Sigui Hesus Su Ehempel y Mustra Interes Profundo den Hende Pober

POBRESA y opresion ta casi mes bieu cu humanidad. Aunke e Lei cu Dios a duna Israel a trata na proteha hende pober y alivia nan sufrimento, e nacion hopi bes no a obedece e Lei ei. (Amos 2:6) Profeta Ezekiel a denuncia e manera cu nan tawata trata hende pober. El a bisa: “E hendenan di e tera a practica opresion y a comete ladronicia; nan a maltrata e pobernan y esnan den necesidad y a oprimi e stranheronan door di nenga di duna nan nan derecho.”—Ezekiel 22:29.

Tempo Hesus tawata riba tera e situacion tawata mescos. Lidernan religioso no a mustra ni un tiki interes den hende pober ni den hende den necesidad. E lidernan religioso a ser describi como “stimado di placa” cu tawata “devora cas di biuda” y cu tawata mas interesa den mantene nan tradicionnan cu cuida hende di edad y esnan den necesidad. (Lucas 16:14; 20:47; Mateo 15:5, 6) Un punto interesante ta cu den Hesus su comparacion di e bon Samaritano, el a conta cu ora un sacerdote y un levita a mira un homber herida, nan a crusa caminda y cana pas’e voorbij en bes di bai yud’e.—Lucas 10:30-37.

Hesus A Mustra Interes Profundo den Hende Pober

E relatonan di Hesus su bida cu tin para skirbi den e Evangelionan ta mustra cu el a compronde bon bon e dificultadnan di hende pober y cu e tawata masha pendiente di nan necesidadnan. Aunke Hesus tawata biba den shelo, el a bandona su gloria, bira hende y ‘a bira pober pa nos.’ (2 Corintionan 8:9) Ora Hesus a mira e multitudnan, “el a sinti compasion pa nan, pasobra nan tawata cansa y plama, manera carne sin wardado.” (Mateo 9:36) E relato di e biuda pober ta mustra cu Hesus no a keda impresiona cu e ofrendanan grandi di e hendenan rico, kendenan tawata duna “for di nan abundancia.” Loke a impresion’e tawata e contribucion chikito di e biuda pober. E acto ei a conmove Hesus su curason pasobra e biuda “a tir’aden for di su pobresa tur loke cu e tawatin pa biba di dje.”—Lucas 21:4.

Hesus no solamente a sinti compasion pa hende pober, sino tambe a mustra interes personal den nan necesidadnan. E cu su apostelnan tawatin un fondo for di cua nan tawata duna Israelitanan pober algo. (Mateo 26:6-9; Huan 12:5-8; 13:29) Hesus a anima personanan cu kier a bira su siguido pa reconoce nan obligacion di yuda hende den necesidad. El a bisa un hoben gobernante rico: “Bende tur bo propiedadnan, y partie pa hende pober, y lo bo tin tesoro den shelo; y bin, sigui mi.” E echo cu e homber no tawata dispuesto pa renuncia su propiedadnan ta mustra cu su amor pa rikesa tawata mas grandi cu su amor pa Dios y pa prohimo. Pues, e no tawatin e cualidadnan necesario pa ser un disipel di Hesus.—Lucas 18:22, 23.

Cristo Su Siguidonan Ta Profundamente Interesa den Hende Pober

Despues di Hesus su morto, e apostelnan y otro siguidonan di Cristo a sigui mustra interes profundo den esnan pober entre nan. Rond di aña 49 di nos era, apostel Pablo a topa Santiago, Pedro y Huan y nan a papia tocante e asignacion cu Pablo a haya for di Señor Hesucristo pa predica e bon nobo. Nan a bai di acuerdo pa Pablo cu Barnabas bai na e nacionnan ‘pagano’, consentrando nan predicacion riba hende no Hudiu. Sinembargo, Santiago cu su compañeronan a pidi Pablo cu Barnabas pa “corda riba e pobernan.” Anto esei ta loke Pablo “tawata ansioso pa haci.”—Galationan 2:7-10.

Durante e reinado di emperado Claudio, un hamber severo a afecta varios parti di e Imperio Romano. Debi na esei, cristiannan na Antiokia “a determina cu, segun alcanse, cada un di nan lo a manda un contribucion como un sosten pa e rumannan cu tawata biba na Hudea. Y esaki nan a haci y a mand’e pa medio di Barnabas y Saulo pa e ancianonan.”—Echonan 11:28-30.

Cristiannan berdadero djawe tambe ta reconoce cu siguidonan di Hesus mester mustra interes profundo den hende pober y esnan den necesidad. Nan mester mustra interes specialmente den esnan cu ta rumannan den fe. (Galationan 6:10) Pesei nan ta mustra cu nan ta realmente precupa pa yuda esnan cu tin mester di cosnan di prome necesidad. Por ehempel, na 1998 un secura severo a destrosa gran parti di e region nortost na Brazil. E secura a destrui cosechanan di aros, bonchi y maishi. Esei a resulta den hamber den un area extenso, e piyo den 15 aña. Na algun luga, asta awa di bebe a bira scars. Testigonan di Yehova cu tawata biba den otro partinan di e pais mesora a organisa comitenan di yudansa, y den poco tempo, nan a recohe tonelada di cuminda y a paga e gasto pa transporta e articulonan.

Testigonan cu a contribui cu placa y articulonan di yudansa a skirbi: “Nos ta masha contento di por a yuda nos rumannan, specialmente door cu nos tin sigur cu nos a haci Yehova su curason contento. Nunca nos ta lubida e palabranan di Santiago 2:15 y 16.” E versiculonan biblico ei ta bisa: “Si un ruman homber of ruman muher ta sin paña y den necesidad di e cuminda di cada dia, y un di boso bisa nan: ‘Bai na pas, tene bo curpa cayente y yena bo bariga’, y sinembargo, boso no ta duna nan loke ta necesario pa nan curpa, kico esei ta bal?”

Den un di e congregacionnan di Testigonan di Yehova den e stad di São Paulo, tin un Testigo humilde y celoso cu ta pober y cu hopi bes tawatin cu lucha pa haya e necesidadnan basico di bida. El a bisa: “Maske mi ta biba den pobresa, e mensahe di Bijbel a duna mi bida berdadero nificacion. Mi no sa con lo a para cu mi si mi no a haya yudansa for di mi rumannan Testigo.” Poco tempo pasa, e señora cristian trahado aki mester a haci un operacion pero e no tawatin moda di paga hospital. Den e caso en particular aki, rumannan cristian den congregacion tawata den posicion di cubri e gasto di e operacion. Rond mundo cristiannan berdadero ta duna yudansa na rumannan den fe cu ta den necesidad.

Sinembargo, pa conmovedor cu experencianan asina por ta, ta bisto cu tal esfuerso sinsero lo no elimina pobresa. Asta gobiernonan poderoso y agencianan internacional grandi cu ta rindi yudansa y cu tin cierto grado di exito, no a logra elimina e problema bieu aki di pobresa. Pesei e pregunta ta lanta: Kico lo ta e solucion definitivo pa pobresa y otro problemanan cu ta tormenta humanidad?

Siñansanan di Bijbel Ta Duna Yudansa Duradero

E relatonan di Evangelio ta conta cu Hesucristo regularmente a haci bon obra pa hende cu tawata pober of cu tawatin otro necesidad. (Mateo 14:14-21) Pero na cua actividad el a duna prioridad? Na un ocasion, despues cu Hesus a dedica algun tempo na yuda esnan den necesidad, el a bisa su disipelnan: “Laga nos bai otro caminda, na e stadnan serca aki banda, pa mi por predica ayanan tambe.” Dicon Hesus a interumpi su trabou na fabor di hende malo y den necesidad pa reanuda su actividad di predica? El a splica bisando: “Ta pa e proposito aki [esta, pa predica] mi a wordo manda.” (Marco 1:38, 39; Lucas 4:43) Aunke haci bon obra pa hende den necesidad tawata importante pa Hesus, su mision principal tawata di predica tocante e Reino di Dios.—Marco 1:14.

Siendo cu Bijbel ta urgi cristiannan ‘pa sigui den Hesus su pasonan’ cu sumo cuidou y atencion, cristiannan djawe tin un guia bon cla tocante kico mester haya prioridad den nan esfuerso pa yuda otro hende. (1 Pedro 2:21) Mescos cu Hesus, nan ta yuda hende den necesidad. Sinembargo, mescos cu Hesus tambe, nan prioridad principal ta pa haci e trabou di siña hende e mensahe di Bijbel tocante e bon nobo di e Reino di Dios. (Mateo 5:14-16; 24:14; 28:19, 20) Pero dicon predicacion di e mensahe cu tin den e Palabra di Dios mester ta mas importante cu otro formanan di yuda hende?

Experencianan di bida real for di rond mundo ta demostra cu ora hende ta compronde y sigui Bijbel su conseho practico, nan ta mihor prepara pa trata cu problemanan di bida diario, incluso cu pobresa. Ademas, Bijbel su mensahe tocante e Reino di Dios cu e Testigonan di Yehova ta predica awe, ta duna hende un speransa pa futuro, un speransa cu ta haci cu bida ta bale la pena, asta bou di e circunstancianan di mas dificil. (1 Timoteo 4:8) Cua speransa esei ta?

E Palabra di Dios ta sigura nos relaciona cu nos futuro: “Segun [Dios] su promesa nos ta sperando shelonan nobo y un tera nobo, den cual ta biba husticia.” (2 Pedro 3:13) Ora cu Bijbel ta papia di e “tera”, e ta referi tin biaha na e hendenan cu ta biba riba tera. (Genesis 11:1) Pues e husto “tera nobo” cu Dios a priminti cu lo bin ta un sosiedad di hende cu tin Dios su aprobacion. E Palabra di Dios ta priminti tambe cu bou di e gobernacion di Cristo, hende cu tin Dios su aprobacion lo haya e recompensa di bida eterno y nan lo hiba un bida di satisfaccion riba e tera transforma den un paradijs. (Marco 10:30) E futuro maraviyoso ei ta disponibel pa tur hende, incluso pa hende pober. Den e “tera nobo” ei e problema di pobresa lo ser soluciona pa semper.

[Cuadro/​Plachi na pagina 7]

CON HESUS LO “LIBRA ESUN DEN NECESIDAD”?​—Salmo 72:12

HUSTICIA: “Lag’e husga e afliginan di e pueblo, salba e yiunan di esnan den necesidad, y plecha e opresor.” (Salmo 72:4) Durante Cristo su reinado di e tera, lo tin husticia pa un y tur. Lo no tin luga pa corupcion, cu ta un plaga cu ta causa pobresa pa hopi pais cu di otro manera lo por tawata rico.

PAS: “Den su dianan laga e husto florece, y laga tin abundancia di pas te ora cu no tin luna mas.” (Salmo 72:7) Gran parti di e pobresa cu tin na mundo ta bin pa motibo di conflictonan humano y guera. Cristo lo trece pas perfecto riba tera, y asina lo e elimina un di e causanan principal di pobresa.

COMPASION: “E lo tin compasion di e pober y di esun den necesidad, y e lo salba bida di esnan den necesidad. E lo rescata nan bida for di opresion y violencia; y nan sanger lo ta precioso den su bista.” (Salmo 72:12-14) Hende pober, hende den necesidad y hende oprimi lo bira parti di un solo famia felis, uni bou di e liderato di Rei Hesucristo.

PROSPERIDAD: “Lo tin abundancia di maishi den e tera.” (Salmo 72:16) Durante e reinado di Cristo, lo tin prosperidad y abundancia material. Hende lo no sufri mas di scarsedad di cuminda ni hamber, locual awendia hopi bes ta causa di pobresa.

[Plachi na pagina 4, 5]

Hesus a mustra interes personal den e necesidadnan di hende pober

[Plachi na pagina 6]

Bijbel su mensahe ta duna berdadero speransa