Abo Lo Mantene Bo Integridad?

CUANTO mofi a muri ayera? Ningun hende no sa, y probablemente masha tiki hende lo ta interesa pa sa; ta masha hopi parha tin. Sinembargo, Yehova si ta interesa. Referiendo na e parhanan aki aparentemente insignificante, Hesus a bisa su disipelnan: “Ni un di nan lo no cai na suela si no ta e boluntad di boso Tata.” Anto el a agrega: “No tene miedo; boso bal mas cu un cantidad di mofi.”—Mateo 10:29, 31.

Despues e disipelnan a comprende mas miho cuanto balor nan tawatin pa Yehova. Un di nan, apostel Huan, a skirbi: “Pa medio di esaki e amor di Dios a wordo manifesta den nos, cu Dios a manda su Yiu unigenito den mundo pa nos por a biba pa medio di dje.” (1 Huan 4:9) Yehova no solamente a percura e rescate, sino tambe a sigura cada un di su sirbidonan: “Nunca lo Mi no bandona bo, y nunca lo Mi no laga bo desampara.”—Hebreonan 13:5.

Ta bisto anto cu e amor cu Yehova tin pa su pueblo ta firme. Pero, ta surgi e pregunta: ‘Nos ta asina pega na Yehova cu nunca nos lo bandon’e?’

Satanas Ta Purba Kibra Nos Integridad

Ora Yehova a hala Satanas su atencion na Job su bida di integridad, Satanas a contesta: “Acaso Job no tin motibo pa respeta Dios?” (Job 1:⁠9, Beibel na papiamentu koriente) El a insinua cu hende lo keda leal na Dios tanten cu esei ta cumbini nan. Si esaki ta berdad, anto tur cristian lo kibra nan integridad na Dios ora nan haya nan cu un tentacion suficiente grandi.

Den Job su caso, Satanas na prome instante a pretende cu si Job perde su propiedadnan mas stima, lo e no keda leal na Dios. (Job 1:10, 11) Ora a resulta cu e calumnia aki tawata falso, Satanas a alega: “Un hende ta dispuesto na sacrifica tur cos con tal di salba su bida.” (Job 2:4, BPK) Aunke loke Satanas a bisa ta berdad den caso di algun hende, Job si a nenga di kibra su integridad. E registro historico ta confirma esaki. (Job 27:5; 42:10-17) Abo su lealtad ta mescos cu di Job? Of lo bo laga Satanas kibra bo integridad? Pensa riba bo mes segun cu nos ta examina algun berdad cu ta toca tur cristian.

Segun apostel Pablo, berdadero lealtad cristian por ta masha fuerte. El a skirbi: “Mi ta combenci cu ni morto, ni bida, . . . ni cosnan presente, ni cosnan futuro, . . . ni ningun otro cos crea, lo por separa nos for di e amor di Dios cu ta den Cristo Hesus nos Señor.” (Romanonan 8:38, 39) Nos por tin mesun conviccion si nos amor pa Yehova ta fuerte. Un amor asina ta un laso fuerte cu ni morto no por vence.

Si nos tin un relacion asina cu Dios, nunca nos lo puntra: ‘Aki un par di aña, lo mi ta sirbiendo Yehova ainda?’ E insiguridad ei ta indica cu nos lealtad na Dios ta depende di loke lo por sosode cu nos den transcurso di nos bida. Berdadero integridad no ta ser afecta door di sircunstancianan externo. E ta depende di ki clase di persona nos ta di paden. (2 Corintionan 4:​16-18) Si nos stima Yehova cu henter nos curason, nunca nos lo lag’e na caya.​—Mateo 22:37; 1 Corintionan 13:8.

Sinembargo, nos tin cu corda cu Satanas constantemente ta busca manera pa kibra nos integridad. Kisas e ta purba tenta nos pa entrega na deseonan di carni of na presion di nos pareunan, of pa laga cualkier sorto di contratiempo of dificultad pone nos bandona e berdad. E mundo separa for di Dios ta Satanas su aliado principal den e atake aki, aunke nos propio imperfeccionnan ta haci Satanas su tarea mas facil. (Romanonan 7:19, 20; 1 Huan 2:16) Pero na otro banda, nos tin varios bentaha den e bataya aki, y un di esnan principal ta cu Satanas su trikinan no ta desconoci pa nos.—2 Corintionan 2:11.

Kico ta Satanas su trikinan? Pablo ta describi nan den su carta na e Efesionan como “trampanan”, of “plannan engañoso.” (Efesionan 6:11; BPK) Satanas ta pone trampa astuto den nos caminda pa kibra nos integridad. Afortunadamente, nos por reconoce e plannan engañoso aki, ya cu e Palabra di Dios ta describi e metodonan cu Diabel ta uza. Satanas su intentonan pa caba cu e integridad di Hesus y di Job ta ilustra algun di e maneranan cu e ta busca pa kibra nos integridad cristian.

Satanas No Por A Kibra Hesus Su Integridad

Na principio di Hesus su ministerio, Satanas tawatin e tribilidad di tenta e Yiu di Dios door di ret’e pa comberti un piedra den pan. Esta tramposo! Hesus tawatin 40 dia sin come, y sin duda e tawatin hopi hamber. (Lucas 4:2, 3) Satanas tawata kier pa Hesus satisface su deseo natural mesora, na un manera contrario na e boluntad di Yehova. Awe ta mescos. Mundo su propaganda ta persuadi nos pa satisface nos deseonan mesora, sin pensa masha riba e consecuencianan. E mensahe ta: ‘Bo merece esei awor’, of simplemente: ‘Dal bai numa!’

Si Hesus a satisface su hamber sin pensa riba e consecuencianan, Satanas lo a logra su meta di laga Hesus kibra su integridad. Pero Hesus tawata wak con pa agrada Yehova, y el a contesta firmemente: “Ta para skirbi: ‘Hende lo no biba di pan so.’”—Lucas 4:4; Mateo 4:4.

E ora ei Satanas a cambia di tactica. El a cita un texto for di e Scritura (for di cua Hesus mes a caba di cita), y a dun’e un aplicacion robes. Diabel a invita Hesus pa benta su curpa for di e punta mas halto di tempel. Segun Satanas: ‘Un angel lo warda bo.’ Hesus no tawatin intencion di exigi proteccion milagroso for di su Tata djis pa hala atencion na su mes. Hesus a bis’e: “No tenta SEÑOR bo Dios.”—Mateo 4:5-7; Lucas 4:9-12.

E ultimo tactica cu Satanas a uza tawata mas directo. El a purba sera un deal cu Hesus door di ofrec’e henter e mundo y su gloria a cambio di un solo acto di adoracion. Esei tawata casi tur loke Satanas tawatin pa ofrece. Pero con Hesus por a haci un acto di adoracion dilanti e enemigo principal di su Tata? Hamas di su bida! Hesus a contesta: “Señor, bo Dios, so bo mester adora y t’e so bo mester sirbi.”—Mateo 4:8-11, BPK; Lucas 4:5-8.

Despues cu e tres intentonan ei di Satanas a fracasa, el “a lag’e pa un tempo.” (Lucas 4:13) Esaki ta indica cu constantemente Satanas tawata busca un chens pa test Hesus su integridad. Un bon oportunidad a presenta un dos aña y mei despues ora Hesus a cuminsa prepara su disipelnan pa su morto benidero. Apostel Pedro a bisa: “Dios libra, Señor! Esaki nunca lo no sosode cu bo.”—Mateo 16:21, 22.

Hesus lo a bai tras di tal conseho bon intenciona pero kiboca, djis pasobra el a bini di un di su disipelnan? Hesus mesora a reconoce cu e palabranan ei a refleha e deseo di Satanas, no di Yehova. Cristo a responde cu firmesa: “Kita for di mi dilanti, Satanas! Bo ta un piedra di trompica pa mi; pasobra bo no tin bo pensamento riba e cosnan di Dios, sino riba esnan di hende.”—Mateo 16:23.

Debi na Hesus su amor constante pa Yehova, Satanas no por a kibra su integridad. Nada cu Diabel por a ofrece, ningun prueba ni maske con severo, por a debilita Hesus su lealtad na su Tata celestial. Nos lo ta mesun determina ora nos ta den sircunstancianan cu ta hacie dificil pa nos mantene nos integridad? E ehempel di Job lo yuda nos comprende e desafionan cu nos lo por confronta.

Lealtad Ora Nos Ta Confronta Contratiempo

Manera Job a descubri, un ora pa otro nos tur por haya nos cu contratiempo of calamidad. Job tawata un homber felismente casa cu dies yiu y tawatin un estilo di bida sano cu a tene cuenta cu asuntonan spiritual. (Job 1:5) Pero sin cu Job tawata sa, su integridad na Dios a bira un controversia den e corte celestial, y Satanas a busca tur manera pa kibra su integridad.

Rapidamente, Job a perde su rikesa material. (Job 1:14-17) Apesar di esei Job su integridad a wanta e prueba pasobra nunca el a pone su confiansa den placa. Cordando e tempo cu e tawata rico, Job a bisa: “Si mi a pone mi confiansa den oro, . . . si mi a gaba, pasobra mi rikesa tawata grandi, . . . esaki tambe lo tawata un inikidad cu mester a wordo husga, pasobra lo mi a nenga e Dios ayariba.”—Job 31:24, 25, 28.

Awe tambe ta posibel pa nos perde casi tur cos di un dia pa otro. Un comerciante Testigo di Yehova a ser estafa di un suma masha grandi di placa, kedando casi plan bari. E ta admiti francamente: “M’a hera di haya un atake di curason. De echo, mi ta kere cu si no tawata pa mi relacion cu Dios, lo mi a haya un ataca. Sinembargo, e experencia aki a pone mi realisa cu balornan spiritual no tawata na prome luga den mi bida. E sensacion di gana hopi placa tawatin tendencia di tapa tur otro cos.” Djei padilanti e Testigo aki a reduci su actividad di negoshi na un minimo, y e ta sirbi regularmente como un pionero ausiliar, dedicando 50 ora of mas pa luna den e sirbishi cristian. Sinembargo, tin otro problema cu ta asta mas devastador cu perde bo propiedadnan material.

Apenas Job a caba di bin bij di e noticia cu el a perde tur su rikesa, cu ata nan ta bin bis’e cu su dies yiunan a muri. Pero toch el a insisti: “Bendiciona sea e nomber di SEÑOR.” (Job 1:​18-21) Nos lo mantene nos integridad si diripiente nos perde varios miembro di nos famia? Francisco, un superintendente cristian na Spaña, a perde su dos yiunan den un accidente tragico di bus. El a haya consuelo door di hala mas serca di Yehova y aumenta su actividad den e sirbishi cristian.

Asta despues di e shock di a perde su yiunan, Job su calvario no a caba. Satanas a dal e cu un malesa repugnante y doloroso. Na e momento ei, Job a ricibi mal conseho di su esposa. El a bisa Job: “Maldiciona Dios y muri!” Job no a haci caso di su conseho, y e no “a peca cu su lipnan.” (Job 2:​9, 10) Job su integridad no a depende di e apoyo di su famia, sino di su relacion personal cu Yehova.

Flora, kende su esposo y yiu mayo a bandona e caminda cristian mas cu dies aña pasa, ta comprende con Job lo mester a sinti. E ta admiti: “Ora cu diripiente bo perde e apoyo di bo famia, esei por ta traumatico. Pero mi tawata sa cu lo mi no a haya felicidad pafo di Yehova su organisacion. Pesei mi a para firme y a pone Yehova na prome luga mientras cu mi a haci esfuerso pa sigui ser un bon esposa y mama. Mi tawata haci oracion constantemente, y Yehova a fortalece mi. Mi ta un persona felis pasobra, apesar di mi casa su oposicion fuerte, mi a siña depende completamente riba Yehova.”

Satanas su siguiente triki pa kibra Job su integridad a envolve tres di su compañeronan. (Job 2:​11-13) Lo mester tawata hopi doloroso p’e ora nan a cuminsa critic’e. Si el a acepta nan argumentonan, lo el a perde confiansa den Yehova Dios. Nan conseho desanimante lo por a kibra su moral y su integridad, y asina Satanas su triki lo a logra su meta.

Pero en bes di esei, Job a insisti: “Te na mi morto lo mi no bandona mi integridad.” (Job 27:5) E no a bisa: ‘Lo mi no laga boso kibra mi integridad!’ Job tawata sa cu su integridad a depende di e mes y di su amor pa Yehova.

Un Triki Bieu pa Captura Victima Nobo

Te ainda Satanas ta uza mal conseho of comentarionan cu ta refleha falta di consideracion di parti di amigonan y rumannan den fe. Desanimacion cu ta bini di paden di e congregacion por debilita nos moral mas facilmente cu persecucion cu ta bini di pafo di e congregacion. Un anciano cristian cu antes a bringa den guera como solda, a compara e combate den guera cu e dolo cu el a sufri debi na palabra- y accionnan di algun ruman cristian cu a refleha un falta di consideracion. El a bisa di e comportacion di e rumannan: “Ta e cos di mas dificil cu mi a yega di pasa aden.”

For di un otro angulo, nos lo por ta asina rabia cu e imperfeccionnan di nos rumannan den fe cu nos ta stop di papia cu algun di nan of asta ta cuminsa falta reunionnan cristian. Na e momento ei ta parce cu e cuestion mas importante ta pa alivia nos dolo. Pero lo ta masha lamentabel si nos wak e asunto asina y permiti nos pocesion di mas precioso—nos relacion cu Yehova—ser debilita door di loke otro hende ta bisa of haci. Si nos permiti esei sosode, nos lo ta birando victima di un di Satanas su trikinan masha bieu.

Claro cu nos ta spera normanan halto den e congregacion cristian. Pero si nos ta spera mas di loke ta rasonabel for di nos rumannan cu ainda ta imperfecto, nos sigur lo keda desapunta. Na contraste, Yehova ta realistico den loke E ta spera di su sirbidonan. Si nos imita su ehempel, nos lo ta prepara pa soporta nan imperfeccionnan. (Efesionan 4:2, 32) Apostel Pablo a duna e conseho aki: “Boso por rabia si, ma no peca ora boso rabia ni no bai drumi rabia. No duna diabel ningun chens!”—Efesionan 4:26, 27, BPK.

Manera Bijbel ta mustra bon cla, Satanas ta uza un variedad grandi di triki pa busca manera di kibra un cristian su integridad. Algun di su trikinan ta atrae e carni pecaminoso, otronan ta causa dolo. Pero for di loke nos a caba di considera, bo por mira dicon nunca e no mester gara bo for di base. Cu bo amor pa Dios firme den bo curason, sea dicidido pa proba cu Diabel ta un mentiroso y haci Yehova su curason contento. (Proverbionan 27:11; Huan 8:44) Corda, no laga ningun prueba cu bini riba nos, pa kico cu esei por ta, kibra nos integridad como cristian berdadero.