Na Ki Tempo e Guera di Armagedon Lo Cuminsa?

TUR cos ta cla pa e guera di Armagedon cuminsa. Dicon nos ta bisa esey?

Wel, ya caba tin miyones di hende rond mundo cu ta sirbi Jehova y cu ta biba segun e normanan moral eleva di Bijbel. Si, cu yudansa di Jehova, miyones di hende di tur nacion, tribu y lenga ta forma un famia uni di personanan cu ta stima otro. Testigonan di Jehova ta disfruta di un hermandad asina.​—Juan 13:35.

Pronto Satanas lo reuni su ehercitonan y lansa un atake sin precedente riba e pueblo pacifico y aparentemente indefenso aki. (Ezekiel 38:8-12; Revelacion 16:13, 14, 16) Dicon nos por ta sigur cu esaki lo sosode pronto? Pasobra Bijbel ta menciona sucesonan specifico cu ta yuda nos compronde na ki tempo e guera di Armagedon lo cuminsa. Y hopi di e profecianan aki ta cumpliendo caba.

Profecianan Cu Ta Cumpliendo

Hesus su discipelnan a puntr’e con hende por haya sa na ki tempo e “conclusion di e era” lo a cuminsa. (Mateo 24:3) Den su contesta, Hesus a señala na un tempo cu ‘nacion lo lanta contra nacion y reino contra reino, y cu lo tin scarsedad di cuminda y temblor den un luga tras di otro.’ Ademas, el a bisa cu “tur e cosnan aki ta cuminsamento di calamidad, manera dolor di parto.” (Mateo 24:7, 8) Apostel Pablo a yama e periodo aki “e ultimo dianan” y a bisa cu den e dianan ey lo bini “temponan critico, dificil pa trata cu ne.” (2 Timoteo 3:1) Abo no ta haya cu e profecianan aki ta describi loke ta tumando luga awe?

Dicon e periodo aki lo ta asina dificil? Apostel Juan a duna e motibo: El a profetisa cu Satanas y su demoñonan lo tin “masha poco tempo” pa haci maldad riba tera. El a mustra tambe cu Satanas lo ta “yen di rabia” durante e periodo ey. (Revelacion 12:7-12) Abo no ta ripara cu hende rond mundo awe ta rabia lihe y ta cla pa uza violencia?

Hesus a profetisa tambe di un obra extraordinario cu lo tuma luga durante e periodo dificil aki. El a bisa cu ‘e bon noticia di e Reino di Dios lo ser predica den henter e tera habita, como testimonio pa tur nacion, anto e fin lo yega.’ (Mateo 24:14) Awendia, Testigonan di Jehova ta predica e bon noticia di e Reino di Dios den mas cu 235 pais y den mas cu 500 idioma. Nan ta publica dos revista basa riba Bijbel, E Toren di Vigilancia y ¡Despertad!; nan ta e revistanan mas distribui na mundo. Ademas, Testigonan di Jehova a traduci Bijbel den mas o menos 100 idioma. Nan obra ta un trabou boluntario y ta ser sosteni pa donacion boluntario. Ta e trabou di predica cu Testigonan di Jehova ta haci ta cumplimento di e profecia di Hesus?

Bijbel ta papia tambe di algun suceso cu lo hiba directamente na e guera entre Jehova Dios y su enemigonan. Laga nos analisa tres profecia cu no a cumpli ainda.

Profecianan Cu Lo Cumpli Pronto

E prome profecia: Bijbel ta bisa cu e lidernan di mundo lo emiti un declaracion special di “paz y siguridad.” Probablemente nan lo haci esaki pensando cu nan ta cerca di resolve e problemanan principal di humanidad. Sinembargo, loke lo bini despues di nan declaracion ta leu for di e paz cu nan a proclama.​—1 Tesalonicensenan 5:1-3.

Di dos profecia: Despues, varios gobierno lo lanta contra organisacionnan religioso di mundo. Bijbel ta uza un bestia salbahe pa simbolisa e gobiernonan aki; riba e bestia tin un muher sinta cu ta simbolisa tur religion falso. (Revelacion 17:3, 15-18) Sin cu e bestia simbolico aki sa, lo e cumpli cu e boluntad di Dios ora e destrui tur religion cu ta pretende di representa Dios.

Den un manera simbolico, apostel Juan a describi e drama ey cu e siguiente palabranan: “E bestia salbahe cu e dies cachonan cu bo a mira lo odia e prostituta. Nan lo kita tur cos for di dje, kit’e sunu, come su carni y kim’e completamente cu candela. Pasobra Dios a hinca den nan curason pa cumpli cu Su pensamento.”​—Revelacion 17:16, 17.

Di tres profecia: Despues di e atake exitoso aki contra religion falso, Satanas lo dirigi e gobiernonan pa nan ataca e adoradonan di Jehova Dios.​—Revelacion 7:14; Mateo 24:21.

Kico Esaki Ta Nifica pa Bo?

Si ainda bo no a studia Bijbel na un manera profundo, kisas ta dificil pa bo kere cu e profecianan ey lo cumpli. Pero tin bon motibo pa kere cu nan lo cumpli en detaye y cu esey lo ta pronto. Tin un gran cantidad di profecia biblico cu a cumpli caba; nan ta un garantia cu esnan cu nos a trata den e articulo aki tambe lo cumpli.a

Ta bon pa bo tuma un poco tempo y busca pa sa dicon Testigonan di Jehova ta convenci cu “e guera cu lo tuma luga riba e gran dia di Dios, e Todopoderoso” lo bini pronto, y dicon bo no tin nodo di tin miedo. Y laga e Testigonan splica bo kico ta e cosnan cu Bijbel ta mustra cu bo mester haci pa bo por ta entre e hendenan cu Jehova Dios ta proteha. (Revelacion 16:14) Loke bo haya sa lo por cambia bo punto di bista di futuro.

[Nota]

[Comentario na pagina 8]

E obra di predica cu Testigonan di Jehova ta realisa por ta cumplimento di un profecia biblico?