Bo Ta Corda?

Bo a disfruta di e edicionnan resien di E Toren di Vigilancia? Wel, wak si bo por contesta e siguiente preguntanan:

• Kico tawata e motibo cu a scohe 25 di december como e fecha pa celebra Hesus su nacemento?

E Palabra di Dios no ta duna e fecha di Hesus su nacemento. E Enciclopedia Hispánica ta comenta: “A scohe e fecha di 25 di december como e dia pa celebra Pasco di Nacemento no a base di e fecha exacto di e nacemento, pero mas bien, pa motibo cu nan kier a cristianisa e fiestanan di e solsticio di winter.” E Romanonan di antiguedad tawata celebra e salimento di solo den winter door di come na grandi, dibirti na un manera desenfrena y duna otro regalo.—15/12, pagina 4-5.

• Echonan 7:59 ta indica cu Esteban a haci oracion na Hesus?

No. Bijbel ta mustra cu oracion mester ta dirigi na Yehova Dios so. Door cu Esteban tawata mirando Hesus den vision, aparentemente el a sinti su mes liber pa apela na dje directamente, bisando: “Señor Hesus, ricibi mi spirito.” Esteban tawata sa cu Yehova a duna Hesus autoridad pa lanta morto. (Huan 5:27-29) Pesei Esteban a pidi Hesus of a haci un apelacion na dje pa proteha su forsa di bida te ora cu e haya resureccion.—1/1, pagina 31.

• Con nos por sa cu un persona su destino no ta predetermina?

Dios a duna hende libertad di scohe, y esaki ta exclui e posibilidad di predestinacion. Yehova lo tawata masha inhusto y sin amor si el a predetermina e manera cu nos lo hiba nos bida, y despues ta tene nos responsabel pa nos echonan. (Deuteronomio 32:4; 1 Huan 4:8)—15/1, pagina 4-5.

• Dicon lo ta un falta di modestia pa bisa cu milager ta algo imposibel?

Algun cientifico cu ta reconoce cu nan tin solamente un conocemento limita di e milagernan cientifico cu tin den creacion di Dios, ta admiti cu nan no por bisa cu tur siguridad mas cu algo ta imposibel. A lo sumo, nan ta dispuesto pa bisa cu e ta improbabel.—15/2, pagina 5-6.

• Dicon Hues Samson a bisa su mayornan cu e tawata kier un yiu mohe di e Filisteonan como esposa? (Huesnan 14:2)

E lei di Dios a prohibi casamento cu un adorado di dios falso. (Exodo 34:11-16) Sinembargo, e mohe Filisteo tawata “net esun apropiado” den bista di Samson. Samson “tawata busca un oportunidad contra e Filisteonan”, y e mohe tawata net apropiado pa e proposito ei. Dios a apoya Samson pa medio di Su spirito. (Huesnan 13:25; 14:3, 4, 6)—15/3, pagina 26.

• Un Cristian tin mag di duna un empleado di gobierno tip of regalo pa su servicio?

No ta bon pa soborna un funcionario, esta, dun’e algo balioso pa asina e por haci algo ilegal, keda sin cumpli cu lei of duna trato preferencial. Pero no ta soborno pa duna un sirbido publico un tip of regalo ora e cumpli cu su deber of pa haya un servicio legal of pa evita trato inhusto.—1/4, pagina 29.