Dicon Dios Tin un Organisacion?

E articulo aki ta trata algun pregunta cu kisas bo tin y ta mustra bo unda pa haya e contestanan den bo Bijbel. Si bo ta desea, Testigonan di Jehova gustosamente lo trata e preguntanan aki cu bo.

1. Pakico Dios a organisa e Israelitanan?

Dios a organisa e descendientenan di e patriarca Abraham como nacion y a duna nan un codigo di ley. El a yama e nacion ey Israel. Nan responsabilidad tabata pa proteha adoracion berdadero y e Palabra di Dios, esta, e Scritura Santo. (Salmo 147:19, 20) Esaki a beneficia hende di tur nacion.​—Lesa Genesis 22:18.

Si, Dios a scoge e Israelitanan pa nan ta su testigonan. Anto ora nan a obedece su leynan, nan a ricibi hopi bendicion. (Deuteronomio 4:6) Pues, si nos analisa e historia di e Israelitanan, nos lo siña conoce e Dios berdadero mihor.​—Lesa Isaias 43:10 y 12.

2. Dicon cristiannan berdadero ta forma parti di un organisacion?

Despues di tempo, e nacion di Israel a perde e aprobacion di Dios, y Jehova a reemplasa e nacion aki cu e congregacion cristian. (Mateo 21:43; 23:37, 38) Pesey awendia, ta cristiannan berdadero ta Testigonan di Jehova y no e Israelitanan.​—Lesa Echonan 15:14 y 17.

Hesus a instrui su siguidonan con pa duna testimonio tocante Jehova como un grupo organisa y tambe con pa haci hende di tur nacion discipel. (Mateo 10:7, 11; 24:14; 28:19, 20) E trabou di predica aki ta yegando su culminacion. Awe tin miyones di hende, procedente di tur nacion, uni den adoracion berdadero. (Revelacion 7:9, 10) Como cu cristiannan berdadero ta forma parti di un organisacion, nan por encurasha otro y yuda otro. Y rond mundo, nan ta haya e mesun instruccionnan biblico na nan reunionnan.​—Lesa Hebreonan 10:24 y 25.

3. Con Testigonan di Jehova a cuminsa den tempo moderno?

E organisacion di Testigonan di Jehova di tempo moderno a cuminsa funciona desde 1870. E tempo ey, un grupo chikito di studiante di Bijbel a descubri varios berdad biblico cu tabata perdi pa hopi tempo. Nan a haya sa cu Hesus a organisa e congregacion cristian pa predica e bon noticia. Pesey nan a cuminsa cu un campaña internacional di predica e mensahe di Reino. Na 1931, nan a cuminsa yama nan mes Testigonan di Jehova.​—Lesa Echonan 1:8; 2:1, 4; 5:42.

4. Con e organisacion di Testigonan di Jehova ta funciona awe?

Den prome siglo, tur congregacion cristian tabata beneficia di e guia di un grupo di hende, esta e cuerpo gobernante, kendenan tabata reconoce Hesus como Cabes di e congregacion cristian. (Echonan 16:4, 5) Awe tambe Testigonan di Jehova ta reconoce Hesus como nan Lider. (Mateo 23:9, 10) Nan ta beneficia di e guia di un Cuerpo Gobernante, cu ta consisti di ancianonan experencia, kendenan ta uza e Scritura pa duna instruccion y encurashamento na mas cu 100.000 congregacion. Anto den cada congregacion tin un grupo di homber capacita cu ta sirbi como anciano, of superintendente. E hombernan aki ta stima e tou di Dios y ta percura bon pa nan.​—Lesa 1 Pedro 5:2 y 3.

E proposito di e organisacion di Testigonan di Jehova ta pa predica e bon noticia y haci discipel. Anto pa alcansa hende rond mundo cu e bon noticia di Reino, nan ta traduci, imprimi y distribui literatura basa riba Bijbel den mas cu 500 idioma. Nan ta predica di cas pa cas, mescos cu e apostelnan di Hesus a haci. (Echonan 20:20) Y nan ta ofrece tur hende cu kier haya sa e berdad un estudio di Bijbel. Si, Testigonan di Jehova ta haci esfuerso pa agrada Dios y pa yuda hende, y pesey nan ta un organisacion di hende feliz.​—Lesa Salmo 33:12; Echonan 20:35.

Pa mas informacion, wak capitulo 19 di e buki aki, Kico Bijbel Ta Siña Realmente?, publica pa Testigonan di Jehova.