Retonan di Famianan Cu Tin Padrastro, Madrastra y Hijastro

Famianan asina tin un reto unico. No ta semper facil pa nan bay bon cu esnan cu no ta biba cu nan den cas.b Por ehempel, den mayoria caso nan tin cu tuma contacto cu e tata of mama biologico riba asuntonan manera areglo di bishita, educacion y pago di alimentacion. Kisas famia- y amigonan tambe tin problema pa acepta e miembronan nobo di famia. Laga nos wak con e consehonan di Bijbel por yuda bo famia nobo cu e tipo di problemanan aki.

SITUACION 1: RELACION CU E OTRO MAYOR DI E YIU

Judith di Namibia a conta: “Un dia, mama di e yiunan di mi casa a bisa nan cu ami ta djis e casa nobo di nan tata y si un dia nos mester haya un yiu, e yiu ey lo no ta nan ruman. E palabranan ey a duel mi pasobra mi stima e yiunan di mi casa comosifuera ta di mi mes nan ta.”

Expertonan ta di acuerdo cu un relacion cu e otro mayor di un yiu por pone hopi presion riba e famia nobo. Hopi bes, entre e madrastra y e mama biologico sa tin friccion. Kico por yuda?

Sugerencia: Pone limitenan rasonabel. Si abo como mayor no laga bo ex-casa mantene contacto cu bo yiunan, nan por sufri emocionalmente.c Mucha tin un luga special den nan curason pa nan mayornan biologico, cu a trece nan na mundo. (Proverbionan 23:22, 25) Di otro banda, si bo laga bo ex-casa mete mucho den bo hogar, bo por pone bo casa actual sinti su mes incomodo of hasta pon’e rabia. Pues, sea balansa, pone limitenan rasonabel pa proteha bo matrimonio, pero coopera mas tanto posibel cu e otro mayor.

TIP PA E MAYORNAN

• Ora bo ta papia cu bo ex-casa, papia mas tanto tocante e yiunan y menos posibel tocante otro cos. Por ehempel, bo por pidie cu tacto si boso por palabra p’e yama e yiunan na cierto oranan den dia. Por lo general, esey ta duna mihor resultado cu ora e yama ki ora cu ta of anochi laat.

• Si no ta abo tin e custodia di bo yiunan, kisas bo por yama nan na telefon, manda carta, sms of e-mail nan pa bo por tin contacto regular cu nan. (Deuteronomio 6:6, 7) Algun mayor hasta ta uza webcam pa comunica via Internet cu nan yiunan. Lo bo por compronde e necesidad- y problemanan di bo yiunan mihor y eherce un influencia positivo den nan bida—mas di loke bo ta pensa ta posibel.

TIP PA E MADRASTRA

• Trata di compronde con mama di e muchanan ta sinti y lag’e sa cu no ta su luga bo kier tuma. (1 Pedro 3:8) Ora su yiunan ta cerca bo, lag’e sa con ta bay cu nan y enfoca mas tanto riba cosnan positivo. (Proverbionan 16:24) Pidie su conseho ora ta necesario y gradicie pa cualkier sugerencia cu e duna bo.

• Limita muestra di cariño na e muchanan dilanti di nan mama. Beverly, un madrastra di Merca, a bisa: “E muchanan kier a yama mi Mami. Ami cu nan tata a palabra cu na cas nan por yama mi Mami, pero no ora nan ta hunto cu nan mama, Jane, of cu su famia. Despues di esey, e relacion entre ami cu Jane a bira mas mihor. Hasta nos a traha hunto pa yuda e muchanan ora scol a organisa actividadnan di comedia y schoolreisje.”

TIP PA YUDA TANTO E MAYORNAN MES COMO E MADRASTRA OF PADRASTRO BAY BON CU OTRO

• Nunca papia malo di e otro mayor of di e padrastro of madrastra dilanti di e muchanan. Ta masha facil pa bisa algo negativo, pero esey por causa nan hopi dolor. Y bo no sa nunca ki ora ni con nan por ripiti bo palabranan. (Eclesiastes 10:20) Si un yiu conta bo cu e otro mayor of e madrastra of padrastro a papia malo di bo, concentra riba su sintimentonan, no esnan di bo. Bo por bisa algo den e direccion aki: “Ta duel mi cu bo a tende esey. Bo mama ta rabia cu mi, y tin biaha ora hende ta rabia, nan ta bisa cos cu no ta bon.”

• Purba pa den ambos hogar por tin e mesun reglanan y disciplina. Si esey no ta posibel, splica e diferencia sin rebaha e otro mayor. Imagina e siguiente situacion:

  Madrastra: Tim, corda colga bo serbete muha.

  Tim: Na cas di mi mama nos ta laga nos serbete gewoon benta abou. Ta e ta colga nan.

  Madrastra (rabia): Ahn si? Ta pesey boso ta asina floho.

  No ta mihor bo contesta asin’aki?

  Madrastra (trankil): OK. Pero aki tur hende ta colga su mes serbete.

• Evita di plania actividad cu ta cay riba dia cu e muchanan tin cu bay cerca e otro mayor. (Mateo 7:12) Si bo no por cambia e ora of dia di e actividad, pidi e otro mayor su aprobacion prome cu bo bisa e muchanan kico bo a plania.

SITUACION 2: RELACION CU E YIUNAN ADULTO

E buki Step Wars ta cita un señora cu ta reclama cu su esposo ta tuma parti pa su yiunan adulto y no kier acepta cu nan ta trat’e malo. E señora ta bisa: “Mi ta cunsumi di rabia.” Si esey ta e caso cu bo, con bo por evita cu e ta afecta bo matrimonio?

Sugerencia: Mustra empatia. Prome Corintionan 10:24 ta bisa: “Laga cada hende sigui busca, no su mes beneficio, sino esun di e otro persona.” Pues, purba compronde y sinti loke e otro persona ta sinti. Kisas e yiunan tin miedo di perde e cariño di nan mayor. Of nan por pensa cu si nan bira mucho amigabel cu bo, nan lo traiciona nan famia original. Di otro banda, kisas un mayor no kier hala atencion di su yiunan riba nan comportacion pa miedo cu esey lo aleha nan di dje.

Bo no por forsa e yiunan di bo casa pa bira bo amigo. Laga bo relacion cu nan desaroya di un forma natural. Por lo general, no ta sabi pa obliga un hende stima bo. (Cantica di Salomon 8:4) Purba di ta rasonabel y realistico pa loke ta e lasonan cu bo tin gana di cera cu e yiunan di bo casa.

No bisa tur loke bo ta pensa of sinti, ni ora nan trata bo malo. (Proverbionan 29:11) Ora bo sinti cu bo tin problema pa domina bo lenga, pidi Jehova Dios loke Rey David di Israel a pidie den oracion: “Pone un guardia na mi boca, o SEÑOR; tene warda na e porta di mi lipnan.”—Salmo 141:3.

Si bo bay biba den e cas caminda e yiunan di bo casa a lanta, bo por keda sorprendi di mira con pega nan ta ainda na e cas. Purba di no haci mucho cambio den e cas, specialmente nan camber. Tambe boso por opta pa bay biba na un otro cas.

SITUACION 3: RELACION CU OTRO FAMIA Y AMIGONAN

Marion, un madrastra di Canada, a bisa: “Hopi biaha mi mayornan tabata duna mi yiu homber regalo, pero nan no tabata duna e yiunan di mi casa. Nos mes tabata purba cumpra algo pa nan, pero no ta tur ora nos tabatin e moda pa haci esey.”

Sugerencia: Bo famia nobo ta bin prome. Laga bo famia- y amigonan sa cu bo famia nobo ta masha importante pa bo. (1 Timoteo 5:8) Maske bo no por spera cu mesora nan lo bay stima e yiunan di bo casa, bo por pidi nan pa nan ta amabel y imparcial cu nan. Splica nan con malo e muchanan lo sinti si nan no ricibi e cariño of atencion cu e otro yiunan si ta haya.

Purba di laga bo ex-suegronan conserva e luga cu nan ta ocupa den bida di bo yiunan. Susan, un mama di Inglatera, a conta: “Mi a bolbe casa 18 luna despues cu mi prome esposo a fayece, y su mayornan tabatin problema pa acepta mi esposo nobo. Pero e relacion a drecha hopi ora nos a envolve nan mas den nos famia, laga e muchanan yama nan y gradici nan pa nan apoyo.”

No ta facil pa mantene un bon relacion cu esnan cu tin laso cu bo famia nobo. Pero si bo aplica conseho biblico, lo bo haya bon resultado, manera Proverbionan 24:3 ta trece dilanti: “Cu sabiduria un cas ta wordo traha, y cu comprondemento e ta wordo estableci.”