Di Berdad Dios Ta Interesa den Nos?

Tabata dificil pa un señora kere cu Dios ta interesa den dje personalmente. Dicon? El a bisa: “Kisas e obstaculo di mas grandi cu mi tin ta e sintimento di cu mi no ta bal nada.” Abo tambe a yega di sinti asina? Si esey ta e caso, kisas bo ta puntra bo mes: ‘Di berdad Jehova ta interesa den ami?’ E contesta ta si! Y nos ta haya prueba di esey den e palabranan di Hesus.—Lesa Juan 6:44.

Hesus conoce e personalidad y boluntad di Jehova mihor cu cualkier hende. (Lucas 10:22) El a bisa: “Ningun hende no por bin cerca mi a menos cu e Tata, cu a manda mi, hal’e cerca mi.” De echo, e unico manera cu nos por bira un discipel di Cristo—y tambe sirbidor di nos Tata celestial—ta si Jehova mes hala nos cerca dje. (2 Tesalonicensenan 2:13) Si nos compronde kico Hesus tabata kiermen, lo no keda niun duda den nos mente cu Jehova ta interesa den cada un di nos.

Den ki sentido Jehova ta hala nos? E verbo Griego traduci como “hala” tambe por referi na e accion di hala un reda di pisca aden. (Juan 21:6, 11) Acaso esaki ta nifica cu Jehova ta hala nos cerca dje contra nos boluntad, cu e ta obliga nos pa sirbie? Di ningun manera. Jehova a duna nos boluntad liber; e no ta forsa nos curason pa habri. (Deuteronomio 30:19, 20) Un academico a splic’e asin’aki: “No tin un man di porta parti pafo di curason di hende; ta di paden mester habrie.” Jehova ta busca den tur e mil miyon curasonnan riba e tera aki pa wak ken tin un curason cu ta dispuesto ‘pa habri p’e.’ (1 Cronicanan 28:9) Ora e haya un curason asina, e ta reacciona na un manera conmovedor. Con asina?

Na un manera suave Jehova ta hala, of trek, e curason cu ta “dispuesto” cerca dje. (Echonan 13:48) E ta haci esey den dos manera: mediante e mensahe di e bon noticia den Bijbel cu ta yega cerca nos individualmente, y mediante su spirito santo cu ta yuda nos compronde y aplica e berdad den nos bida. (1 Corintionan 2:11, 12) Sin e yudansa di Jehova, nos no por bira su sirbidor ni discipel di Hesus.

Pues, kico e palabranan cu Hesus a bisa na Juan 6:44 ta siña nos di Jehova? Jehova ta atrae hende ora e mira algo bon den nan curason y e ta interesa den cada un di nan. Ora e señora menciona na cuminsamento a compronde e berdad precioso aki, el a sinti un gran alivio. El a bisa: “E privilegio di mas grandi cu un hende por tin ta di sirbi Jehova. Y si el a scoge ami pa ta su sirbidor, mi mester ta valioso den su bista.” Kico di abo? Awor cu bo a haya sa e berdad aki, abo lo habri e porta di bo curason pa Jehova?