Pensa Riba Ki Sorto di Hende Bo Mester Ta

1, 2. ‘Ki sorto di hende nos mester ta’ pa nos haya e aprobacion di Dios?

TA NORMAL cu nos ta interesa pa sa kico hende ta pensa di nos. Pero como cristian, nos mester ta mas preocupa cu loke Jehova ta pensa di nos. Ta e ta e Soberano di universo y “e fuente di bida.”—Sal. 36:9.

² Apostel Pedro a papia di e ‘sorto di hende cu nos mester ta’ for di e punto di bista di Jehova y a urgi nos: “Boso mester ta hende di conducta santo y mester haci obranan cu ta demostra devocion na Dios.” (2 Ped. 3:11) Si nos kier Dios su aprobacion, nos conducta mester ta “santo”, es decir, nos tin cu hiba un bida limpi den tur sentido. Esaki ta inclui e manera cu nos ta pensa, actua y adora Dios. Ademas, nos tin cu ‘haci obranan cu ta demostra tanto nos devocion na Dios’ como nos amor y respet profundo p’e. Pues, e aprobacion di Jehova no ta depende solamente di loke nos ta haci, sino tambe di nos sintimentonan p’e. Jehova ta Esun cu “ta scudriña curason”, pues e sa si nos conducta ta santo y si nos ta rindi devocion exclusivamente na dje of no.—1 Cro. 29:17.

3. Kico nos mester puntra nos mes tocante nos amistad cu Dios?

³ Satanas e Diabel no kier pa nos haci esfuerso pa agrada Dios. De echo, e ta haci tur loke ta na su alcance pa kibra nos amistad cu Jehova. Satanas no ta vacila pa uza mentira y engaño pa desvia nos y kita nos for di e Dios cu nos ta adora. (Juan 8:44; 2 Cor. 11:13-15) Pesey ta bon pa nos puntra nos mes: ‘Con Satanas ta purba di gaña mi? Con mi por proteha mi amistad cu Jehova?’

CON SATANAS TA PURBA DI GAÑA NOS?

4. Riba kico Satanas ta mik su atakenan pa kibra nos amistad cu Dios, y dicon?

⁴ Discipel Santiago a skirbi: “Cada hende ta ser poni na prueba ora e ser atrai y seduci pa su mes deseo.” Y el a agrega: “Anto ora nutri e deseo, e ta duna luz na pica; y pica, na su turno, ora e keda realisa, ta produci morto.” (Sant. 1:14, 15) Den Satanas su esfuerso pa kibra nos amistad cu Dios, e ta mik su atakenan riba e fuente di nos deseonan: nos curason.

5, 6. (a) Kico Satanas ta uza pa ataca nos curason? (b) Cua ta e trampanan cu Satanas ta uza pa lanta mal deseo den nos curason, y cuanto experencia e tin den uza nan?

⁵ Con Satanas ta ataca nos curason? Bijbel ta bisa cu “henter mundo ta den poder di e Malbado.” (1 Juan 5:19) Pues, su armanan ta inclui “e cosnan cu tin den mundo.” (Lesa 1 Juan 2:15, 16.) A traves di miles di aña, Diabel a diseña e sistema malbado aki specialmente pa gaña hende. Mirando cu nos ta biba den e mundo aki, nos mester proteha nos mes contra su tacticanan astuto.—Juan 17:15.

⁶ Satanas ta uza trampa pa lanta mal deseo den nos curason. Apostel Juan a menciona tres ‘cos cu tin den mundo’ cu Satanas ta uza: (1) “deseo di carni”, (2) “deseo di wowo” y (3) “cana broma cu loke bo tin.” Satanas a uza e tres cosnan ey pa purba di pone Hesus cay den tentacion den desierto. Y el a uza nan pa asina hopi tempo cu awe e ta un experto den nan y sa precies cua e tin cu uza cu cada persona, teniendo cuenta cu nan debilidad. Pero prome cu nos bay analisa kico nos por haci pa proteha nos mes, laga nos wak con Diabel a uza cierto tentacion den caso di Eva y a logra gañ’e, pero dicon e no a logra gaña e Yiu di Dios.

“DESEO DI CARNI”

7. Con Satanas a uza e “deseo di carni” pa pone Eva cay den tentacion?

⁷ Nos mester di cuminda pa nos keda na bida. Pesey mes e Creador a diseña planeta Tera pa produci cuminda na abundancia. Pero Satanas por haci mal uzo di e deseo natural aki pa pone nos haci cos cu ta bay contra e boluntad di Dios. Wak con el a haci esaki cu Eva. (Lesa Genesis 3:1-6.) El a bisa Eva cu e por a come for di “e palo di conocemento di bon y malo” sin muri y cu ora e come di dje, lo e bira manera Dios. (Gen. 2:9) Asina Diabel a insinua cu Eva no tabatin mester di obedece Dios p’e keda na bida. Esta un mentira baho! Asina cu el a hinca e idea ey den Eva su cabes, Eva tabatin dos opcion: rechasa e idea ey di biaha, of keda pensa riba dje y permiti e deseo di come e fruta bira mas fuerte. Aunke Eva por a come for di tur e otro palonan den e hofi, el a scoge pa sigui pensa riba loke Satanas a bisa tocante e palo cu tabata meymey di e hofi. Cu ki resultado? “El a coge di su fruta y a come.” Pues, Satanas a crea un deseo den Eva pa algo cu su Creador a prohibi.

8. Con Satanas a uza “deseo di carni” pa purba di pone Hesus cay den tentacion, y dicon e no a logra?

⁸ Satanas a uza e mesun tactica cerca Hesus. Despues cu Hesus a yuna 40 dia y 40 anochi den desierto, Satanas a purba di uza e deseo pa cuminda pa pon’e cay den tentacion. El a bisa Hesus: “Si bo ta yiu di Dios, bisa e piedra aki bira pan.” (Luc. 4:1-3) Hesus tabatin dos opcion: haci un milager pa satisface su hamber, of keda sin hacie. Hesus tabata sa cu e no tabata mag di uza su poder di haci milager pa complace su mes. Aunke e tabatin hamber, su amistad cu Jehova tabata mas importante cu satisface su hamber. Pesey el a contesta Satanas: “Ta para skirbi: ‘Hende no mester biba di pan so, sino tambe di tur palabra cu ta sali for di boca di Jehova.’”—Mat. 4:4; Luc. 4:4.

“DESEO DI WOWO”

9. Kico e expresion “deseo di wowo” ta indica, y con Satanas a uza e deseo aki den caso di Eva?

⁹ Un otro trampa cu Juan a menciona ta “deseo di wowo.” E expresion aki ta indica cu un hende por cuminsa desea un cos simplemente door di wak e. Den caso di Eva, Satanas a traha riba e deseo aki di Eva ora el a bis’e: ‘Bo wowo lo habri.’ Mas Eva a keda wak e fruta prohibi, mas deseabel el a bira p’e. Si, e palo “tabata un delicia pa bista.”

10. Con Satanas a uza “deseo di wowo” pa purba di pone Hesus cay den tentacion, pero con Hesus a reacciona?

¹⁰ Con Satanas a uza “deseo di wowo” pa purba di pone Hesus cay den tentacion? El “a mustra [Hesus] tur e reinonan di e tera habita den un frega di wowo. Anto Diabel a bis’e: ‘Lo mi duna bo autoridad riba tur e reinonan aki y nan gloria.’” (Luc. 4:5, 6) Naturalmente, Hesus no a mira tur e reinonan ey cu su bista literal. Satanas a mustr’e nan den un vision, pensando cu e gloria di e reinonan ey lo a atrae Hesus y pon’e cay den tentacion. Anto Satanas tabatin e tribilidad di bis’e: “Si bo adora mi, tur esey lo ta di bo.” (Luc. 4:7) Pero Hesus di ningun manera no kier tabata e tipo di persona cu Satanas tabata kier p’e ta. Pesey Hesus a contest’e di biaha: “Ta para skirbi: ‘Ta Jehova bo Dios bo tin cu adora, y ta na e so bo tin cu rindi sirbishi sagrado.’”—Luc. 4:8.

“CANA BROMA CU LOKE BO TIN”

11. Con Satanas a gaña Eva?

¹¹ Un di e cosnan cu tin den mundo cu Juan a menciona ta “cana broma cu loke bo tin.” Claro cu ora Adam cu Eva tabata e unico hendenan riba tera, nan no por a ‘cana broma cu loke nan tin’ pa otro hende mira. Pero toch nan a demostra un actitud orguyoso. Con? Ora Satanas a purba di pone Eva cay den tentacion, el a insinua cu Dios tabatin algo maraviyoso cu Eva merece pero cu Dios no kier a dun’e. Diabel a bisa Eva cu si e come di “e palo di conocemento di bon y malo”, lo e “ta manera Dios, conociendo bon y malo.” (Gen. 2:17; 3:5) Asina Satanas a laga Eva kere cu e por a bira independiente di Jehova. Orguyo por tabata e motibo pakico Eva a kere e mentira ey. El a come e fruta prohibi, pensando cu lo e no muri. E tabata completamente ekiboca!

12. Ki otro trampa Satanas a uza pa purba di pone Hesus cay den tentacion, pero con Hesus a reacciona?

¹² Na contraste cu Eva, Hesus a duna un bunita ehempel di humildad. Satanas a bolbe purba di pon’e cay den tentacion. E biaha aki e tabata kier pa Hesus haci algo pa impresiona otro hende pero cu lo a pone Dios na prueba. Pero Hesus a nenga redondamente pasobra esey lo tabata un demostracion di orguyo. El a bisa Satanas bon cla: “Ta para skirbi: ‘No pone Jehova bo Dios na prueba.’”—Lesa Lucas 4:9-12.

CON NOS POR PROTEHA NOS AMISTAD CU JEHOVA?

13, 14. Splica con Satanas ta uza tentacion awe.

¹³ Awe Satanas ta uza e mesun trampanan cu el a uza cu Eva y cu Hesus. E ta traha riba e “deseo di carni” door di laga mundo promove inmoralidad y tambe comemento y bebemento di mas. Tambe e ta purba di lanta e “deseo di wowo” pa medio di pornografia, specialmente riba Internet, y asina capta atencion di hende cu descuida. Ademas, e ta purba di stimula e deseo di bira prominente y di haya poder y rikesa pa pone hende bira orguyoso y ‘cana broma cu loke nan tin.’

¹⁴ Nos por compara “e cosnan cu tin den mundo” cu e as cu un piscador ta uza. E as ta parce atractivo pa e pisca, pero e tin un hanzue pega na dje. Satanas ta probecha di loke hende kisas ta considera necesidadnan basico pa laga nan haci algo cu ta bay contra di e leynan di Dios. E tentacionnan engañoso ey ta diseña pa lanta mal deseo den nos y desvia nos curason. E kier laga nos kere cu nos necesidadnan personal y un bida comodo ta mas importante cu haci e boluntad di Dios. Nos lo laga Satanas gaña nos?

15. Con e ehempel di Hesus por yuda nos resisti e tentacionnan di Satanas?

¹⁵ Eva a cay pa e tentacionnan di Satanas, pero Hesus si a rechasa nan firmemente. Cada biaha el a duna un contesta for di e Scritura, bisando: “Ta para skirbi.” Si nos studia Bijbel diligentemente, nos lo siña conoce e Palabra di Dios bon y nos lo por corda textonan cu por yuda nos resisti tentacion ora nan presenta. (Sal. 1:1, 2) Ta bon tambe pa nos pensa riba e ehempel di fiel sirbidornan di Dios di tempo biblico, pasobra esey por motiva nos pa imita nan lealtad. (Rom. 15:4) Y respet profundo pa Jehova, es decir, stima loke e ta stima y odia loke e ta odia, lo yuda proteha nos.—Sal. 97:10.

16, 17. Ki efecto nos “capacidad di pensa” por tin riba e sorto di hende cu nos ta?

¹⁶ Apostel Pablo a anima nos pa uza nos “capacidad di pensa” pa bira e sorto di persona cu ta pensa manera Jehova ta pensa, no manera e mundo. (Rom. 12:1, 2) Pablo a recorda nos cu nos mester tin control riba loke nos ta pensa. El a skirbi: “Nos ta tumba rasonamento incorecto y tur barera cu ta contra e conocemento di Dios; y nos ta controla tur pensamento pa haci esakinan obediente na Cristo.” (2 Cor. 10:5) Loke nos ta pensa tin un gran influencia riba ki sorto di hende nos ta, pues nos tin cu ocupa nos mente cu cosnan edificante.—Flp. 4:8.

¹⁷ Si nos kier ta santo, nos mester rechasa tur mal pensamento y deseo. Nos tin cu stima Jehova cu “un curason limpi.” (1 Tim. 1:5) Pero no lubida cu e curason ta engañoso; kisas nos no a ripara mes cuanto “e cosnan cu tin den mundo” a afecta nos. (Jer. 17:9) Pesey ta sumamente importante pa nos tuma na pecho e conseho aki di Pablo: “Sigui samina boso mes pa sa si boso ta den e fe, sigui pone boso mes na prueba pa demostra ki tipo di hende boso ta.” Pues, ora nos ta studia Bijbel, nos tin cu puntra nos mes honestamente: ‘Mi pensamento- y deseonan ta agrada Dios?’—2 Cor. 13:5.

18, 19. Dicon nos mester haci nos best pa nos ta e sorto di hende cu Jehova kier pa nos ta?

¹⁸ Un otro cos cu por yuda nos resisti “e cosnan cu tin den mundo” ta di corda e palabranan aki di Juan: “Mundo ta pasa bay y tambe su deseonan, ma esun cu ta haci e boluntad di Dios ta keda pa semper.” (1 Juan 2:17) E mundo di Satanas ta duna e impresion di ta algo real y permanente, pero un dia su fin lo yega. Nada cu e mundo aki ta ofrece no ta duradero. Si nos corda esey, nos lo no cay pa e tentacionnan di Diabel.

¹⁹ Apostel Pedro a anima nos pa nos ta e sorto di hende cu Dios ta aproba “segun cu [nos] ta spera y corda semper riba e binida di e dia di Jehova! Durante e dia ey vlam di candela lo destrui cielo, y e elementonan lo dirti di e cayente intenso.” (2 Ped. 3:12) Pronto e dia ey lo yega, y Jehova lo destrui delaster un parti di e mundo di Satanas. Pero mientrastanto, Satanas lo sigui uza “e cosnan cu tin den mundo” pa purba di pone nos cay den tentacion, manera el a haci cu Eva y cu Hesus. Laga nos no ta manera Eva, kende a pensa solamente riba satisface su propio deseonan. Esey lo ta igual cu acepta Satanas como nos dios. Mas bien, laga nos ta manera Hesus y rechasa tur e tentacionnan ey firmemente, maske con atractivo nan ta parce. Laga nos haci nos best pa nos ta e sorto di hende cu Jehova kier pa nos ta.