa yuda e congregacion?
Con lo bo kier yuda e congregacion?
MAS INFORMACION INTERESANTE
Wak dicon Dios no ta exigi pa su sirbidornan duna diesmo mas den nos tempo.
“Kico Bijbel Ta Bisa Tocante Diesmo?” (articulo riba jw.org)
Bijbel ta asigna algun trabou na hende homber batisa. Pero kico si un hende muher batisa tin di haci un di e trabounan ey?
“Autoridad Cu Anciano Tin den Congregacion” (E Toren di Vigilancia di Februari 2021)
Wak con algun ruman homber ta demostra curashi y ta haci sacrificio grandi pa hiba publicacion pa nan rumannan.
Wak con e manera cu nos obra ta ser financia ta hopi diferente for di otro organisacionnan religioso.
“Con e Obra di Testigonan di Jehova Ta Ser Financia?” (articulo riba jw.org)