“Felis Ta Esnan Cu Ta Conciente di Nan Necesidad Spiritual”

ORA parha lanta mainta, hopi bes nan ta canta un rato pa despues bula bai busca cuminda. Atardi, nan ta bai bek na nan luga di sosega, canta un tiki mas y bai drumi. Den cierto temporada, nan ta pone webo y cria nan yiunan. Otro bestia tambe ta sigui e mesun patronchi di bida.

Nos como hende si ta diferente. Ta berdad cu nos tambe ta come, drumi y haya yiu, pero mayoria di nos no ta contenta nos mes cu e cosnan ei so. Nos kier sa pakico nos ta existi. Nos ta busca proposito den bida. Tambe nos kier tin un speransa pa futuro. E necesidadnan mas profundo aki ta indica cu hende tin algo unico. Esei ta spiritualidad, of e necesidad y capasidad pa explora interesnan mas aya di cosnan fisico.

Crea den Imagen di Dios

Bijbel ta splica con bin hende tin un necesidad spiritual. E ta bisa: “Dios a crea hende segun su mes imagen; segun e imagen di Dios el a crea hende; homber y mohe el a crea nan.” (Genesis 1:27) E echo cu nos a ser crea den “imagen di Dios” ta nifica cu aunke nos a haya e mancha di pica y imperfeccion, nos tin e capasidad pa refleha cierto cualidadnan di Dios. (Romanonan 5:12) Por ehempel, nos por ta creativo. Tambe nos tin cierto sabiduria, un sentido di husticia y e capasidad pa mustra amor sin egoismo pa otro. Ademas, nos por medita riba pasado y plania pa futuro.—Proverbionan 4:7; Eclesiastes 3:1, 11; Mikeas 6:8; Huan 13:34; 1 Huan 4:8.

E loke mas ta demostra nos capasidad spiritual ta nos deseo natural pa adora Dios. Si nos no satisface den un forma corecto e necesidad pa ta den contacto cu nos Creador, nos no por haya felicidad berdadero y duradero. Hesus a bisa: “Felis ta esnan cu ta conciente di nan necesidad spiritual.” (Mateo 5:3, NW) Pero un cos si, nos mester trata pa satisface e necesidad ei cu berdad spiritual—berdadnan tocante Dios, su normanan y su proposito pa humanidad. Unda nos por haya e berdadnan ei? Den Bijbel.

“Bo Palabra Ta Berdad”

Apostel Pablo a skirbi: “Tur Scritura ta inspira pa Dios y ta util pa siñansa, pa reprendemento, pa coreccion, pa educa den husticia.” (2 Timoteo 3:16) Pablo su palabranan ta cuadra cu esnan di Hesus, kende a bisa den oracion na Dios: “Bo palabra ta berdad.” Awe, nos conoce e Palabra ei como e Scritura Santo, y ta sabi pa nos aberigua si nos creencia- y normanan ta cuadra cu ne.—Huan 17:17.

Door di compara nos creencianan cu e Palabra di Dios, nos ta imita e hendenan di Berea di antiguedad, kendenan a haci sigur cu e siñansanan di Pablo a cuadra cu e Scritura. En bes di critica e Bereanonan, e escritor di Bijbel, Lucas, a elogia nan pa nan actitud. El a skirbi: “Nan a ricibi e palabra cu bon boluntad y tawata scudriña e Scrituranan tur dia, pa mira si e cosnan aki tawata asina.” (Echonan 17:11) En bista di e siñansanan religioso y moral contradictorio cu ta reina awe, ta importante pa nos imita e ehempel di e Bereanonan cu tawatin un mentalidad noble.

Un otro manera cu nos por identifica berdad spiritual ta door di observa ki influencia e tin den bida di hende. (Mateo 7:17) Por ehempel, un hende cu ta biba segun e berdad di Bijbel mester bira un miho esposo, un miho tata, un miho esposa, of un miho mama, y esei ta contribui na felicidad den famia y satisfaccion personal. Hesus a bisa: “Bendiciona ta esnan cu ta tende e palabra di Dios, y ta ward’e.”—Lucas 11:28.

E palabranan di Hesus ta pone nos corda riba e palabranan di su Tata celestial, kende a bisa e Israelitanan di pasado: “Ami ta SEÑOR bo Dios, Kende ta siña bo, pa bo prospera, Kende ta guia bo den e caminda cu bo mester cana. Mara bo a pone atencion na mi mandamentonan! E ora ei bo pas lo tawata manera un riu, y bo husticia manera ola di lama.” (Isaias 48:17, 18) Un exhortacion tierno asina sigur lo conmove tur hende cu ta stima bondad y husticia!

Algun Hende Ta Prefera pa Laga ‘Kishiki Nan Horea’

Dios a haci e apelacion sinsero ei na e Israelitanan pasobra nan a laga mentira religioso engaña nan. (Salmo 106:35-40) Nos tambe mester tene cuidou cu engaño. Pablo a skirbi encuanto hende cu ta bisa cu nan ta cristian: “E tempo lo bin cu nan lo no soporta doctrina sano mas; ma al contrario, pa satisface nan mes deseonan, nan lo acumula pa nan mes siñadonan pa bisa nan loke nan horea cu ta kishiki kier tende, y lo bira nan horea for di e berdad.”—2 Timoteo 4:3, 4.

Lidernan religioso ta kishiki horea di hende door di tolera practicanan cu ta satisface mal deseo, manera relacion sexual pafo di matrimonio, homosexualidad y buracheria. Bijbel ta bisa bon cla cu esnan cu ta aproba e cosnan ei y esnan cu ta practica nan “lo no hereda e reino di Dios.”—1 Corintionan 6:9, 10; Romanonan 1:24-32.

No tin duda, pa un hende biba segun normanan di Bijbel, specialmente ora hende ta haci mofa di dje, e mester tin curashi. Pero e por logra. Den Testigonan di Yehova tin hopi cu tawata adicto na droga, burache, fornicado, gangster, ladron y gañado. Pero nan a tuma e Palabra di Dios na pecho y cu yudansa di spirito santo nan a haci cambio den nan bida pa asina nan por “cana na un manera digno di Señor.” (Colosensenan 1:9, 10; 1 Corintionan 6:11) Despues cu nan a haci pas cu Dios, nan a haya un pas interno tambe y, manera nos lo mira, un berdadero speransa pa futuro.

E Speransa di Reino

E speransa biblico di pas duradero pa hende obediente lo cumpli pa medio di e Reino di Dios. Hesus a bisa den su oracion modelo: “Cu bo reino bin. Cu bo boluntad sosode na tera mescos cu den shelo.” (Mateo 6:10) Si, ta e Reino di Dios so por garantisa cu e boluntad di Dios ta tuma luga riba tera. Pakico? Pasobra e Reino celestial ei—un gobierno den man di Hesucristo—ta e medio cu Dios lo uza pa mustra cu E ta e Soberano legitimo riba tera.—Salmo 2:7-12; Daniel 7:13, 14.

Como Rei di e Reino celestial ei, Hesucristo lo libra hende obediente for di tur forma di sclabitud, incluso di e gara firme cu e pica di Adam y su herencia di enfermedad y morto tin riba nan. Revelacion 21:3 y 4 ta bisa: “Mira, e tabernakel di Dios ta meimei di hende . . . y e [Yehova Dios] lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.”

Tera completo lo tin un pas duradero. Pakico nos por ta sigur di esei? Isaias 11:9 ta duna e motibo pa esei. E ta bisa: “Nan [e subditonan di e Reino] lo no causa daño ni destruccion den henter mi sero santo, pasobra tera lo ta yen di e conocemento di SEÑOR, manera awa ta tapa lama.” Si, tur hende riba tera lo tin conocemento exacto di Dios y lo ta obediente na dje. E perspectiva ei no ta lanta bo animo? Si ta asina, awor ta tempo pa cuminsa haci esfuerso pa haya e precioso “conocemento di SEÑOR.”

Lo Bo Scucha e Mensahe di Reino?

Dios lo uza e Reino pa deshaci di tur e obranan di Satanas y educa hende den Su camindanan husto. Pesei, no ta nada straño cu e siñansa di Hesus a enfoca riba e Reino. El a bisa: “Mi mester predica e reino di Dios na e otro stadnan tambe, pasobra ta pa e proposito aki mi a wordo manda.” (Lucas 4:43) Cristo a manda su disipelnan comparti e mesun mensahe ei cu nan prohimo. (Mateo 28:19, 20) El a profetisa: “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.” (Mateo 24:14) E fin ei ta yegando rapidamente. Pesei ta masha importante pa hende sinsero scucha e bon noticia ei. Esei por scapa nan bida!

Albert, cu a ser menciona den e articulo anterior, a tende e mensahe di Reino ora su casa y yiu a cuminsa studia Bijbel cu Testigonan di Yehova. Na prome instante, Albert tawatin su dudanan. Asta el a pidi un lider religioso bishita su casa y yiu pa por a desenmascara e Testigonan. Pero e lider religioso no kier a mete den e asunto. Albert a dicidi e ora ei pa sinta scucha durante un estudio di Bijbel pa wak si e por a topa cualkier fayo den e siñansanan di e Testigonan. Despues di apenas un sesion, el a dicidi na sigui participa den e estudio, ansioso pa siña mas. Despues di tempo el a splica pakico su actitud a cambia. El a bisa: “Ta esaki ta loke semper mi tawata busca.”

Porfin Albert a cuminsa satisface su necesidad spiritual, y esei no a duel e nunca. E berdad di Bijbel a dun’e loke e tawata busca henter su bida—solucion pa e inhusticia y degeneracion cu a corumpi henter sosiedad, y tambe un speransa pa futuro. E berdad di Bijbel a dun’e pas mental. Abo ta satisfaciendo bo necesidad spiritual? Pakico bo no ta pasa door di e preguntanan den e cuadro na pagina 6? Si bo ta desea mas informacion, Testigonan di Yehova lo ta contento pa yuda bo.

[Cuadro/Plachi na pagina 6]

BO TA SATISFACIENDO BO NECESIDAD SPIRITUAL?

Bo ta satisfecho cu e alimento spiritual cu bo ta ricibiendo? Nos ta invita bo pa lesa e siguiente preguntanan y marca esnan cu bo por contesta corectamente.

□ Ken Dios ta, y con su nomber ta?

□ Ken Hesucristo ta? Pakico e mester a muri? Con su morto por beneficia bo?

□ Ta existi un Diabel? Si ta asina, di unda el a bini?

□ Kico ta sosode cu nos ora nos muri?

□ Kico ta Dios su proposito pa e tera y pa humanidad?

□ Kico ta e Reino di Dios?

□ Kico ta Dios su normanan di moralidad?

□ Ki papel Dios a duna esposo y esposa den famia? Cua ta algun principio di Bijbel cu ta contribui na felicidad den famia?

Si bo no ta sigur di e contestanan riba cualkier un di e preguntanan aki, bo por pidi un foyeto Kico Dios Ta Rekerí di Nos?, publica door di Testigonan di Yehova na casi 300 idioma. E foyeto aki ta trata 16 tema basico di Bijbel y ta contesta tur e preguntanan cita ariba cu textonan di Bijbel.

[Plachi na pagina 4]

Distinto for di bestia, hende tin un necesidad spiritual

[Plachi na pagina 5]

“Nan lo acumula pa nan mes siñadonan pa bisa nan loke nan horea cu ta kishiki kier tende.”—2 Timoteo 4:3

[Plachi na pagina 7]

E Reino Mesianico di Dios lo trece pas duradero