LES 57
Ki Yudansa Tin si Bo A Comete un Pica Serio?
Tin biaha, lo bo comete fayo a pesar cu bo ta stima Jehova hopi y ta haci esfuerso pa evita di hacie tristo. Sinembargo, tin pica ta mas serio cu otro. (1 Corintionan 6:9, 10) Si bo a comete un pica serio, corda esaki: Jehova no a stop di stima bo, y e ta cla pa pordona bo y yuda bo.
1. Kico nos mester haci pa Jehova pordona nos?
Hende cu ta stima Jehova ta bira masha tristo ora nan realisa cu nan a comete un pica serio. Pero Jehova ta consola nan cu e promesa cu el a haci na su pueblo: “Maske boso picanan ta cora manera sanger, nan lo bira blanco manera sneeuw.” (Isaias 1:18) Si nos arepenti di curason, Jehova lo pordona nos completamente. Con nos ta demostra cu nos a arepenti? Nos ta demostra esey ora nos ta sinti duele profundo di loke nos a haci, ta stop di haci loke ta malo y ta pidi Jehova pa pordona nos. Despues, nos ta haci tur nos esfuerso pa cambia cualkier mal pensamento of custumber cu a hiba nos na comete e pica. Anto, nos ta sigui haci esfuerso pa biba di acuerdo cu Jehova su normanan moral limpi.—Lesa Isaias 55:6, 7.
2. Con Jehova ta uza e ancianonan pa yuda nos ora nos peca?
Si nos comete un pica serio, Jehova ta bisa nos pa “yama e ancianonan di congregacion.” (Lesa Santiago 5:14, 15.) E ancianonan ta stima Jehova y su carnenan. Nan a siña con pa yuda nos drecha nos relacion cu Jehova.—Galationan 6:1.
Con e ancianonan ta yuda nos si nos comete un pica serio? Dos of tres anciano lo uza texto di Bijbel pa mustra nos dicon loke nos a haci ta robes. Ademas, nan lo duna nos bon conseho y animacion cu por yuda nos pa no bolbe comete pica serio. Si un persona cu a comete pica serio no arepenti, e ancianonan lo saca e persona aki for di e congregacion pa e no influencia otro hende.—1 Corintionan 5:13.
KICO MAS NOS POR SIÑA?
Haya mas aprecio pa e manera cu Jehova ta yuda nos si nos comete un pica serio.
3. Ora nos confesa nos pica, nos por drecha nos amistad cu Jehova
Cualkier pica cu nos comete ta duel Jehova. Pesey, nos tin cu confesa na dje. Lesa Salmo 32:1-5. Despues, analisa e siguiente pregunta:
Dicon ta bon pa nos confesa nos picanan na Jehova en bes di purba sconde nan?
Despues cu nos a confesa nos picanan na Jehova, ta importante tambe pa nos pidi e ancianonan pa yudansa. Ora nos haci esey, nos lo sinti nos mihor. Pasa e VIDEO. Despues, analisa e siguiente pregunta:
Con e ancianonan a yuda Canon bolbe cerca Jehova?
Ora nos ta papia cu e ancianonan, nos mester ta habri y honesto cu nan pasobra nan t’ey pa yuda nos. Lesa Santiago 5:16. Despues, analisa e siguiente pregunta:
Dicon ta mas facil pa e ancianonan yuda nos ora nos ta honesto cu nan?
Confesa bo pica, sea honesto cu e ancianonan y acepta Jehova su yudansa amoroso
4. Jehova ta mustra misericordia na hende cu peca
Si un persona cu a comete un pica serio ta nenga di obedece Jehova su normanan, e ta ser saca for di e congregacion. Nos no ta pasa tempo mas cu e persona ey, pero nos por cumind’e brevemente. Lesa 1 Corintionan 5:6, 11. Despues, analisa e siguiente pregunta:
Mescos cu zuurdeeg ta fermenta henter un mansa, con pasamento di tempo cu un pecador cu no a arepenti ta afecta e congregacion?
Pa imita e misericordia di Jehova, e ancianonan ta haci tur nan esfuerso pa yuda hende cu a ser saca for di e congregacion. Hopi hende cu a ser saca for di e congregacion a bin bek. Dicon? Wel, aunke e disciplina cu nan a ricibi tabata doloroso, e disciplina a yuda nan realisa cu loke nan a haci tabata robes.—Salmo 141:5.
Con e manera cu Jehova ta trata hende cu a peca ta mustra cu e ta rasonabel, misericordioso y amoroso?
5. Jehova ta pordona nos ora nos arepenti di nos pica
Hesus a uza un ilustracion cu ta laga nos compronde con Jehova ta sintie ora un persona arepenti. Lesa Lucas 15:1-7. Despues, analisa e siguiente pregunta:
Kico e ilustracion aki ta siña bo tocante Jehova?
Lesa Ezekiel 33:11. Despues, analisa e siguiente pregunta:
Ki paso importante nos tin cu tuma pa demostra cu di berdad nos a arepenti?
Mescos cu un wardador di carne ta stima su carnenan, Jehova tambe ta stima su carnenan masha hopi mes
LOKE HENDE SA BISA: “Mi no kier bay papia cu e ancianonan pasobra mi tin miedo cu nan lo saca mi for di congregacion.”
Kico lo bo bisa un hende cu ta pensa asina?
RESUMEN
Si nos a comete un pica serio pero nos ta sinti duele profundo di loke nos a haci y nos ta determina pa no bolbe comete e pica ey, Jehova lo pordona nos.
Repaso
Dicon ta bon pa nos confesa nos picanan na Jehova?
Kico nos mester haci pa Jehova pordona nos picanan?
Si nos a comete un pica serio, dicon ta bon pa nos busca yudansa cerca e ancianonan?
MAS INFORMACION INTERESANTE
Wak con un homber a experencia e misericordia di Jehova cu Isaias 1:18 ta papia di dje.
Con ancianonan ta purba yuda rumannan cu comete un pica serio?
Wak con e ancianonan ta mustra amor y misericordia na un persona cu no a arepenti.
Den e storia di bida “Mi Mester A Bolbe Cerca Jehova”, wak con un homber cu a bandona e berdad a sinti cu Jehova tabata kier pa e bolbe cerca dje.
“Bijbel Ta Cambia Bida di Hende” (La Atalaya di 1 di april 2012)