Saca Pleno Beneficio di Bo Lesamento di Bijbel

1-3. Kico ta algun di e beneficionan cu nos ta saca ora nos ta lesa Bijbel y aplica loke nos ta siña?

“TUR dia mi ta gradici Jehova cu e ta yuda mi compronde Bijbel.” E ruman muher di edad cu a expresa e palabranan ey a lesa Bijbel completo 40 biaha caba y e ta sigui lesa Bijbel. Un ruman muher mas hoben a skirbi cu lesamento di Bijbel a yud’e mira Jehova como un persona real. Y esey a pone cu el a hala mas cerca di su Tata celestial. El a bisa: “Nunca mi tabata asina feliz!”

² Apostel Pedro a anima nos tur pa “crea un anhelo pa e lechi puro di e palabra.” (1 Ped. 2:⁠2) Hende cu ta studia Bijbel pa satisface e anhelo ey y cu ta aplica loke nan ta siña tin un consenshi limpi y proposito den bida. Ademas, nan por cera amistad duradero cu otro hende cu tambe ta stima y sirbi e Dios berdadero. Tur esakinan ta motibonan valido pa nos “tin placer den e ley di Dios.” (Rom. 7:⁠22) Pero tin mas beneficio. Laga nos wak algun di nan.

³ Mas bo siña tocante Jehova y su Yiu, mas bo amor pa nan y pa bo prohimo lo crece. Conocemento exacto di Bijbel ta yuda bo compronde con Dios lo salba hende obediente ora e destrui e mundo malbado aki. Ademas, bo tin bon noticia pa comparti cu hende den sirbishi. Y Jehova lo bendiciona bo segun cu bo ta siña otro hende e cosnan cu bo a siña for di Bijbel.

LESA Y MEDITA

4. Kico Josue 1:⁠8 ta manda nos haci, y kico esaki ta encera?

⁴ Jehova no kier pa su sirbidornan lesa Bijbel aribariba. El a bisa Josue: “E buki di ley aki lo no aparta for di bo boca, ma bo mester medita den dje di dia y anochi.” ( Jos. 1:⁠8; Sal. 1:⁠2) E palabranan aki ta mustra cu nos mester lesa Bijbel di tal manera cu nos por ­“medita” riba loke nos ta lesa. Ora nos ta haci esaki, nos por presta atencion na porcionnan di Bijbel cu por beneficia y anima nos na e momento ey. Pues, ora nos topa cu e versiculonan of relatonan ey, ta bon pa nos lesa nan cuidadosamente, y kisas hasta na bos abou. Di e manera ey, loke nos ta lesa por touch nos curason. Dicon esaki ta importante? Pasobra ta ora bo ta compronde kico Dios kier pa bo haci, lo bo sinti bo mas motiva pa cumpli cu su boluntad.

5-7. Duna un ehempel cu ta mustra con meditacion riba e Palabra di Dios por yuda bo (a) keda moralmente limpi; (b) trata otro hende cu pasenshi y bondad y (c) confia den Jehova hasta den tempo dificil.

⁵ Meditacion ta importante specialmente ora nos ta lesa bukinan di Bijbel cu no ta hopi conoci pa nos. Pa ilustra esaki, laga nos imagina tres situacion. Prome, pensa riba un ruman homber hoben cu ta lesando e buki di Oseas. Despues di a lesa versiculo 11 pa 13 di capitulo 4, e ta pausa pa medita riba e textonan aki. (Lesa Oseas 4:​11-⁠13.) Dicon? Wel, e versiculonan aki a capta su atencion pasobra e ta luchando contra presion pa comete inmoralidad na scol. Segun cu e ta medita, e ta bisa: ‘Hasta ora hende ta haci malo den priva, Jehova ta mira. Y ami no kier hacie tristo.’ E ruman ta tuma e decision pa keda moralmente limpi den bista di Dios.

⁶ E di dos situacion ta trata di un ruman muher cu ta lesando e buki di Joel y ta para un rato na capitulo 2 versiculo 13. (Lesa Joel 2:⁠13.) Segun cu e ta medita riba e versiculo aki, e ta realisa cu e tin cu imita Jehova, kende ta “yen di gracia y yen di compasion, kende no ta rabia lihe y ta abunda den misericordia.” Pesey, debi cu tin bes e ta uza sarcasmo y palabranan cu ta hurt ora cu e ta papia cu su esposo y otro hende, el a dicidi cu e lo stop di haci esey.

⁷ Di tres situacion: Pensa riba un tata cristian cu a perde su trabou y cu ta preocupa cu e bienestar di su esposa y yiunan. E ta medita riba Nahum 1:⁠7 cu ta bisa cu Jehova “conoce esnan cu ta tuma refugio den dje” y ta proteha nan “den e dia di angustia.” Y esey ta anim’e; e ta realisa cu Jehova ta stima tanto e como su famia, y e no ta sigui preocupa innecesariamente. Despues, e ta medita riba versiculo 15. (Lesa Nahum 1:⁠15.) Nos ruman ta compronde cu un manera p’e demostra cu Jehova ta su refugio ta si e predica e bon noticia den tempo dificil. Pesey, tanten cu e ruman ta sigui busca trabou, e ta bay sirbishi hunto cu e congregacion den siman.

8. Splica brevemente cua hoya spiritual bo a haya durante bo lesamento di Bijbel.

⁸ E puntonan cu nos a caba di trata ta for di bukinan biblico cu algun hende kisas ta haya dificil pa compronde. Pero e bukinan aki, esta Oseas, Joel y Nahum, tin mas texto cu bo por beneficia di dje. Ta bon pa bo medita riba esakinan tambe. Nan por anima bo y haci bo un persona sabi. Y kico di e resto di Bijbel? Dios su Palabra ta manera un mina yen di diamanta. Pesey, sigui coba den e mina ey! Si, nos mester lesa Bijbel completo cu e meta pa haya Dios su guia y animacion cu ta manera diamanta.

HACI ESFUERSO PA COMPRONDE LOKE BO TA LESA

9. Kico nos por haci pa compronde Bijbel mihor?

⁹ Si, ta importante pa bo lesa un porcion di Bijbel tur dia. Pero, bo mester compronde loke bo ta lesa tambe. Pesey, haci bon uzo di e publicacionnan di Jehova su organisacion pa bo siña mas tocante e hendenan, luga- y sucesonan cu Bijbel ta papia di dje. Ademas, si bo no sa sigur con pa aplica un cierto siñansa biblico, bo por acerca un anciano of un otro cristian maduro pa haya yudansa. Awor, pa ilustra con importante ta pa nos aumenta nos comprondemento, laga nos analisa e ehempel di un cristian di prome siglo cu a traha duro pa haci esey. Su nomber tabata Apolos.

10, 11. (a) Ki yudansa Apolos a haya pa mehora su sirbishi? (b) Kico nos por siña for di e relato di Apolos? (Wak e cuadro “Loke Bo Ta Siña Hende Ta al Dia cu e Berdad?”)

¹⁰ Apolos tabata un hudiu cu a bira cristian. E tabata “bon versa den e Scritura” y “ferviente den spirito.” E buki di Echonan ta bisa cu “e tabata papia y siña hende corectamente e cosnan tocante Hesus, ma [cu] e tabata sa solamente di e bautismo cu Juan a predica.” Inconscientemente Apolos tabata siña hende un siñansa tocante bautismo cu no tabata valido mas. Pero despues cu un pareha cristian, Priscila y Akila, a tend’e predica na Efeso, nan a splic’e “e caminda di Dios na un manera mas exacto.” (Echo. 18:​24-⁠26) Con Apolos a beneficia di esaki?

¹¹ Despues cu Apolos a predica na Efeso, el a bay Acaya. “Ora el a yega eynan, e tabata un gran yudansa pa esnan cu a bira creyente pa medio di e bondad inmereci di Dios; pasobra publicamente y na un manera masha intenso e tabata proba cabalmente cu e hudiunan tabata robes, mientras cu pa medio di e Scritura e tabata demostra cu Hesus ta e Cristo.” (Echo. 18:​27, 28) E ora ey si e por a splica e nificacion di bautismo cristian corectamente y ‘yuda’ esnan cu a caba di bira creyente progresa den e berdad. Kico nos por siña for di e relato aki? Mescos cu Apolos, nos ta haci esfuerso pa compronde loke nos ta lesa den Bijbel. Sinembargo, ora un ruman experencia duna nos sugerencia pa mehora nos manera di siña, nos mester ta humilde y cla pa acepta esaki. Si nos tin e actitud ey, e calidad di nos sirbishi lo mehora sigur.

UZA LOKE BO TA SIÑA PA YUDA OTRONAN

12, 13. Splica con nos por uza Bijbel cu tacto pa yuda studiantenan di Bijbel progresa.

¹² Mescos cu Priscila, Akila y Apolos nos tambe por ta un gran yudansa pa otronan. Por ehempel, con bo ta sinti bo ora bo yuda un persona interesa vence un obstaculo cu tabata strob’e di progresa? Of, como anciano, con bo ta sinti bo ora un compañero cristian gradici bo pa un conseho biblico cu bo a dun’e ora e tabata pasa den tempo dificil? No tin duda, ora nos uza e Palabra di Dios pa yuda otronan mehora nan calidad di bida, nos ta haya goso y satisfaccion.a Con abo por logra esey?

¹³ Den tempo di Elias, hopi Israelita tabata indeciso; nan mester a dicidi entre adoracion berdadero y adoracion falso. E conseho cu Elias a duna e hendenan ey por yuda studiantenan indeciso tuma e decision pa progresa spiritualmente. (Lesa 1 Reynan 18:⁠21.) Ata aki un otro situacion: Kisas un persona interesa tin miedo di e manera cu su amigo- of famianan lo reacciona riba e echo cu e ta studia Bijbel. Lo bo por yud’e fortalece su determinacion pa adora Jehova uzando Isaias 51:​12 y 13.​—⁠Les’e.

14. Kico por yuda bo corda textonan di Bijbel ora bo tin mester di nan pa yuda otro hende?

¹⁴ Si, tin hopi porcion di Bijbel cu por anima, corigi y fortalece nos. Pero kisas bo ta puntra: ‘Con mi por corda e texto apropia na e momento apropia?’ Wel, lesa Bijbel y medita riba loke bo ta lesa tur dia. Di e manera ey, bo ta acumula un reserva di texto di Bijbel, y e spirito di Jehova por yuda bo corda esakinan ora bo tin mester di nan.​—⁠Mar. 13:⁠11; lesa Juan 14:⁠26.b

15. Kico bo tin cu haci pa bo por haya un mihor comprondemento di e Palabra di Dios?

¹⁵ Imita Rey Salomon y haci oracion na Jehova pa pidie sabiduria pa bo por cumpli cu bo responsabilidadnan teocratico. (2 Cro. 1:​7-⁠10) Y mescos cu e profetanan den pasado, haci “un investigacion diligente y un buskeda cuidadoso” den e Palabra di Dios pa bo por haya conocemento exacto di Jehova y di su boluntad. (1 Ped. 1:​10-⁠12) Apostel Pablo a anima Timoteo pa nutri su mes “cu e palabranan di fe y di e bon siñansa.” (1 Tim. 4:⁠6) Si bo tambe haci esey, bo por ta den un mihor posicion pa yuda otronan progresa spiritualmente. Y na mes momento, bo ta fortalece bo fe.

E PALABRA DI DIOS TA PROTEHA NOS

16. (a) Con un ‘analisis diario di e Scritura’ a beneficia e Bereanonan? (b) Dicon ta masha importante pa nos lesa Bijbel tur dia?

¹⁶ E hudiunan cu tabata biba na Berea, un stad na Macedonia, tabatin e custumber di ‘analisa e Scritura cuidadosamente tur dia.’ Ora Pablo a predica e bon noticia na e hudiunan ey, nan tabata compara loke e tabata bisa cu loke nan tabata sa caba di e Scritura. Kico tabata e resultado? Hopi di nan a keda convenci cu e tabata siña nan e berdad, y nan “a bira creyente.” (Echo. 17:​10-⁠12) Esaki ta siña nos cu si nos ta lesa Bijbel tur dia, nos fe den Jehova ta bira fuerte. Un fe asina, esta, “e confianza firme cu hende tin cu loke nan ta spera ariba lo keda realisa”, ta masha importante pa nos por sobrevivi y drenta Dios su mundo nobo.​—⁠Heb. 11:⁠1.

17, 18. (a) Con amor y un fe fuerte ta proteha nos curason figurativo? (b) Con speransa ta proteha nos di peliger?

¹⁷ Ta cu bon motibo apostel Pablo a skirbi: “Pa loke ta nos cu ta pertenece na dia, laga nos mantene nos sano huicio y bisti fe y amor manera un harnas di pecho, y e speransa di salbacion manera un helm.” (1 Tes. 5:⁠8) Den bataya, un soldaat mester proteha su curason. Di mes manera, un cristian mester proteha su curason figurativo. Con e por haci esey? E mester cultiva fe fuerte den Dios su promesanan, y e mester stima Dios y su prohimo. E ora ey, ta comosifuera e ta bisti un harnas di pecho di e mihor calidad. E ruman ey lo haci tur loke ta na su alcance pa e no perde Dios su aprobacion.

¹⁸ Pablo a menciona tambe un helm, “e speransa di salbacion.” Den tempo biblico, si un soldaat den bataya no a proteha su cabes, facilmente e por a perde su bida. Pero cu un bon helm, e por a soporta sla na cabes sin sufri daño serio. Di mes manera, nos speransa den Jehova su poder pa salba nos ta bira mas fuerte ora nos ta studia su Palabra. Y un speransa fuerte ta yuda nos resisti hende apostata y nan ‘palabranan bashi’ cu por plama manera cangrena. (2 Tim. 2:​16-⁠19) Ademas, nos speransa por duna nos e forsa pa bisa no na hende cu kier influencia nos pa haci cosnan cu ta desagrada Jehova.

E PALABRA DI DIOS TA YUDA NOS SOBREVIVI

19, 20. Dicon nos ta balora e Palabra di Dios, y con nos ta mustra nos aprecio p’e? (Wak e cuadro “Jehova Ta Duna Mi Net Loke Mi Tin Mester.”)

¹⁹ Mas cerca nos yega di e fin, mas nos mester confia den Jehova su Palabra. Su consehonan ta yuda nos cambia nos mal custumbernan y resisti e deseo di haci pica. Y como cu e Palabra di Dios ta anima y consola nos, nos por enfrenta cualkier prueba cu Satanas y su mundo ta trece riba nos. Si, e guia cu Jehova ta duna nos mediante su Palabra ta yuda nos keda riba e caminda pa bida.

²⁰ Corda cu e boluntad di Dios ta “pa tur sorto di hende ser salba.” Esey ta inclui tanto nos, cu ta sirbidornan di Jehova, como esnan cu nos ta yuda mediante nos trabou di predica y di siña hende. Pero tur hende cu kier ser salba tin cu adkiri “conocemento exacto di e berdad.” (1 Tim. 2:⁠4) Pues, pa nos por sobrevivi e ultimo dianan aki, nos mester lesa Bijbel y aplica loke nos ta lesa. Si, nos lesamento di Bijbel tur dia ta mustra cuanto nos ta aprecia Jehova su Palabra.​—⁠Juan 17:⁠17.