Siña Hende Kico Bijbel Ta Siña Realmente

“Haci tur e nacionnan discipel di mi, ... y siña nan.”—MATEO 28:19, 20.

1. Te na ki grado Bijbel ta disponibel?

E PALABRA DI JEHOVA, Bijbel Santo, ta un di e bukinan di mas bieu y mas plama na mundo. Por lo menos parti di dje a ser traduci na mas cu 2.300 idioma. Mas cu 90 porciento di e habitantenan di Tera tin e na nan idioma materno.

2, 3. (a) Dicon ta reina confusion tocante e siñansanan di Bijbel? (b) Cua preguntanan nos lo considera?

² Miyones di hende ta lesa un porcion di Bijbel tur dia. Tin hende a les’e di kaft pa kaft hopi biaha. Miles di grupo religioso ta pretende cu nan siñansanan ta basa riba Bijbel. Sinembargo, nan cu nan mes no ta di acuerdo riba kico Bijbel ta siña. Loke ta haci e confusion mas grandi ainda ta e desacuerdonan pisa cu tin entre personanan di e mesun religion. Algun hende tin nan duda relaciona cu Bijbel, su origen y su balor. Hopi hende ta consider’e como un buki sagrado pa uza simplemente den ceremonia, por ehempel ora di haci un promesa solem of ora di hura den corte cu lo bo papia e berdad.

³ Echo ta cu Bijbel ta contene Dios su palabra, of mensahe, poderoso pa humanidad. (Hebreonan 4:12) P’esei como Testigonan di Jehova nos kier pa hende haya sa kico Bijbel ta siña. Nos ta hopi contento cu nos por cumpli cu e encargo cu Hesucristo a duna su siguidonan ora el a bisa: “Bai y haci tur e nacionnan discipel di mi, . . . y siña nan.” (Mateo 28:19, 20) Den nos sirbishi publico, nos ta topa hende di curason honrado cu ta hopi molestia pa e confusion religioso cu ta reina den mundo awe. Nan kier sa e berdad tocante nos Creador, y tin e deseo di siña kico Bijbel ta bisa tocante e proposito di bida. Laga nos considera tres pregunta cu ta precupa hopi hende. Den cada caso, nos lo tuma nota di loke lidernan religioso ta bisa eroneamente, anto caba nos lo repasa kico Bijbel ta siña realmente. E preguntanan ta (1) Dios ta interesa den nos? (2) Pakico nos ta na mundo? (3) Kico ta pasa cu nos ora nos muri?

Dios Ta Interesa den Nos?

4, 5. Dicon hende ta pensa cu Dios no ta interesa den nos?

⁴ Laga nos cuminsa cu e prome pregunta: Dios ta interesa den nos? Lamentablemente, hopi hende ta pensa cu e contesta ta no. Dicon nan ta pensa asina? Un motibo ta cu nan ta biba den un mundo yen di odio, guera y sufrimento. Nan ta rasona: ‘Si Dios tabata realmente interesa den nos, sigur lo el a preveni e cosnan malo ei di sosode.’

⁵ Un otro motibo pakico hende ta pensa cu Dios no tin cu nes cu nos ta pasobra lidernan religioso a pone nan sinti asina. Kico miembronan di clero ta bisa hopi biaha ora cu un tragedia sosode? Ora cu un señora a perde su dos yiunan chikito den un accidente di auto, su pastor a bisa: “Ta e boluntad di Dios. Dios tabatin mester di dos angelito mas.” Ora cu miembronan di clero ta haci e tipo di comentarionan ei, nan en realidad ta culpando Dios pa e cosnan malo cu ta sosode. Sinembargo, discipel Santiago a skirbi: “No laga ningun hende, ora nan ta bou di prueba, bisa: ‘Dios ta pone mi na prueba.’ Pasobra cu cos malo no por pone Dios na prueba ni e mes no ta pone ningun hende na prueba.” (Santiago 1:13, NW) Jehova Dios nunca ta causa maldad. De echo, “leu sea di Dios di haci maldad.”—Job 34:10.

6. Ken ta tras di e maldad y sufrimento cu tin den e mundo aki?

⁶ Dicon anto tin asina tanto maldad y sufrimento? Un motibo ta cu humanidad en general a rechasa Dios como Gobernante, y nan no kier somete nan mes na su leinan y principionan husto. Sin realisa esei hende a somete nan mes na Dios su Adversario, Satanas, pasobra “henter mundo ta bou di control di e malbado.” (1 Juan 5:19) Unabes nos ta na haltura di e echo aki ta bira mas facil pa nos compronde dicon situacionnan malo ta existi. Satanas ta malicioso, yen di odio, engañoso y cruel. Pues nos por spera cu mundo ta refleha e personalidad di su gobernante. Nada straño anto cu tin asina tanto maldad!

7. Menciona algun motibo pakico nos ta sufri.

⁷ Un otro motibo pakico nos ta sufri ta imperfeccion humano. Hende pecaminoso tin e tendencia di lucha pa domina otro, y e lucha ei hopi biaha ta resulta den guera, opresion y sufrimento. Manera Eclesiastes 8:9 ta bisa corectamente: “Hende a eherce autoridad riba un otro hende pa su daño.” Un otro motibo mas di sufrimento ta loke Bijbel ta referi na dje como “tempo y suceso imprevisto.” (Eclesiastes 9:11, NW) Hopi biaha, hende ta experencia calamidad pasobra nan ta na e luga robes na e momento robes.

8, 9. Con nos por sa cu Jehova ta realmente interesa den nos?

⁸ Ta un consuelo pa haya sa cu Jehova no ta causa sufrimento. Pero Dios realmente ta interesa den loke ta sosode den nos bida? E contesta alentador ta si! Nos sa cu Jehova ta interesa pasobra den su Palabra inspira e ta bisa nos dicon el a permiti hende sigui un mal rumbo. Dios su motibonan tin di aber cu dos cuestion fundamental: su soberania y e integridad di hende. Siendo e Creador todopoderoso, Jehova no ta obliga di splica nos pakico e ta permiti sufrimento. Sinembargo, e ta hacie pasobra e ta interesa den nos.

⁹ Considera mas evidencia cu Dios ta interesa den nos. E “tabata tristo den su curason” ora cu maldad a yena e Tera den tempo di Noe. (Genesis 6:5, 6) E ta sinti otro awe? No, pasobra Dios no ta cambia. (Malakias 3:6) E ta odia inhusticia, y e tin rabia di mira hende sufri. Bijbel ta siña nos cu pronto Dios lo drecha tur e daño cu a resulta for di hende su gobernacion y di e influencia di Diabel. Esei ta prueba combencente cu Dios ta interesa den nos, no ta berdad?

10. Kico Jehova ta pensa di hende su sufrimento?

¹⁰ Lidernan religioso ta duna un bista completamente robes di Dios ora cu nan ta bisa cu e tragedianan cu nos ta experencia den bida ta su boluntad. Al contrario, Jehova ta anhela pa pone fin na hende su sufrimento. Segun 1 Pedro 5:7 [NW], “e ta interesa den boso.” Esei ta loke Bijbel ta siña realmente!

Pakico Nos Ta na Mundo?

11. Kico e religionnan di mundo ta bisa hopi biaha tocante hende su bida riba Tera?

¹¹ Laga nos considera e di dos pregunta cu hopi hende ta haci nan mes: Pakico nos ta na mundo? E religionnan di e mundo aki hopi bes ta contesta cu hende ta riba Tera temporalmente. Nan ta mira Tera como djis un parada di transito riba e caminda pa bida na un otro luga. Tin miembro di clero eroneamente ta siña hende cu un dia Dios lo destrui e planeta aki. Debi na tal siñansa, hopi hende a conclui cu mihor nan probecha di tur loke cu bida tin aden tanten cu nan por, pasobra ta morto so ta warda nan. Kico Bijbel ta siña realmente tocante e motibo cu nos ta na mundo?

12-14. Kico Bijbel ta siña tocante Dios su proposito pa Tera y pa humanidad?

¹² Dios tin un proposito maraviyoso pa Tera y pa humanidad. E “no a crea [e Tera] pa e keda bashi, ma el a form’e pa e wordo habita.” (Isaias 45:18) Ademas, Jehova “a establece Tera riba su fundeshinan, pa asina esei no kita for di su luga nunca mas.” (Salmo 104:5) Ora nos siña e cosnan aki tocante Dios su proposito pa Tera y pa humanidad, nos por compronde pakico nos ta na mundo.

¹³ Genesis capitulo 1 y 2 ta mustra cu Jehova cuidadosamente a prepara e Tera pa hende por biba ariba. Na final di e periodo di creacion ei cu tabatin di aber cu nos planeta, tur cos tabata “masha bon.” (Genesis 1:31) Dios a pone e prome homber y muher, Adam cu Eva, den e bunita hofi di Eden y a percura pa nan tin un abundancia di bon cuminda. Dios a bisa e prome pareha: “Sea fructifero y multiplica, y yena e Tera y haci esaki somete na bo.” Nan mester a haya yiu perfecto, percura pa henter mundo bira manera nan cas paradisiaco y goberna e bestianan na un manera amoroso.—Genesis 1:26-28.

¹⁴ E proposito di Jehova ta pa un famia humano perfecto biba pa semper riba Tera. E Palabra di Dios ta bisa: “E hustonan lo hereda e Tera, y lo biba den dje pa semper.” (Salmo 37:29) Si, humanidad a ser crea pa disfruta di bida eterno den Paradijs riba Tera. Esei ta Dios su proposito, y esei ta loke Bijbel ta siña realmente!

Kico Ta Pasa cu Nos Ora Nos Muri?

15. Kico mayoria religion di mundo ta siña tocante loke ta pasa cu nos ora nos muri?

¹⁵ Laga nos considera awor e di tres pregunta cu ta precupa hopi hende: Kico ta pasa cu nos ora nos muri? Mayoria religion di mundo ta siña cu den hende tin algo cu ta sigui biba despues cu e curpa muri. Tin gruponan religioso cu ainda ta pega na e idea cu Dios ta castiga e malbadonan dor di somete nan na sufrimento eterno den un fierno di candela. Pero esei ta e berdad? Kico Bijbel ta siña realmente tocante morto?

16, 17. Segun Bijbel, den ki condicion e mortonan ta?

¹⁶ E Palabra di Dios ta declara: “E bibonan sa cu nan lo muri, ma e mortonan no sa nada, ni nan no tin recompensa mas.” Siendo cu e mortonan “no sa nada”, nan no por tende, mira, papia, sinti ni pensa. Nan no ta haya ningun recompensa of pago mas. Ta con nan ta haci hay’e? Nan no por haci ningun trabou! Es mas, “nan amor, nan odio y nan celo a perece caba”, pasobra nan no por expresa ningun emocion.—Eclesiastes 9:5, 6, 10.

¹⁷ Loke Bijbel ta bisa di e topico aki ta simpel y cla: e mortonan no ta sigui biba un otro caminda. No tin nada ta sali for di nos curpa ora nos muri y sigui biba pa asina e por nace di nobo den un otro curpa, manera e hendenan cu ta kere den reencarnacion ta bisa. Nos por ilustra esei asin’aki: E bida cu nos tin ta manera e vlam di un bela. Ora paga e bela, e vlam no ta bai ningun caminda. Simplemente e no t’ei mas.

18. Ora un studiante di Bijbel siña cu e mortonan no ta conciente di nada, ki conclusionnan e por saca?

¹⁸ Pensa riba loke e berdad simpel pero potente ei ta implica. Ora un studiante di Bijbel siña cu e mortonan no ta conciente di nada, lo e por conclui facilmente cu sin importa cuanto rencor su defunto antepasadonan por tabatin durante nan bida, nan no por molesti’e awor. Tambe lo e por compronde masha lihe cu su sernan keri cu a muri no por tende, mira, papia, sinti ni pensa mas. Pues anto, nan no por ta sufriendo soledad insoportabel den purgatorio ni ta penando den un luga di tormento cayente. Sinembargo, Bijbel ta siña nos cu e mortonan cu ta den Dios su memoria lo ser resusita. Esta un speransa maraviyoso!—Juan 5:28, 29.

Un Buki Nobo pa Nos Uza

19, 20. Como cristian, ki responsabilidad nos tin, y cua buki pa studia Bijbel ta specialmente diseña pa nos uza den nos ministerio?

¹⁹ Nos a considera apenas tres pregunta cu hopi hende ta haci nan mes. Den cada caso, nos a mira cu loke Bijbel ta siña ta cla y simpel. Ta ki un goso di por comparti e berdadnan ei cu hende cu kier sa kico Bijbel ta siña! Pero tin hopi otro pregunta importante pa cua hende di curason honrado mester haya contesta cu ta laga nan keda satisfecho. Como cristian, nos tin e responsabilidad di yuda nan haya contesta riba e preguntanan ei.

²⁰ Ta un reto pa siña hende berdadnan biblico den un manera cla y cu ta atrae nan curason. “E esclabo fiel y prudente” a prepara un buki cu lo yuda nos enfrenta e reto ei, un buki specialmente diseña pa nos uza den nos ministerio cristian. (Mateo 24:45-47) E buki aki di 224 pagina ta titula Kico Bijbel Ta Siña Realmente?

21, 22. Menciona algun rasgo remarcabel di e buki Kico Bijbel Ta Siña Realmente?

²¹ E buki aki a keda presenta na e Congresonan di Districto 2005 di Testigonan di Jehova “Obediencia na Dios”, y e tin varios rasgo remarcabel. Por ehempel, e tin un introduccion di cinco pagina cu ta resultando masha util pa yuda cuminsa estudio di Bijbel. Probablemente lo bo nota cu ta masha facil pa papia tocante e plachinan y e textonan biblico cu tin den e introduccion. Tambe lo bo por uza e informacion cu tin den e seccion aki pa splica e doño di cas con e por haya capitulo y versiculo den Bijbel.

²² E buki ta skirbi na un manera simpel y cla. A haci un esfuerso pa yega na curason di e studiante dor di lag’e mira cu e informacion tin di aber cu su bida. Na comienso di cada capitulo tin varios pregunta di introduccion anto na final di cada capitulo tin un cuadro titula “Loke Bijbel Ta Siña.” E cuadro aki tin e contesta biblico riba e preguntanan di introduccion. Plachinan bunita hunto cu nan comentario y tambe e ilustracionnan cu tin den e publicacion aki lo yuda e studiante capta ideanan nobo. Aunke a tene e parti principal di e buki basta simpel, tin un apendix cu lo permiti bo bai mas en detaye riba 14 topico importante si e studiante tin mester di informacion adicional.

23. Ki sugerencianan nos ta haya relaciona cu uzo di e buki Bijbel Ta Siña na estudio di Bijbel?

²³ E buki Bijbel Ta Siña ta diseña pa yuda nos siña hende di diferente nivel di educacion y di varios antecedente religioso. Si un studiante no tin ningun conocemento di Bijbel, kisas ta tuma mas cu un sesion di estudio pa trata un capitulo. No pasa pura pura riba e informacion, sino mas bien haci esfuerso pa yega na curason di e studiante. Si e no ta compronde un cierto ilustracion cu a uza den e buki, splic’e of uza un otro ilustracion. Prepara bon, haci bo best pa uza e buki na un manera efectivo y pidi Dios su yudansa den oracion di manera cu bo por maneha “e palabra di berdad na un manera corecto.”—2 Timoteo 2:15.

Sea Gradicido pa Bo Privilegionan Precioso

24, 25. Jehova a duna su pueblo ki privilegionan precioso?

²⁴ Jehova a duna su pueblo privilegionan masha precioso. El a haci posibel cu nos por siña e berdad tocante dje. Nos no mester balota e privilegio ei nunca! De echo, Dios a sconde su propositonan pa hende arogante y a revela nan na hende humilde. Relaciona cu esaki Hesus a bisa: “Mi ta alaba bo, o Tata, Señor di shelo y Tera, cu bo a sconde e cosnan aki pa sabinan y inteligentenan y a revela nan na mucha chikito.” (Mateo 11:25) Ta un honor unico di por ser conta entre e humildenan cu ta sirbi e Soberano Universal, Jehova.

²⁵ Dios a duna nos tambe e privilegio di siña otro hende tocante dje. No lubida cu lidernan religioso a pinta Dios malo pa medio di e mentiranan cu nan a siña hende tocante dje. Debi na esei hopi hende tin un impresion completamente robes di Jehova, y ta pensa cu e no ta interesa den nos y cu su curason ta duro, sin sintimento. Abo ta dispuesto, si ansioso, pa yuda rectifica e mal impresion cu hende tin di Jehova? Abo kier pa tur hende di curason honrado haya sa e berdad tocante Dios? Si ta asina, demostra bo obediencia na Dios dor di predica cu entusiasmo y siña otro hende loke e Scritura ta bisa riba temanan importante. Hende cu ta buscando e berdad tin cu haya sa kico Bijbel ta siña realmente.

Kico Bo Ta Contesta?

• Con nos por sa cu Dios ta interesa den nos?

• Pakico nos ta na mundo?

• Kico ta pasa cu nos ora nos muri?

• Ki rasgonan di e buki Bijbel Ta Siña abo ta haya hopi util?

[Plachi na pagina 22]

Bijbel ta siña nos cu lo bin un fin na sufrimento

[Reconocemento]

Ariba na man drechi, mucha muher: © Bruno Morandi/age fotostock; man robes, señora: AP Photo/Gemunu Amarasinghe; abou na man drechi, refugiadonan: © Sven Torfinn/Panos Pictures

[Plachi na pagina 23]

Hende husto lo biba pa semper den Paradijs