Con e Nacemento di Hesus Ta Trece Pas

EPROCLAMACION di “pas entre hende di bon boluntad” no tabata e unico profesia conecta cu e nacemento di Hesus. Fuera di loke e angelnan a anuncia na e wardadonan di carne asombra, mensaheronan celestial a expresa declaracionnan inspira pa Dios na Maria y na su casa, Jose, tocante e yiu recien naci Hesus. Un analisis di e mensahenan aki lo yuda nos haya un bista mas amplio di e nacemento di Hesus y tambe nos lo compronde e berdadero nificacion di e promesa angelical di pas entre hende.

Prome cu Hesus a nace, asta prome cu Maria a sali na estado, el a haya bishita di un angel cu Bijbel a identifica como Gabriel. E angel a cumind’e bisando: “Saludo, abo cu ta altamente faboreci! SEÑOR ta cu bo.” Manera bo por imagina, Maria a keda tur aribabou y kisas asta un poco spanta. Ta kico e saludo ei por a nifica?

Gabriel a splic’e: “Mira, lo bo concebi den bo matris y duna lus na un yiu homber, y lo bo yam’e Hesus. E lo ta grandi y lo wordo yama Yiu di e Haltisimo; y SEÑOR Dios lo dun’e e trono di su tata David; y e lo reina riba e cas di Jacob pa semper, y su reino lo no tin fin.” Maria a puntra ta con esaki por ta, siendo cu e ta un birgen y no a tene relacion sexual cu un homber. Gabriel a contest’e cu e yiu lo ser concebi pa medio di Dios su spirito santo. Esaki lo no ta un yiu comun y coriente.—Lucas 1:28-35.

Un Rei Profetisa

E palabranan di Gabriel lo mester a yuda Maria compronde cu e yiu cu lo e haya tabata e topico di profesianan di antiguedad. Loke e angel a bisa, esta, cu Jehova lo duna e yiu di Maria “e trono di su tata David”, lo a pone Maria—y de echo cualkier persona Hudiu cu conoce e Scritura—pensa riba e promesa cu Dios a haci na Rei David di Israel.

Pa medio di profeta Natan, Jehova a bisa David: “Bo cas y bo reino lo permanece mi dilanti pa semper; bo trono lo ta estableci pa semper.” (2 Samuel 7:4, 16) Jehova a declara relaciona cu David: “Lo mi establece su descendientenan pa semper, y su trono manera e dianan di shelo. Su descendientenan lo permanece pa semper, y su trono lo permanece manera solo mi dilanti.” (Salmo 89:20, 29, 35, 36) Pues, no tabata un coincidencia cu tanto Maria como Jose tabata descendiente di e cas di David.

Esakinan no tabata e unico profesianan den e Scritura Hebreo tocante un yiu di David cu lo ta rei. Maria lo tabata na haltura tambe di e profesia di Isaias cu a bisa: “Un yiu a nace pa nos, un yiu homber ta duna na nos, y e gobernacion lo ta riba su scouder. Su nomber lo ta Consehero Maraviyoso, Dios Poderoso, Tata Eterno, Prins di Pas. Lo no tin fin na e aumento di su gobernacion y di pas, riba e trono di David y riba su reino, pa establece esaki y manten’e cu huicio y husticia for di e tempo ei y pa semper. E celo di e SEÑOR di ehersitonan lo haci esaki.”—Isaias 9:6, 7.

P’esei, loke Gabriel a anuncia na Maria tabata mas cu djis e nacemento milagroso di un yiu homber. Su yiu lo ta e heredero real di Rei David, e heredero permanente y eterno di un Reino estableci pa Dios. E profesianan di Gabriel tocante e papel cu Hesus lo tin den futuro tin un nificacion profundo pa nos tur.

Ora cu Jose a haya sa cu su futuro esposa tabata na estado, el a dicidi di pone un fin na nan compromiso. E tabata sa cu e yiu no ta di dje pasobra e cu su enamorada no a tene relacion sexual. Bo por imagina con dificil lo mester tabata pa Jose kere e splicacion cu Maria a dun’e tocante con bin e ta na estado. E relato di Evangelio ta informa nos: “Un angel di SEÑOR a aparece na dje den un soño, bisando: ‘Jose, yiu di David, no tene miedo di tuma Maria como bo esposa; pasobra loke a wordo concebi den dje ta di spirito santo. Y e lo haya un yiu homber; y lo bo dun’e e nomber Hesus, pasobra ta e ta esun cu lo salba su pueblo di nan picanan.’”—Mateo 1:20, 21.

Bijbel no ta bisa si Jose a compronde completamente con e yiu aki lo a “salba su pueblo di nan picanan.” Sinembargo, e mensahe aki tabata suficiente pa sigura Jose cu e mama na estado tabata inocente di cualkier malecho. Jose a haci manera e angel a bis’e y a bai cas cu Maria; cu e acto ei el a duna di conoce cu el a casa cu ne.

Cu yudansa di informacion cu nos ta haya den otro parti di e Scritura, nos por compronde kico e angel tabata kiermen. Na principio di historia humano, un angel rebelde a cuestiona Jehova su derecho di goberna como Rei supremo. E Scritura Hebreo ta mustra cu, entre otro, e rebelde aki a pretende cu Dios su manera di goberna tabata inhusto y cu ningun hende lo no mantene integridad na Jehova ora pone nan na prueba. (Genesis 3:2-5; Job 1:6-12) Adam mes tabata un cu no a mantene su integridad. Debi na su pica tur hende ta hereda pica, y e consecuencia di e pica ei ta morto. (Romanonan 5:12; 6:23) Sinembargo, Hesus a nace sin pica pasobra no ta un tata humano a procre’e. Como cu voluntariamente el a entrega su bida humano perfecto como un rescate cu ta coresponde exactamente cu loke Adam a perde, Hesus tabata den posicion pa salba hende di nan picanan y ofrece nan e speransa di bida eterno.—1 Timoteo 2:3-6; Tito 3:6, 7; 1 Juan 2:25.

Durante Hesus su ministerio riba tera, el a duna un idea di loke eliminacion di e efectonan di pica lo nifica pa hende. El a libra hende di tur sorto di malesa y asta a trece e mortonan bek na bida. (Mateo 4:23; Juan 11:1-44) E milagernan ei tabata un muestra di loke lo e haci den futuro. Hesus mes a bisa: “E ora lo yega den cua tur cu ta den graf lo tende [mi] bos, y lo sali.”—Juan 5:28, 29.

E promesa ei di un futuro resureccion ta splica dicon e nacemento—y mas cu esei e morto—di Hesus ta di sumo importancia pa nos. Dios a manda su Yiu na tera “pa mundo wordo salba dor di dje”, segun Juan 3:17. E noticia maraviyoso aki ta trece nos bek na e proclamacion cu e angelnan a haci na e wardadonan di carne cu tabata cuida nan bestianan e anochi cu Hesus a nace.

“Bon Nobo di Gran Goso”

En berdad e tabata pa humanidad un “bon nobo di gran goso” ora cu e angelnan a anuncia nacemento di “un Salbador, kende ta Cristo e Señor.” (Lucas 2:10, 11) E yiu aki lo a bira e Mesias, e gran Profeta y Gobernante tan spera pa e pueblo di Dios. (Deuteronomio 18:18; Mikeas 5:2) Su bida y morto riba tera lo a hunga un papel masha importante den e vindicacion di Jehova su soberania universal, ta p’esei e angelnan por a bisa: “Gloria na Dios den halturanan.”—Lucas 2:14.

Hesus, kende Bijbel ta yama “e ultimo Adam”, a mustra cu hende por keda fiel na Jehova asta bou di e prueba di mas severo. (1 Corintionan 15:45) Di e manera ei el a demostra cu Satanas ta un mentiroso malicioso. Esaki tabata motibo pa gran goso den shelo entre e angelnan fiel.

Pero laga nos bai bek na e pregunta: “Tin un speransa realistico cu e proclamacion angelical cu a tuma luga e anochi cu Hesus a nace lo cumpli?” E contesta ta si! Pas ta un condicion basico den e cumplimento di Dios su proposito pa e tera, cu ta inclui restauracion di un ambiente di paradijs. Ora cu esei cumpli mundialmente, tur hende lo ta motiva pa amor y lealtad. Pues, cumplimento di Jehova su proposito ta nifica tambe eliminacion di tur resistencia contra su soberania. Pa hende cu ta tuma parti pa Satanas ora nan ta laga sa cu e normanan di Jehova ta malo, esaki no ta masha bon noticia. Pa nan, lo e nifica destruccion.—Salmo 37:11; Proverbionan 2:21, 22.

Tuma nota cu e angelnan no a bisa e wardadonan cu lo tin pas y bon boluntad pa tur hende. Mas bien, nan a anuncia “pas entre hende di bon boluntad.” Esei kiermen, entre esnan cu Dios ta aproba y cu tin su bon boluntad. Esnan cu ta expresa berdadero fe den Jehova ta bira fiel siguido y imitado di Hesus. E homber- y muhernan ei ta dispuesto pa mustra generosidad y comprension na otro hende tur dia, y no djis durante un par di dia di aña.

Un Spirito Cristian Henter Aña?

E poder di e bon nobo cu Hesus a predica a influencia e bida di miyones di hende. Hopi di nan a adopta principionan cristian den tur aspecto di nan bida. Hende cu un tempo tabata basicamente egoista a cuminsa puntra nan mes kico Hesus lo a haci si e tabata den nan situacion. Algun hende cu anteriormente tabata core tras di cos material y placer, a bin mira e importancia di balornan spiritual y di comparti esakinan cu nan prohimo. Hendenan asina ta haci nan best pa demostra generosidad y bondad henter aña. No ta esei ta loke bo ta spera di cristiannan berdadero?

Si tur persona sincero para keto un rato pa reflexiona riba e importancia y nificacion di e mensahe di pas cu e angelnan a proclama y actua na harmonia cu esei, mundo sigur lo ta hopi mas mihor.

E profesianan conecta cu e nacemento di Hesus ta sigura e hendenan cu tin Dios su aprobacion cu nan por disfruta di berdadero pas pa semper. No ta esei abo ta desea? Nos por tin sigur cu e glorioso anuncio profetico di pas cu e angelnan a haci na e nacemento di Hesus lo cumpli sin faya. Leu di ta palabranan bashi cu ta ser ripiti durante temporada di Pasco, pas definitivamente lo bira un realidad eterno.

[Plachi na pagina 7]

Nos por y lo mester desplega un spirito cristian henter aña