E Rescate Ta Engrandece e Husticia di Dios

DESPUES di e rebelion di Adam cu Eva, Yehova a declara su proposito pa lanta un Simiña cu lo a ser herida na su hilchi di pia. (Genesis 3:15) Esaki a cumpli ora enemigonan di Dios a causa e morto di Hesucristo na un staca di tormento. (Galationan 3:13, 16) Hesus a ser consebi milagrosamente cu poder di spirito santo den e matris di un birgen, y pesei e no tawatin pica. Pues, su sanger drama por a sirbi como e prijs di rescate pa libra hende cu a hereda pica y morto for di Adam.—Romanonan 5:12, 19.

Nada no por stroba Yehova, e Dios todopoderoso, di cumpli cu su proposito. Pues, despues cu hende a cai den pica, for di Yehova su punto di bista tawata como si fuera e prijs di rescate a ser paga caba y esei a permitie trata cu hende cu tawatin fe den e cumplimento di su promesanan. Door di esei e desendientenan pecaminoso di Adam, manera Enok, Noe y Abraham por a cana cu Dios y asta bira su amigo sin mancha su santidad.—Genesis 5:24; 6:9; Santiago 2:23.

Algun persona cu tawatin fe den Yehova a comete pica serio. Un di nan ta rei David. Kisas bo ta puntra: ‘Con Yehova por a sigui bendiciona rei David despues cu David a comete adulterio cu Betsabe y causa morto di su casa, Urias?’ Un factor importante cu a contribui na esei tawata David su fe y arepentimento sinsero. (2 Samuel 11:1-17; 12:1-14) Basa riba e futuro sacrificio di Hesucristo, Dios por a pordona e picanan di David arepenti y toch pega na Su husticia. (Salmo 32:1, 2) Como prueba di esaki, Bijbel ta splica cu e logro di mas maraviyoso di e rescate di Hesus ta “pa mustra [Dios] su husticia, pasobra den Dios su tolerancia el a pasa por alto e picanan cu a wordo cometi den pasado” y “den e tempo presente.”—Romanonan 3:25, 26.

Si, pa motibo di e balor di e sanger di Hesus, humanidad ta ricibiendo gran beneficio. A base di e rescate, pecadonan humano arepenti por disfruta di un relacion intimo cu Dios. Ademas, e rescate ta habri caminda pa un resureccion di e mortonan den Dios su mundo nobo. Esei lo inclui sirbidonan fiel di Dios cu a muri prome cu Hesus a paga e rescate y asta hopi cu a muri den ignorancia y cu no a adora Dios. Bijbel ta bisa: “Lo tin un resureccion di tanto e hustonan como e malbadonan.” (Echonan 24:15) Na e tempo ei, basa riba e rescate, Yehova lo duna tur hende obediente bida eterno. (Huan 3:36) Hesus mes a splica: “Dios a stima mundo asina tanto, cu el a duna su Yiu unigenito, pa ken cu kere den dje no bai perdi, ma tin bida eterno.” (Huan 3:16) Humanidad lo haya tur e beneficionan aki pa motibo di Dios su provision di e sacrificio di rescate.

Sinembargo, e aspecto sobresaliente di e rescate no ta e beneficionan cu nos ta ricibi di dje. Mas importante ainda ta loke e sacrificio di Cristo ta nifica pa e nomber di Yehova. E ta demostra cu Yehova ta un Dios di husticia perfecto cu por trata cu hende pecado y toch keda puro y santo. Si no tawata pa e proposito di Dios pa percura e rescate, ningun desendiente di Adam, ni sikiera Enok, Noe of Abraham lo por a cana cu Yehova of ser su amigo. E salmista a realisa esaki y a skirbi: “Si abo, SEÑOR, tuma inikidadnan na cuenta, o Señor, ken lo por a keda para?” (Salmo 130:3) Nos mester ta masha gradicido tanto na Yehova pa a manda su Yiu stima na tera como na Hesus pa a duna su bida boluntariamente como rescate pa nos!—Marco 10:45.