LES 59
Bo Por Keda Fiel na Jehova a Pesar di Persecucion
Tardi of trempan, nos tur lo haya nos cu oposicion. Anto hende lo por bay asina leu di persigui nos. Esey mester spanta nos?
1. Dicon nos por spera cu hende lo persigui nos?
Bijbel ta bisa bon cla: “Tur hende cu ta desea di biba cu devocion na Dios como discipel di Cristo Hesus tambe lo ser persigui.” (2 Timoteo 3:12) Hende a persigui Hesus pasobra e no tabata parti di e mundo di Satanas. Nos tampoco no ta parti di mundo; pesey, no ta sorprende nos cu gobierno y organisacion religioso di e mundo aki ta persigui nos.—Juan 15:18, 19.
2. Con nos por prepara nos mes pa enfrenta persecucion?
Ta importante pa nos fortalece nos confianza den Jehova for di awor. Tuma tempo tur dia pa haci oracion y pa lesa Bijbel. Asisti regularmente na reunion. Tur e cosnan aki lo duna bo forsa y curashi pa enfrenta cualkier persecucion, hasta si ta bo famia ta persigui bo. Apostel Pablo, kende a ser persigui hopi biaha, a skirbi: “Jehova ta mi ayudante; lo mi no tin miedo.”—Hebreonan 13:6.
Un manera mas cu nos por haya curashi pa enfrenta persecucion ta door di predica regularmente. Ora nos ta predica, nos ta siña confia den Jehova y vence miedo di hende. (Proverbionan 29:25) Si nos haya mas curashi pa predica for di awor, esey lo yuda nos pa sigui predica hasta ora gobierno prohibi nos trabou.—1 Tesalonicensenan 2:2.
3. Ora nos ta keda fiel na Jehova a pesar di persecucion, con esey ta beneficia nos?
Naturalmente, no ta dushi ora hende ta persigui nos. Pero ora nos ta persevera a pesar di persecucion, nos fe ta bira mas fuerte. Ademas, ora nos ta sinti cu nos no tin forsa mas pa sigui, Jehova ta yuda nos y esey ta hala nos mas cerca dje. (Lesa Santiago 1:2-4.) Jehova ta bira tristo ora e mira nos sufri, pero e ta keda contento ora e mira nos persevera. Bijbel ta bisa: “Si boso ta soporta sufrimento pasobra boso a haci bon, esaki ta algo cu ta agrada Dios.” (1 Pedro 2:20) Si nos keda fiel na Jehova, lo e recompensa nos cu bida eterno den e mundo nobo. E tempo ey, nos tur lo sirbi Jehova y niun hende lo no stroba nos di haci esey.—Mateo 24:13.
KICO MAS NOS POR SIÑA?
Laga nos wak dicon bo por keda fiel na Jehova a pesar di persecucion y cu e lo recompensa bo.
4. Bo por keda leal a pesar di oposicion di famia
Hesus tabata sa cu algun di nos famianan lo no keda contento cu nos ta sirbi Jehova. Lesa Mateo 10:34-36. Despues, analisa e siguiente pregunta:
Ora un hende cuminsa sirbi Jehova, kico su famia por bisa of haci?
Pa wak un ehempel di esaki, pasa e VIDEO. Despues, analisa e siguiente pregunta:
Kico lo bo haci si un amigo of famia purba di stop bo di sirbi Jehova?
Lesa Salmo 27:10 y Marco 10:29, 30. Despues di lesa cada texto, analisa e siguiente pregunta:
Con e promesa cu e texto aki ta menciona por yuda bo ora un famia of amigo kier purba di stop bo di sirbi Jehova?
5. Sigui sirbi Jehova a pesar di persecucion
Nos mester tin curashi pa sigui sirbi Jehova ora otro hende kier purba di stop nos di haci esey. Pasa e VIDEO. Despues, analisa e siguiente pregunta:
Con ehempel di e rumannan den e video ta fortalece bo?
Lesa Echonan 5:27-29 y Hebreonan 10:24, 25. Despues di lesa cada texto, analisa e siguiente pregunta:
Dicon ta masha importante pa nos sigui sirbi Jehova hasta si gobierno prohibi nos di reuni hunto y di predica?
6. Jehova lo yuda bo persevera
Testigonan di Jehova rond mundo y di diferente edad ta sigui sirbi Jehova lealmente hasta ora nan ta ser persigui. Pasa e VIDEO pa wak kico a yuda nan haci esaki. Despues, analisa e siguiente pregunta:
Kico a yuda e Testigonan den e video pa persevera?
Lesa Romanonan 8:35, 37-39 y Filipensenan 4:13. Despues di lesa cada texto, analisa e siguiente pregunta:
Con e texto aki ta sigura bo cu bo por persevera bou di cualkier prueba?
Lesa Mateo 5:10-12. Despues, analisa e siguiente pregunta:
Dicon bo por ta feliz hasta ora bo haya bo cu persecucion?
Miyones di sirbidor di Jehova ta sigui sirbie fielmente a pesar di persecucion. Abo tambe por!
LOKE HENDE SA BISA: “Ami si lo no por soporta persecucion.”
Ki texto por yuda un hende cu ta pensa asina sintie sigur cu e por keda leal a pesar di persecucion?
RESUMEN
Jehova ta keda contento cu nos esfuerso pa sirbie a pesar di persecucion. Cu su yudansa, nos por persevera!
Repaso
Dicon un cristian por spera di hay’e cu persecucion?
Kico bo por haci for di awor pa bo por enfrenta persecucion?
Dicon bo por tin sigur cu bo por sirbi Jehova a pesar di cualkier prueba?
MAS INFORMACION INTERESANTE
Wak con un ruman homber hoben ta splica con Jehova a yud’e persevera tempo cu el a ser encarcela pa motibo cu el a keda neutral.
Wak kico a yuda un pareha casa sirbi Jehova fielmente pa hopi aña a pesar di persecucion.
Wak con bo por demostra curashi ora bo haya bo cu persecucion.
“Prepara Awor pa Persecucion” (E Toren di Vigilansia di juli 2019)
Con nos mester mira oposicion di nos famia? Kico nos por haci pa keda na paz cu nos famia y na mes momento keda fiel na Jehova?
“E Berdad No Ta Trece ‘Paz, Sino Spada’” (E Toren di Vigilansia di october 2017)