‘Boso A Ricibi Pornada, Duna Pornada’

‘BOSO a ricibi pornada, duna pornada.’ (Mateo 10:8) Esei ta e instruccion cu Hesus a duna su apostelnan ora el a manda nan predica e bon nobo. E apostelnan a obedece e mandato ei? Si, y nan a sigui haci esei asta despues cu Hesus a bandona tera.

Por ehempel, ora Simon, e exhacido di bruha, a mira e podernan milagroso cu apostel Pedro y Huan tawata posee, e kier a paga nan pa e haya e poder ei. Pero Pedro a reprende Simon, bisando: “Cu bo placa perece hunto cu bo, pasobra bo a pensa cu bo por a obtene e don di Dios cu placa!”—Echonan 8:18-20.

Apostel Pablo a desplega e mesun spirito cu Pedro. Pablo por a permiti su mes bira un carga financiero pa su rumannan cristian na Corinto. Sinembargo, el a traha cu su mes mannan pa sostene su mes. (Echonan 18:1-3) Di manera cu e por a bisa cu confiansa cu el a predica e bon nobo na e Corintionan “pornada.”—1 Corintionan 4:12; 9:18.

Lamentablemente, hopi cu ta pretende di ta siguido di Cristo no a demostra e mesun disponibilidad pa ‘duna pornada.’ Si, hopi lider religioso di cristiandad ta “instrui pa un prijs.” (Mikeas 3:11) Algun lider religioso a asta enrikece nan mes cu e placa cu nan a colecta for di nan miembronan. Na 1989, un evangelista Mericano a ser sentencia na un castigo di prizon di 45 aña. Pa ki motibo? El a “malversa miyones di dollar for di miembronan di e iglesia y a gasta parti di e placa pa bai cu facansi, pa cumpra cas, auto y asta un cas di cacho cu air conditioning.”—People’s Daily Graphic, 7 di october 1989.

Na Ghana, segun Ghanaian Times di 31 di maart 1990, un pasto catolico Romano a tuma e cen cu a ser colecta durante un sirbishi religioso y bent’e bek riba e hendenan den misa. Segun e corant, “el a haci esei pasobra, como hende grandi, nan mester a tira placa di papel di mas balor.” Nada straño anto cu hopi iglesia ta purba stimula nan miembronan pa bira golos pa cos door cu nan mes ta promove wega di placa y otro proyectonan cu e meta pa haya mas fondo.

Na contraste cu esei, Testigonan di Yehova ta haci esfuerso pa imita Hesus y su prome disipelnan. Nan no tin clero cu ta cobra salario. Cada Testigo ta un sirbido cu a haya e responsabilidad pa predica e “evangelio di e reino” na otro hende. (Mateo 24:14) Pesei rond mundo mas cu seis miyon di nan ta yuda hiba “e awa di bida” pornada na hende. (Revelacion 22:17) Den e manera aki, asta esnan “cu no tin placa” por beneficia di e mensahe di Bijbel. (Isaias 55:1) Aunke nan obra mundial ta ser financia pa donacion boluntario, hamas nan ta cana pidi placa. Como berdadero sirbidonan di Dios, nan no ta “cana haci negoshi cu e palabra di Dios”, sino nan ta papia “cu tur sinseridad, manera hombernan manda door di Dios.”—2 Corintionan 2:17.

Pero pakico Testigonan di Yehova ta dispuesto pa yuda otro hende riba nan mes gasto, sin cu nan ta wordo paga? Kico ta motiva nan? E echo cu nan ta duna pornada ta nifica cu nan ta haci esei sin ricibi ningun recompensa pa nan esfuersonan?

Contesta Riba e Desafio di Satanas

Loke ta motiva cristiannan berdadero awe ta principalmente un deseo pa agrada Yehova—no pa enrikece nan mes. Di e manera ei nan por contesta un desafio cu Satanas e Diabel a lanta hopi siglo pasa. Relaciona cu un homber husto cu yama Job, Satanas a reta Yehova cu e pregunta: “Ta pornada Job ta teme Dios?” Satanas a pretende cu Job a sirbi Dios unicamente pasobra Dios a pone un trankera di proteccion rond di dje. Segun Satanas, si Job a perde su cosnan material, Job lo a maldiciona Dios den su cara!—Job 1:7-11.

Pa contesta e desafio aki, Dios a permiti Satanas pone Job na prueba, bisando: “Tur loke e tin ta den bo poder [“man”, NW].” (Job 1:12) Kico tawata e resultado? Job a demostra cu Satanas ta un mentiroso. Apesar di tur e dificultadnan cu Job a pasa aden, el a keda leal. El a bisa: “Te na mi morto lo mi no bandona mi integridad.”—Job 27:5, 6.

Adoradonan berdadero djawe tin e mesun actitud cu Job. No ta cos material ta motiva nan pa sirbi Dios.

E Don di Gracia di Dios

Un otro motibo pakico cristiannan berdadero ta dispuesto pa ‘duna pornada’ ta pasobra nan mes a ‘ricibi pornada’ for di Dios. Humanidad ta someti na pica y morto debi na e pica di nos antepasado Adam. (Romanonan 5:12) Den su gran amor, Yehova a haci areglo pa su Yiu muri un morto sacrificial—algo cu a causa Dios hopi dolor. Humanidad sigur no a merece esaki. No, esei ta un don di Dios.—Romanonan 4:4; 5:8; 6:23.

Pesei, segun Romanonan 3:23 y 24, Pablo a bisa e cristiannan ungi: “Tur a peca y ta falta e gloria di Dios, siendo hustifica gratuitamente [“como un don gratis”, NW] door di su gracia pa medio di e redencion cu ta den Cristo Hesus.” Esnan cu tin e speransa di biba pa semper riba tera tambe ta ricibi “un don gratis.” E don aki ta inclui e honor di ser declara husto como amigo di Yehova.—Santiago 2:23; Revelacion 7:14.

E sacrificio di rescate di Cristo ta haci posibel tambe pa tur cristian sirbi Dios. Apostel Pablo a skirbi: “Mi a wordo haci un sirbido [di e “secreto sagrado”, NW], segun e don di e gracia di Dios.” (Efesionan 3:4-7) Despues cu Dios a yama su berdadero sirbidonan pa cumpli cu e sirbishi aki pa medio di un don cu nan no a merece ni no por a gana, nan sigur no por a spera di ricibi pago pa hiba noticia di e don aki pa otro hende.

Ta Egoista pa Anhela Bida Eterno?

Esaki ta nifica anto cu Dios kier pa cristiannan sirbie sin spera di ricibi ningun recompensa? No, pasobra apostel Pablo a bisa su compañeronan di adoracion: “Dios no ta inhusto pa lubida boso trabou y e amor cu boso a mustra pa su nomber.” (Hebreonan 6:10; Deuteronomio 32:4) Al contrario, Yehova ta “recompensa esnan cu ta busc’e.” (Hebreonan 11:6) Pero e promesa di bida eterno den Paradijs ta pone hende bira egoista?—Lucas 23:43.

Sigur cu no, pasobra na prome luga, ta Dios mes a duna hende e deseo di biba pa semper den Paradijs riba tera. Ta e ta esun cu a habri e posibilidad aki pa e prome pareha humano. (Genesis 1:28; 2:15-17) Y ora Adam cu Eva a desperdicia e chens aki pa nan yiunan, ta e mes a bolbe ofrece e speransa aki na nan desendientenan. Pues Dios a priminti den su Palabra cu “e creacion mes tambe lo wordo libra for di su sclabitud na corupcion pa drenta den e libertad glorioso di e yiunan di Dios.” (Romanonan 8:21) Pesei ta completamente na su luga pa cristiannan awe, mescos cu Moises di antiguedad, fiha nan “bista riba e recompensa.” (Hebreonan 11:26) Dios no ta ofrece e recompensa aki como un soborno. E ta ofrec’e pa motibo di su berdadero amor pa esnan cu ta sirbie. (2 Tesalonicensenan 2:16, 17) Y nos reaccion riba esei ta cu “nos ta stima, pasobra el a stima nos prome.”—1 Huan 4:19.

Motivacion Corecto pa Sirbi Dios

No obstante, cristiannan djawe mester analisa constantemente kico ta nan motivacion pa sirbi Dios. Na Huan 6:10-13, nos ta lesa cu Hesus a haci milager y alimenta un multitud di mas cu cinco mil hende. Despues di esei, algun hende a cuminsa sigui Hesus puramente pa motibonan egoista. Hesus a bisa nan: “Boso ta busca mi . . . pasobra boso a come di e pannan y a keda bariga yen.” (Huan 6:26) Mescos tambe, decadanan mas despues algun cristian dedica tawata rindi sirbishi na Dios “no cu un motibo puro.” (Filipensenan 1:17, NW) Algun cu ‘no a bai di acuerdo cu e palabranan sano di Hesucristo’ a asta busca maneranan pa saca bentaha personal for di nan asociacion cu cristiannan.—1 Timoteo 6:3-5.

Awe, un cristian cu ta sirbi Dios solamente pasobra e kier biba pa semper den Paradijs tambe lo por ta sirbiendo cu un motibo egoista. Cu tempo esaki por pon’e sufri un caida spiritual. Pa motibo cu Satanas su sistema di cosnan aparentemente a dura mas largo cu el a spera, e por “cansa”, pensando cu e fin a tarda. (Galationan 6:9) E por asta bira amarga pa motibo di e sacrificionan material cu el a haci. Hesus ta corda nos: “Stima SEÑOR bo Dios cu henter bo curason, y cu henter bo alma, y cu henter bo mente.” (Mateo 22:37) Si, un persona kende su motibo principal pa sirbi Dios ta amor no ta pone limite riba su sirbishi. E ta determina pa sirbi Yehova pa semper! (Mikeas 4:5) E no tin duele di ningun sacrificio cu el a haci en conexion cu su sirbishi na Dios. (Hebreonan 13:15, 16) Amor pa Dios ta impuls’e pa pone interesnan di Dios na prome luga den su bida.—Mateo 6:33.

Awe, mas cu seis miyon adorado berdadero ta “pone [nan] mes disponibel” den Yehova su sirbishi. (Salmo 110:3) Abo ta un di nan? Si no, e ora ei medita riba loke Dios ta ofrece: conocemento exacto di e berdad; (Huan 17:3) libertad for di sclabitud na siñansa religioso falso; (Huan 8:32) e speransa di biba pa semper. (Revelacion 21:3, 4) Testigonan di Yehova por siña bo con bo por ricibi tur e cosnan aki for di Dios, anto pornada.

[Comentario na pagina 22]

Loke ta motiva cristiannan berdadero awe ta principalmente un deseo pa agrada Yehova —no pa enrikece nan mes

[Plachi na pagina 21]

E don gratis di Dios di e rescate ta motiva cristiannan pa comparti e evangelio pornada