Pregunta di Lector

Apostel Pablo a compromete su fe Cristian ora el a bisa dilanti e Consilio: “Mi ta un Farizeo”?

Pa nos compronde Pablo su declaracion na Echonan 23:6, nos tin cu analisa su contexto.

Despues cu un grupo di Hudiu hostina a ataca Pablo na Herusalem, el a papia cu e multitud. El a menciona cu el a wordo ‘educa na Herusalem na pia di Gamaliel, strictamente segun e Lei di nan tatanan.’ E multitud a scucha su defensa un rato, pero ora cu nan a bira furioso contra dje, e comandante militar cu tawata escolta Pablo a hib’e kazerne. Un poco prome cu nan tawata bai suta Pablo, el a bisa: “Lei ta permiti boso suta un homber cu ta un Romano y cu no a wordo condena?”—Echonan 21:27–22:29.

E siguiente dia, e comandante a hiba Pablo dilanti e Consilio, esta, e corte supremo Hudiu. Ora Pablo a fiha su atencion riba e Consilio, el a ripara cu esaki tawata consisti di Saduceo cu Farizeo. E ora ei el a bisa nan: “Rumannan, mi ta un Farizeo, yiu di Farizeonan; mi ta wordo husga pa motibo di e speransa [di] resureccion di e mortonan!” Door di esei a surgi un discusion fuerte entre e Farizeonan y e Saduceonan, “pasobra e Saduceonan [tawata] bisa cu no tin resureccion, ni angel, ni spirito; ma e Farizeonan [tawata] kere den tur dos.” Algun hende cu tawata pertenece na e secta di e Farizeonan a discuti fuertemente, bisando: “Nos no ta haya nada malo den e homber aki.”—Echonan 23:6-10.

Ya cu Pablo tawata conoci como un Cristian masha celoso, tawata imposibel pa e combence e Consilio cu e tawata un miembro activo di e Farizeonan. E Farizeonan presente lo no a acepta ningun hende cu no a kere tur nan siñansanan. Pues ora Pablo a bisa cu e ta un Farizeo, esei no tawata den e sentido stricto di e palabra, y e Farizeonan presente lo no a compronde Pablo su palabranan asina tampoco.

Ora Pablo a bisa cu el a wordo husga pa motibo di e speransa di resureccion di e mortonan, e tawata kiermen bon cla cu ta den e sentido aki e tawata manera e Farizeonan. Den cualkier controversia riba e tema aki, Pablo tawata na banda di e Farizeonan y no e Saduceonan, kendenan no tawata kere den e resureccion.

Pablo su creencianan Cristian no a bai contra e creencianan di e Farizeonan riba asuntonan manera e resureccion, angelnan y algun punto di e Lei. (Filipensenan 3:5) Pues denter di e limitenan aki, Pablo por a identifica su mes cu e Farizeonan, y tawata den e sentido limita aki esnan presente di e Consilio a compronde su palabranan. Den e forma ei e tawata uzando su background pa trata cu e corte supremo Hudiu den cua a existi bastante prehuicio.

Sinembargo, e evidencia principal cu Pablo no a compromete su fe ta e echo cu el a keda cu Yehova su aprobacion. E anochi despues cu Pablo a haci e declaracion en cuestion, Hesus a bis’e: “Tene curashi, pasobra mescos cu bo a duna testimonio di mi causa na Herusalem, asina bo tin cu duna testimonio na Roma tambe.” Ya cu Pablo tawatin e aprobacion di Dios, nos tin cu conclui cu Pablo no a compromete su fe Cristian.—Echonan 23:11.