Solucion Permanente pa Pobresa

APESAR di e informenan negativo di rond mundo tocante pobresa, tin hende cu ta keda optimista cu nos por haci algo concreto. Por ehempel, segun e titular den Manila Bulletin, Banco di Desaroyo Asiatico a informa cu “Asia por elimina pobresa den 25 aña.” E banco a recomenda crecemento economico como un manera pa saca hende for di nan pobresa profundo.

Otro organisacionnan y gobiernonan a bin cu un lista largo di sugerencianan y plannan pa purba resolve e problema. Entre nan tin: programa di seguro social, miho educacion, cansela debe cu paisnan den desaroyo tin serca nacionnan industrialisa, elimina barera di importacion pa asina e paisnan cu tin porsentahe grandi di hende pober por bende nan productonan mas facilmente, y vivienda economico pa hende pober.

Na aña 2000, e Asamblea General di Nacionnan Uni a pone metanan cu mester wordo alcansa pa aña 2015. Den esakinan tawatin eliminacion di hamber y pobresa extremo y tambe e desigualdad excesivo di entrada den varios pais. Pa eleva cu e metanan ei por ta, hopi ta duda cu por alcansa nan den e mundo desuni aki.

Pasonan Practico pa Trata cu Pobresa

Mirando cu no tin mucho speransa riba escala mundial pa berdadero adelanto, unda bo por acudi pa yudansa? Manera nos a menciona anteriormente, tin un fuente di sabiduria practico cu por yuda hende for di awor. Cua fuente? Esei ta Bijbel, e Palabra di Dios.

Kico ta haci Bijbel diferente for di tur otro fuente di informacion? E ta bin di e autoridad supremo, nos Creador. Den su paginanan, nos Creador a inclui hoyanan di sabiduria—principionan practico cu ta aplicabel pa tur hende, na tur luga y na tur tempo. Aplicacion di e principionan aki por yuda hende pober disfruta di un bida mas satisfaciente for di awor. Laga nos wak un par di ehempel.

Tene un punto di bista apropiado di placa. Bijbel ta bisa: “Sabiduria ta proteccion mescos cu placa ta proteccion. Ma e bentaha di conocemento ta cu sabiduria ta preserva bida di esnan cu ta pose’e.” (Eclesiastes 7:12) Kico ta e punto? Placa no ta tur cos. Ta berdad cu e ta duna cierto siguridad. E ta permiti nos cumpra cierto cosnan cu nos tin mester, pero e tin su limitacionnan. Tin cosnan di mas balor cu placa no por cumpra. Ora nos ta reconoce e echo aki, esei lo yuda nos tene cos material den nan perspectiva corecto, evitando asina e frustracionnan di esnan kende nan bida ta drei rond di acumula mas tanto placa posibel. Placa no por cumpra bida, pero ora nos ta actua sabi esei por proteha bida awor y asta habri e posibilidad di bida sin fin.

Biba segun bo forsa. Nos deseonan no necesariamente ta mescos cu nos necesidadnan. Mester duna prioridad na nos necesidadnan. Nos por combence nos mes facilmente cu nos mester di algo, siendo cu en realidad e ta un deseo y no un necesidad. E prome cosnan cu e persona sabi lo cubri cu su entrada ta su necesidadnan inmediato manera cuminda, paña, dak riba cabes, etcetera. Despues, prome cu e gasta cen riba cualkier otro cos, lo e determina si loke el a sobra por cubri cosnan adicional. Den un di su ilustracionnan, Hesus a recomenda pa un persona “sinta calcula e gastonan prome, pa mira si e tin suficiente.”—Lucas 14:28.

Na Filipinas, Eufrosina, un mayor soltero di tres yiu, tawatin e desafio di gana su pan di cada dia y sigui un presupuesto stricto ya cu su casa a bai lag’e un par di aña pasa. Den esei el a siña su yiunan mira kico mester a haya prioridad den e presupuesto. Por ehempel, e yiunan por mira algo cu nan tin gana di dje. En bes di djis bisa no, e ta rasona cu nan bisando: “Wel, si boso kier boso por haya e cos ei, pero ta boso tin cu dicidi. Ta pa un cos e placa ta yega. Sea nos ta cumpra e cos aki cu boso kier, of nos ta cumpra poco carni cu berdura pa come banda di nos aros e siman aki. Awor, cua di nan boso kier? Ta boso ta dicidi.” Por lo general, e muchanan ta capta e punto mesora y nan tur ta prefera di haya cuminda en bes di otro cos.

Keda satisfecho. Un otro principio di Bijbel ta bisa: “Si nos tin cuminda y paña pa bisti, cu esakinan nos mester ta contento.” (1 Timoteo 6:8) Placa riba su mes no ta trece felicidad. Hopi hende rico ta infelis, mientras cu hopi hende pober ta masha felis. E ultimonan aki a siña keda satisfecho cu djis e simpel cosnan necesario den bida. Hesus a papia di un ‘wowo simpel’ cu ta enfoca riba e cosnan mas importante. (Mateo 6:22, NW) Esaki ta yuda un persona keda contento cu loke e tin. Hopi hende pober ta sinti nan basta satisfecho pasobra nan a cultiva un bon relacion cu Dios y tin un bida di famia felis—cosnan cu placa no por cumpra.

Esakinan ta djis un par di ehempel di e sugerencianan practico di Bijbel cu por yuda hende pober trata cu nan situacion. Tin hopi mas. Por ehempel, evita bicionan manera humamento y wega di placa, cuanan ta malgasta bo recursonan; wak kico ta e cosnan mas importante den bida, particularmente metanan spiritual; caminda tin poco oportunidad di trabou, purba ofrece un servicio cu otro hende tin mester. (Proverbionan 22:29; 23:21; Filipensenan 1:9-11) Bijbel ta recomenda bo aplica tal “sabiduria practico y habilidad di pensa” pasobra “nan lo resulta di ta bida pa bo alma.”—Proverbionan 3:21, 22, NW.

Aunke e sugerencianan di Bijbel por duna algun alivio na esnan cu ta lucha cu pobresa, ainda ta keda pregunta tocante futuro. Hende pober ta destina pa keda den gara di pobresa pa semper? E desigualdadnan entre hende hopi rico y esnan sumamente pober lo caba un dia? Laga nos analisa un solucion cu hopi hende no ta na haltura di dje.

Bijbel Ta Duna Motibo pa Speransa

Hopi hende ta reconoce cu Bijbel ta un bon buki. Sinembargo, hopi bes nan no sa mes cu e ta duna informacion spesifico cu ta mustra cu pronto cambionan grandi lo tuma luga.

E proposito di Dios ta pa tuma accion pa resolve problemanan di humanidad, manera pobresa. Ya cu gobiernonan humano a resulta di ta incapas of no dispuesto pa haci esei, e intencion di Dios ta pa remplasa nan. Con? Wel, Bijbel ta bisa enfaticamente na Daniel 2:44: “E Dios di shelo lo lanta un reino cu nunca lo no wordo destrui, y e reino ei lo no pasa pa ningun otro pueblo; e lo garna y pone un fin na tur e reinonan aki, ma e mes lo dura pa semper.”

Despues cu Dios elimina e “reinonan” of gobiernonan aki, e Gobernante nombra pa Dios mes lo actua. E Gobernante ei no ta un hende sino un ser celestial poderoso manera Dios mes, cu ta posee e capasidad pa trece e cambionan drastico cu ta necesario pa elimina e desigualdadnan actual. Dios a scohe su mes Yiu pa haci esaki. (Echonan 17:31) Salmo 72:12-14 ta describi loke e Gobernante aki lo haci, bisando: “E lo libra esun den necesidad ora cu e sclama pa yudansa, esun aflihi tambe y esun cu no tin ningun hende pa yud’e. E lo tin compasion di e pober y di esun den necesidad, y e lo salba bida di esnan den necesidad. E lo rescata nan bida for di opresion y violencia; y nan sanger lo ta precioso den su bista.” Ki un futuro maraviyoso ta warda nos! Por fin lo bin un alivio! E Gobernante cu Dios a nombra lo actua na fabor di hende pober y esnan di condicion humilde.

N’e tempo ei hopi problema relaciona cu pobresa lo ser resolvi. Salmo 72:16 (NW) ta bisa: “Lo yega di tin abundancia di grano riba tera; riba top di e seronan lo tin sobreabundancia.” Nunca mas lo tin hamber como resultado di scarsedad di cuminda, falta di placa of mal maneho.

Otro problemanan tambe lo ser resolvi. Por ehempel, awe un porsentahe halto di habitante di tera no tin nan mes cas. Sinembargo, Dios ta priminti: “Nan lo traha cas y biba den nan; tambe nan lo planta cunucunan di wendruif y come nan fruta. Nan lo no traha cas pa otro hende biba aden, ni planta pa otro hende come; pasobra manera e dianan di un palo, asina e dianan di mi pueblo lo ta; y mi scohinan lo disfruta di e obra di nan mannan pa hopi tempo.” (Isaias 65:21, 22) Cada ken lo tin su mes cas y disfruta di su trabou. Pues Dios ta priminti un solucion total y permanente pa pobresa. Nunca mas lo tin e brecha inmenso entre rico cu pober, ni ningun hende cu ta biba den condicionnan miserabel.

Ora bo tende di e promesanan di Bijbel aki pa prome bes, kisas bo ta sinti cu nan no ta realistico. Sinembargo, ora bo analisa Bijbel mas djacerca, bo ta mira cu tur e promesanan di Dios di den pasado a bira realidad. (Isaias 55:11) Pues e punto no ta si nan lo cumpli. Mas bien, e berdadero pregunta ta, Kico bo tin cu haci pa beneficia di dje ora nan tuma luga?

Abo Lo T’ei?

Siendo cu e gobierno ta di Dios, nos mester ta e tipo di hende cu Dios lo acepta como ciudadano bou di e gobernacion ei. El a splica nos bon cla con nos por bin na remarca pa esei, y e instruccionnan ei nos ta haya den Bijbel.

E Gobernante nombra, e Yiu di Dios, ta husto. (Isaias 11:3-5) Pues esnan cu ta haya oportunidad di biba bou di e gobierno aki tambe mester ta husto. Proverbionan 2:21 y 22 ta bisa: “E rectonan lo biba den e tera, y e perfectonan lo keda den dje; ma e malbadonan lo wordo corta kita for di tera, y e traidonan lo wordo ranca for di dje cu raiz cu tur.”

Tin un manera cu nos por haya sa con nos por cumpli cu e rekisitonan aki? Si, tin. Door di studia Bijbel y aplica su instruccionnan, abo tambe lo por disfruta di e futuro maraviyoso aki. (Huan 17:3) Testigonan di Yehova lo ta contento pa yuda bo cu e studio ei. Nos ta invita bo pa probecha di e oportunidad aki pa bo tambe por ta den un sosiedad cu nunca mas lo pasa den pobresa ni inhusticia.

[Plachi na pagina 5]

Eufrosina: “Un presupuesto stricto ta yuda mi famia haya loke nan tin mester”

[Plachi na pagina 6]

Placa no por cumpra un bon relacion cu Dios ni un famia felis