Abraham​—Un Homber cu Fe

Imagina bo e siguiente escena: Durante un anochi trankil, Abraham ta para pafo ta contempla e cielo yen di strea. Segun cu e ta wak esakinan, e no por keda sin pensa riba loke Dios a primintie, esta, cu su descendientenan lo bira mes numeroso cu strea. (Genesis 15:5) Si, e streanan a sirbi como un recordatorio di Jehova su promesa. Ademas, nan a sirbi como un garantia p’e. Dicon? Pasobra si Jehova tin e poder pa crea e inmenso universo y tur loke tin den dje, lo ta facil p’e percura pa Abraham cu Sara haya yiu. E fe ey Abraham tabatin.

KICO TA FE? Segun Bijbel, “fe” ta e confianza firme cu hende tin, basa riba evidencia solido, cu loke nan ta spera riba dje lo keda realisa. Un persona cu tin fe den Dios ta enfoca riba cumplimento di Dios su promesanan; p’e, e promesanan ey ta asina sigur cu ta comosifuera nan a cumpli caba.

CON ABRAHAM A DEMOSTRA FE? Abraham a demostra cu e tabatin fe den e promesanan di Dios. Como cu e tabatin un fe fuerte, el a bandona su tera natal, cu e confianza cu Jehova lo a cumpli cu Su promesa y hib’e na un otro tera. Ademas, debi cu Abraham tabatin fe, el a bay di un luga pa otro den Canan, cu e confianza cu su descendientenan lo a posee e tera ey cu tempo. Es mas, Abraham su fe a motiv’e pa obedece Jehova y tabata dispuesto pa ofrece Isaak como sacrificio. E tabata convenci cu Jehova lo por a resucita Isaak si esey tabata necesario.​—Hebreonan 11:8, 9, 17-19.

Abraham a enfoca riba futuro y no riba pasado. Aunke Abraham y Sara kisas tabatin un bida mas comodo na Ur cu na Canan, ‘nan no a keda pensa riba e pais for di cual nan a sali.’ (Hebreonan 11:15, Beibel Santu) Mas bien, nan a enfoca riba e futuro bendicionnan cu Dios tabatin pa nan y nan descendientenan.​—Hebreonan 11:16.

Abraham tabatin bon motibo pa confia den Jehova? Sigur cu si. Jehova a cumpli cu tur su promesanan. Cu tempo, Abraham su descendientenan a bira e nacion di Israel. Y manera Jehova a priminti Abraham, e Israelitanan a bay biba na Canan.​—Josue 11:23.

LES PA NOS: Nos por tin sigur cu Jehova lo cumpli cu tur su promesanan. Y aunke for di punto di bista di hende algun di nan por parce imposibel, nos ta confia cu “pa Dios tur cos ta posibel.”​—Mateo 19:26.

Ademas, e ehempel di Abraham ta siña nos pa enfoca riba futuro bendicionnan y no riba pasado. Esey ta precies loke un homber cu yama Jason a siña haci. Jason tin un maleza cu a paralisa henter su curpa. El a bisa: “Mi mester admiti cu tin ora mi sa pensa riba pasado. Y loke mas mi ta sinti falta di dje ta cosnan chikito, manera por ehempel brasa mi casa Amanda.”

Sinembargo, Jason tin pleno confianza cu Jehova lo cumpli cu su promesanan. Si, e tin fe cu pronto nos planeta Tera lo bira un paradijs, cu hende fiel lo tin salud perfecto y cu nan lo biba pa semper.a (Salmo 37:10, 11, 29; Isaias 35:5, 6; Revelacion 21:3, 4) Jason ta bisa: “Mi ta recorda mi mes cu e mihor tempo tin cu bini ainda.” E ta splica: “Pronto lo no tin stress, ansiedad, tristeza ni lamento mas​—tur lo ta cos di pasado.” Jason ta un excelente ehempel di fe, mescos cu Abraham.

[Nota]